Nókis qalasında «Kúlki inám etemiz» qayırqomlıq akciyası ótkerilmekte

Administraciya basshısınıń baslaması menen usı jıldıń 5-12-aprel kúnleri aralıǵında Nókis qalasındaǵı Balalar milliy medicina orayınıń Aralboyı regionı balalar kesellikleri boyınsha medicinalıq klinikasında «Kúlki inám etemiz» («Дарим улыбку») xalıqaralıq fondınıń qatnasıwında qayırqomlıq akciyası ótkerilmekte.

Ilaj sheńberinde xalıqtıń sociallıq qorǵawǵa mútáj qatlamı arasınan bir neshe basqıshta kishkene nawqaslar saylap alındı. Dáslep Balalar milliy medicina orayınıń qánigeleri tárepinen 2000 nan aslam ul-qızlar tekseriwden ótkerilip, olardan 270 ten aslamı tańlap alındı.

Bul balalardıń hár birinde 40 jıllıq tájiriybege iye, dúnyaǵa belgili plastikalıq xirurg Hasan Bayev tárepinen medicinalıq tekseriwler ámelge asırıldı.

Nátiyjede olardıń arasınan xirurgiyalıq operaciyalar ótkeriwge mútáj kishi jastaǵı nawqaslar tańlap alınıp, Balalar milliy medicina orayınıń Aralboyı regionı balalar kesellikleri boyınsha medicinalıq klinikasına jatqarıldı.

Qayırqomlıq akciyası sheńberinde jámi 70 ten aslam nawqaslarda xirurgiyalıq operaciyalar orınlanadı.

Áhmiyetlisi, akciya sheńberinde tuwma tańlay hám erin kemtigi bolǵan balalardaǵı operaciyalardan tısqarı bir qatar unikal operaciyalar da ótkerilmekte. Sonıń ishinde, qulaq qalqanı bolmaǵan nawqas balalarda bul organ tiklep berildi.