Joqarǵı Keńes Baslıǵı sportshı jaslar menen ushırastı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev jaslar kúni sheńberinde bir qatar sportshı jaslar menen ushırastı. 

Ushırasıwda dáslep, Joqarǵı Keńes Baslıǵı húrmetli Prezidentimizdiń sportqa bolǵan ayrıqsha itibari haqqında atap ótti. 

Aytıp ótiw orınlı, elimizde Prezidentimiz basshılıǵında barlıq tarawlar qatarında sporttı rawajlandırıwǵa ayrıqsha itibar qaratılıp, bul baǵdarda keń kólemli ilajlar ámelge asırılmaqta.

Ótken qısqa waqıt ishinde jańadan-jańa sport obektleri qurılıp, búgingi kúnde de bunday ilajlar dawam ettirilmekte. Sonıń menen birge, olimpiya oyınlarına múnásip tayarlıq kóriw, jaslarımız arasınan dúnya arenalarında elimiz bayraǵın tanıtatuǵın sportshılardı jetilistirip shıǵarıw boyınsha da ámeliy jumıslar alıp barılmaqta. Óz gezeginde bunday sharayatlar sportshılarımızdı jańadan-jańa tabıslarǵa ruwxlandırmaqta.

Ótkerilgen ushırasıw dawamında sportshı jaslar, olardıń jaqınları hám trenerleri menen jaqınnan sáwbetlesilip, pikir hám usınısları tıńlandı.

Kóterilgen hár bir másele belgilep alınıp, tez pursatta unamlı sheship beriw boyınsha juwapkerlerge anıq tapsırmalar berildi.