Joqarǵı Keńes Baslıǵı Qaraqalpaqstanda samal elektr stanciyaların qurıw máseleleri boyınsha investorlar menen ushırastı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Saudiya Arabstanınıń «ACWA Power» kompaniyasınıń Ózbekstandaǵı basshısı Jon Zaidi basshılıǵındaǵı kompaniya wákilleri menen ushırastı.

Onda dáslep, Joqarǵı Keńes Baslıǵı húrmetli Prezidentimizdiń Qaraqalpaqstanda isbilermenlikti rawajlandırıw hám investiciyalıq ortalıqtı jaqsılaw boyınsha ayrıqsha itibarı haqqında keń túrde atap ótti.

Ushırasıwda «ACWA Power» kompaniyası tárepinen samal elektr stanciyasın qurıw boyınsha respublikamız aymaǵında ámelge asırılıp atırǵan joybarlar, ámelge asırılıwı belgilengen perspektivalı joybarlardı ele de kóbeytiw, sonday-aq, bar bolǵan múmkinshiliklerden nátiyjeli paydalanıw máseleleri sóz etildi.

Aytıp ótiw orınlı, «Nókis-1» joybarı sheńberinde quwatlıǵı 100 megavatt bolǵan samal elektr stanciyası qurıldı. Sonday-aq, Beruniy rayonında «Nókis-2» joybarı sheńberinde bahası 260 mln. dollarlıq 200 megavattlıq  samal elektr stanciyası hám 100 megavattlıq energiya saqlaw sisteması qurılmaqta. Bunnan tısqarı, Qońıratta 2000 megavattlıq samal elektr stanciyaların qurıw boyınsha ámeliy jumıslar baslanǵan.

Ótkerilgen ushırasıwda birge islesiwdi ele de bekkemlew hám keńeytiw, qurılıs jumısları hám stanciya jumıslarına jergilikli puxaralardı tartıw, bunıń ushın zárúr kadrlardı tayarlawda Qaraqalpaqstandaǵı oqıw orınları imkaniyatlarınan paydalanıw sıyaqlı áhmiyetli máseleler haqqında keń túrde pikirlesilip, aldaǵı rejeler belgilep alındı.