Joqarǵı Keńes Baslıǵı futbolshı-jaslar menen ushırastı

Sońǵı jılları elimizde húrmetli Prezidentimizdiń basshılıǵında dene tárbiya hám sporttı rawajlandırıwǵa, xalıqtı, ásirese, jaslardı sportqa keńnen tartıwǵa ayrıqsha itibar qaratılıp, bul baǵdarda keń kólemli ilajlar ámelge asırılmaqta.

Mine usınday itibar nátiyjesinde, bir qatar sport túrleri qatarında millionlar oyını bolǵan futbol boyınsha da kóplegen joqarı nátiyjelerge erisilip atır.

Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev «Aral» futbol komandası hám «Aral QQGaz» futzal komandası aǵzaları menen ushırastı.

Onda Ministrler Keńesiniń Baslıǵı F.Ermanov qatnastı.

Ótkerilgen ilajda búgingi kúnde sportshılarımızdıń erisip atırǵan joqarı nátiyjeleri, sportshı jaslarǵa jaratılıp atırǵan sharayatlar, futboldı rawajlandırıw baǵdarında ámelge asırılıp atırǵan jumıslar haqqında keń túrde sóz etildi.

Sonday-aq, Ózbekstan birinshi ligasında múnásip qatnasqan «Aral QQGaz» futzal komandası aǵzaları bahalı sawǵalar menen xoshametlendi.

Bunnan soń, «Aral» futbol komandasına jańadan qabıl etilgen futbolshılarǵa komandanıń arnawlı formaları, al, komandaǵa bolsa, arnawlı avtomashina tapsırıldı.