Qubla Koreya mámleketinde ótkerilgen seminar sheńberinde Qaraqalpaqstannıń investiciyalıq potencialı tanıstırıldı

Jaqında Qubla Koreya mámleketinde Arqa-Shıǵıs Aziya mámleketleri regionallıq administraciyaları awqamı (АРАССВА)nıń gezektegi seminarı ótkerildi.

Onda Ózbekstan delegaciyası quramında Qaraqalpaqstannan da wákiller qatnastı.

Seminarda wákillerimiz tárepinen Qaraqalpaqstan Respublikasında ámelge asırılıwı kútilip atırǵan investiciyalıq joybarlar hám regionımızdıń potencialı haqqında keń túrde maǵlıwmat berildi.

Sonday-aq, sońǵı jılları húrmetli Prezidentimizdiń Qaraqalpaqstanǵa bolǵan itibarı nátiyjesinde regionımız ushın óz aldına qabıl etilgen qarar hám pármanlar, usı tiykarda isbilermenlikti rawajlandırıw, investiciyalıq tartımlılıqtı arttırıw baǵdarında jaratılǵan imkaniyatlar haqqında keń túrde sóz etildi.

Bunnan soń Koreyanıń Far East University wákilleri menen ushırasıw ótkerilip, onda usı universitet hám Qaraqalpaq mámleketlik universiteti arasında joqarı bilim beriw baǵdarında birge isesiw boyınsha kelisip alındı.

Sapar dawamında Kor Net global kompaniyası menen birge koreyalı kompaniyalar qatnasıwında ushırasıwlar ótkerilip, farmacevtika, awıl xojalıǵı, qurılıs, turizm baǵdarlarında birge islesiw boyınsha kelisimge erisildi.