Qaraqalpaqstan Respublikası Joqarǵı Keńesiniń on birinshi sessiyası haqqında málimleme

Usı jıldıń 20-aprel kúni Qaraqalpaqstan Respublikası Joqarǵı Keńesiniń on birinshi sessiyası ótkerildi. Sessiyaǵa Ózbekstan Respublikası Oliy Majlisi Senatı hám Húkimet aǵzaları, Respublika taraw basshıları, ǵalaba xabar quralları wákilleri, sonday-aq, Joqarǵı Keńestiń deputatları qatnastı.

Dáslep Ózbekstan Respublikası hám Qaraqalpaqstan Resublikasınıń mámleketlik gimnleri jańladı. Sessiyanı Qaraqalpaqstan Respublikası Joqarǵı Keńesiniń Baslıǵı Amanbay Orınbaev kiris sóz benen ashtı hám basqarıp bardı.

Sessiya «Qaraqalpaqstan» telekanalı arqalı tuwrıdan-tuwrı efirde jarıtıp barıldı.

Kún tártibinde dáslep Qaraqalpaqstan Respublikası Joqarǵı Keńesiniń komiteti quramına ózgeris hám qosımshalar kirgiziw tuwralı másele qarap shıǵıldı.

Bul másele boyınsha Joqarǵı Keńestiń bosap qalǵan 37-sanlı «Xojeli» saylaw okrugine Niyazov Islambek Maxsetovichtiń Joqarǵı Keńes deputatı bolıp saylanǵanı múnásibeti menen Sanaat, qurılıs, transport hám málimleme texnologiyaları máseleleri komitetiniń quramına ózgerisler kirgizilip, deputatlar tárepinen qarar qabıl etildi.

Kún tártibindegi keyingi másele Qaraqalpaqstan Respublikası Joqarǵı Keńesiniń Sanaat, qurılıs, transport hám málimleme texnologiyaları máseleleri komitetiniń baslıǵın saylaw tuwralı bolıp, bul másele boyınsha deputat Niyazov Islambek Maxsetovichtıń kandidaturası usınıs etildi.

Kún tártibindegi másele boyınsha deputatlar tárepinen tiyisli qarar qabıl etildi hám I.Niyazov Qaraqalpaqstan Respublikası Joqarǵı Keńesiniń Sanaat, qurılıs, transport hám málimleme texnologiyaları máseleleri komitetiniń baslıǵı bolıp saylandı.

Bunnan soń, kún tártibi sheńberinde Qaraqalpaqstan Respublikasında turizmdi rawajlandırıw boyınsha ámelge asırılıp atırǵan ilajlar haqqında Qaraqalpaqstan Respublikası Ministrler Keńesiniń esabatı tuwralı másele boyınsha Ministrler Keńesi Baslıǵınıń turizm, mádeniyat, mádeniy miyras hám ǵalaba kommunikaciyalar máseleleri boyınsha orınbasarı R.Zarikeev bayanat jasadı.

Bul másele de tolıq qarap shıǵıldı hám deputatlar tárepinen qarar qabıl etildi.

Kún tártibindegi keyingi másele Ózbekstan Respublikası Prezidentiniń «Ózbekstan máhálleleri awqamı jumısın jolǵa qoyıw hám máhállelerde basqarıw sistemasın jetilistiriwge baylanıslı qosımsha ilajlar haqqında»ǵı 402-sanlı qararınıń aymaqlarda orınlanıwı boyınsha Máhálleler awqamı Qaraqalpaqstan Respublikası basqarması baslıǵınıń esabatı tuwralı bolıp, bul másele boyınsha Máhálleler awqamı Qaraqalpaqstan Respublikası basqarması baslıǵı S.Turmanov shıǵıp sóyledi.

Kún tártibindegi másele qarap shıǵıldı hám deputatlar tárepinen qarar qabıl etildi.

Sessiya kún tártibinde ózbasımshalıq penen ielep alınǵan jer uchastkasına bolǵan ijara huqıqı hámde olarda qurılǵan imaratlar menen obektlerge bolǵan múlk huqıqı tán alınıp atırǵan puqaralardıń dizimin sessiya qararı menen tastıyıqlaw máselesi qarap shıǵıldı.
Ózbekstan Respublikasınıń arnawlı Nızamın basshılıqqa alıp, ózbasımshalıq penen ielep alınǵan jer uchastkasına bolǵan ijara huqıqı jánede olarda qurılǵan imaratlar menen obektlerge bolǵan múlk huqıqı tán alınıp atırǵan 322 puqaranıń dizimi sessiya qararı menen tastıyıqlandı.

Sessiya májilisiniń kún tártibindegi keyingi másele Joqarǵı Keńes Prezidiumınıń tiyisli qararların tastıyıqlaw haqqında bolıp, bul másele de tolıq qarap shıǵıldı.

Bunnan soń deputatlar tárepinen arnawlı qarar qabıl etildi.

Usınıń menen Qaraqalpaqstan Respublikası Joqarǵı Keńesiniń on birinshi sessiyası óz jumısın juwmaqladı.