Ámiwdárya rayonında jańa joybarlardıń jumısları úyrenildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ámiwdárya rayonında xalıqtıń turmıs jaǵdayın jaqsılaw, isbilermenlikti rawajlandırıw arqalı jańa jumıs orınların jaratıw bagdarında ámelge asırılıp atırǵan jumıslar menen tanıstı.

Dáslep, “Qıpshaq” máhállesindegi bazar aymaǵında ámelge asırılıwı belgilengen jumıslar kózden ótkerildi.

Bunnan soń, “Gúlzar” máhállesindegi “RIZQBARAKA” JShJ tárepinen sawda orayın shólkemlestiriw, “Boyovul” máhállesindegi jeke isbilermen Doniyor Jumamuratov tárepinen mebel islep shıǵarıw, “CHordara”daǵı “Amudaryo EKO MARKET” JShJ tárepinen ekobazar hám zamanagóy avtomobil turar ornın shólkemlestiriw, “Inobat Xo’janiyazova” shańaraqlıq kárxanasınıń aǵash ustashılıǵı joybarları kózden ótkerildi.

“Faol hayotga qadam” kúndizgi qarap turıw xızmeti, “Qılıshbay” máhállesindegi Sardorbek Imomaddinovtıń oqıw orayın shólkemlestiriw, “Qaraman” máhállesindegi Matyakubov Ómir shańaraǵındaǵı sharawashılıq joybarları, bunnan tısqarı, “KUNGRAD DRINKS” JShJniń kótere sawda xızmetin shólkemlestiriw, “AMUDARYO YORUG‘“ JShJniń shıǵındını qayta islew – ekilemshi granula islep shıǵarıw joybarları jumısları úyrenildi. Isbilermenler menen tıǵız islesiw arqalı jaqınnan járdem beriw boyınsha juwapkerlerge tapsırmalar berildi.

Úyreniwler dawamında Joqarǵı Keńes Baslıǵı “DONO AVLOD” mámleketlik emes mektepke shekemgi bilimlendiriw shólkeminiń ashılıwında qatnastı hám jaratılǵan sharayatlar menen tanıstı.

Sonday-aq, “Jańa Ózbekstan” massivinde ámelge asırılǵan qurılıs jumısları hám abadanlastırıw basqarması tárepinen pullı xızmetlerdi jolǵa qoyıw joybarları barıp kórildi.

Xalıqtıń abadan turmısın támiyinlew, jańa jumıs orınların jaratıwǵa qaratılǵan bunday joybarlardı elede kóbeytiw kerek ekenligi atap ótilip, juwapkerlerge anıq tapsırmalar berildi.