Nókis qalasında ǵalabalıq juwırıw marafonı ótkerildi

Búgin Nókis qalasında 5 jónelis boyınsha sportshılar, studentler, jámlespegen jaslar hám baqsha tárbiyalanıwshıların ózinde jámlegen ǵalabalıq juwırıw marafonı ótkerildi.

Marafonnıń sıylıqlaw máresiminde Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnastı.

Atap ótilgenindey, sońǵı jılları húrmetli Prezidentimizdiń basshılıǵında barlıq tarawlar qatarında dene tárbiya hám sporttı rawajlandırıwǵa hám ǵalabalıq sporttı en jaydırıwǵa, jaslardı sportqa tartıwǵa ayrıqsha itibar qaratılıp, bul baǵdarda keń kólemli ilajlar ámelge asırılmaqta.

Búgingi marafon da mine usı baǵdardaǵı ilajlardan biri bolıp, sportshılar, áskeriy xızmetkerler, joqarı oqıw orınları studentleri, máhállelerdegi 7 jastan 70 jasqa shekemgi 5 mıńnan aslam qatnasıwshılardı ózinde jámledi.

Álbette, bunday ilajlar salamat turmıs tárizin qáliplestiriw, xalqımızdıń densawlıǵın bekkemlewde áhmiyetli esaplanadı.

Ótkerilgen marafon juwmaǵında qarsılaslarına ústem kelip, jeńimpazlıqtı qolǵa kirgizgen qatnasıwshılar medal hám bahalı sawǵalar menen sıylıqlandı.