Shımbay rayonında 200 jańa jumıs ornın jaratıw quwatlıǵına iye «HD Sons» kárxanası jumıs basladı

Sońǵı jılları elimizde húrmetli Prezidentimizdiń basshılıǵında aymaqlardı kompleksli rawajlandırıw, ekonomika tarmaqların keńeytiw hám sanaat potencialın arttırıwǵa qaratılǵan keń kólemli reformalar ámelge asırmaqta. Usı tiykarda qala hám rayonlarda zamanagóy óndiris quwatlıqları qurılıp, jańa sanaat kárxanaları iske qosılıp atır hám xalıqtıń bántligin támiyinlew, turmıs dárejesin arttırıw baǵdarında salmaqlı nátiyjelerge erisilmekte.

Usınday joybarlar qatarında Shımbay rayonında «HD Sons» tekstil kárxanasınıń ashılıwına arnalǵan ilaj ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, jıynalǵanlardı kárxananıń ashılıwı menen qutlıqladı.

Atap ótilgenindey, húrmetli Prezidentimizdiń regionımızǵa qaratıp atırǵan ayrıqsha itibarı nátiyjesinde Shımbay rayonında da investiciyalıq joybarlardı ámelge asırıw, jańa óndirislik quwatlıqlardı iske qosıw hám xalıqtıń bántligin támiyinlew baǵdarında anıq ámeliy ilajlar dawam ettirilmekte.

Ulıwma bahası 15 mln. dollar bolǵan jańadan ashılǵan «HD Sons» kárxanası tolıq quwatlıqta iske túsiwi menen 7 mıń tonna shiyki zattı qayta islew hám 4 mıń tonna iyirilgen jip ónimlerin islep shıǵarıw imkaniyatı jaratıladı. Sonday-aq, 6,5 million dollardan aslam ónimdi eksportqa shıǵarıw jolǵa qoyıladı. Bunnan tısqarı, 200 den aslam jańa jumıs orınları jaratılıp, rayon xalqı, ásirese, jaslardıń bántligi támiyinlenedi.

Ilaj dawamında jıynalǵanlar kárxana jumısları menen jaqınnan tanıstı.