Elimizge jańalanıw, kewillerge miyrim-shápáát hám qádir-qımbat baǵıshlaǵan bayram saltanatı bolıp ótti

Nawrız bayramı Húrmetli Prezidentimiz tárepinen qabıl etilgen arnawlı Qarar tiykarında pútkil elimiz boylap « Nawrızdı ulıǵlaw - insandı ulıǵlaw!» súreni astında kóterińki ruwxta ótkerilmekte.

Usı jıldıń 21-mart kúni Nókis qalasında ulıwma xalıqlıq Nawrız seyiline baǵıshlanǵan teatrlastırılǵan hám ádebiy muzıkalı xoreografiyalıq bayram tamashaları «Doslıq» kanalı boyındaǵı Ózbekstan milliy, mádeniy baylıǵı kóshesinde bolıp ótti. 

Bayram keshesine Ózbekstan Respublikası Prezidentiniń keńesgóyi T.Xudaybergenov, Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Ministrler Keńesiniń Baslıǵı F.Ermanov, húkimet aǵzaları, keń jámiyetshilik wakilleri qatnastı. 

Onda Joqarǵı Keńes Baslıǵı shıǵıp sóylep, gúllán xalqımızdı jańarıw hám jasarıw ayyamı – Nawrız bayramı múnásibeti menen qutlıqladı.

Aytıp ótiw orınlı, qutlı áyyam ótkerilip atırǵan maydanda baqsı-jırawlar, sázendeler hám kórkem óner sheberleri ózleriniń ónerleri menen xalqımızǵa bayram keypiyatın inám etti.

«Doslıq» kanalınıń boyında kórkem óner sheberleri, mádeniyat tarawı wákilleri, xalıq súygen atqarıwshılar jıynalǵanlarǵa Nawrızǵa tán kóterińkilik baǵıshladı.

Tuwısqan xalıqlardıń milliy úrp-ádet hám dástúrlerin ózinde jámlegen túrde sahnalastırılǵan kórinisler, milliy ayaq oyın hám qosıqlar atqarılıwı, xalqımızdıń milliy oyınları, baqsı hám jırawlardıń ájayıp shıǵıwları hámmege birdey unadı.