Innovaciyalıq texnologiyalar universiteti jańa imaratınıń irge tası qoyıldı

Elimizde húrmetli Prezidentimizdiń basshılıǵında jaslardı hár tárepleme bilimli insanlar etip tárbiyalaw, olardıń bilim alıwı hám kásip-óner iyelewi ushın qolaylı sharayatlar jaratıw baǵdarında keń kólemli ilajlar ámelge asırılmaqta.

Bul baǵdarda, mámleketlik bilimlendiriw mákemeleri menen birge, mámleketlik emes bilimlendiriw orınlarınıń sanın arttırıw, bilim beriw sapasın jańa basqıshqa alıp shıǵıw boyınsha da nátiyjeli jumıslar alıp barılıp atır.

Usınday ilajlardıń dawamı sıpatında Nókis qalasında Innovaciyalıq texnologiyalar universiteti jańa imaratınıń irge tası qoyıldı.

Onda Qaraqalpaqstan Respublikası Joqarǵı Keńesi komitet baslıǵı M.Atamuratov, Ózbekstan Respublikası joqarı bilimlendiriw, ilim hám innovaciyalar ministri Q.Sharipov, Ministrler Keńesi Baslıǵınıń orınbasarı B.Ótemuratovlar qatnastı.

Atap ótiw orınlı, ulıwma bahası 10 mln. dollarlıq oqıw kompleksinde 10 mıń student bilim alıwı názerde tutılmaqta. Bunnan tısqarı, 1000 orınlı studentler jataqxanası, sport zal hám arnawlı maydanshalar, oqıw-laboratoriya xanaları qurıladı hám student-jaslar ushın barlıq qolaylı sharayatlar jaratıladı.