Alıs «Qaraqalpaqstan» posyolkası xalqınan xabar alındı

Elimizde húrmetli Prezidentimiz basshılıǵında «Insan qádiri ushın» degen iygilikli baslama tiykarında xalqımızdıń búgingi turmısınan razılıǵın támiyinlew baǵdarında keń kólemli ilajlar ámelge asırılmaqta. Bul baǵdarda elimizdiń barlıq orınları qatarında alıs hám shetki aymaq turǵınlarınıń da mashqalalarına sheshim tabıw boyınsha ilajlar dawam ettirilmekte.

Usınday ámeliy jumıslar qatarında búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamızdıń eń shetki aymaqlarınan biri bolǵan Qońırat rayonındaǵı «Qaraqalpaqstan» posyolka puqaralar jıyınına bardı.

Dáslep, jańadan shólkemlestirilgen tuwıw bóliminiń ashılıw máresimi ótkerilip, Joqarǵı Keńes Baslıǵı jańa tuwıw bóliminiń paydalanıwǵa tapsırılıwı múnásibeti menen jıynalǵanlardı qutlıqladı.

Atap ótiw orınlı, húrmetli Prezidentimizdiń tapsırması menen hám Prezident Adminstraciyası baslıǵınıń qollap-quwatlawı tiykarında alıs «Qaraqalpaqstan» posyolkası xalqı ushın altı yarım milliard sumlıq qáwenderlik qarjıları esabınan tuwıw bólimi qurıldı hám de zárúrli úskeneler menen támiyinlenip, barlıq qolaylı sharayatlar jaratıldı. 
  
Bunnan soń, Joqarǵı Keńes Baslıǵı kóshe biyleri, nuranıylar menen ushırasıp, jaqınnan sáwbetlesti.

Onda aymaq turǵınlarınıń mashqalaları tıńlanıp, sheshimin tabıw ilajları kórildi. Hár bir bildirilgen múrájatlarǵa unamlı sheshim tabıw boyınsha juwapkerlerge anıq tapsırmalar berildi.

Bunnan soń, posyolka xalqı menen birge jańarıw hám jasarıw ayyamı – Nawrız bayramı keń túrde belgilendi.