Kegeyli rayonında jaslar menen ushırasıw ótkerildi

Prezidentimizdiń tapsırması menen piyshembi jaslar kúni dep belgilenip, usı tiykarda orınlarda basshı hám jaslar ushırasıwları ótkerilip kelinbekte.

Usınday gezektegi ushırasıw Kegeyli rayonında ótkerildi. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev bir qatar jumıssız hám atalıqqa alınǵan, sonday-aq, awır kategoriyadaǵı hám belsendi jaslar menen ushırastı.

Dáslep jaslar ushın bos jumıs orınları miynet yarmarkası shólkemlestirildi. Bunnan tısqarı, jaslardın baslamaların qollap-quwatlaw baǵdarında jaratılǵan sharayatlar, berilgen imkaniyatlar boyınsha prezentaciya jıynalǵanlar názerine usınıldı.

Atap ótiw orınlı, bul jaslar menen jaqında Joqarǵı Keńes Baslıǵı ushırasıp, olardıń baslamaların qollap-quwatlaw hám jaqınnan járdem beriw boyınsha juwapkerlerge tapsırmalar bergen edi. Usı tiykarda 50 jastıń úy sharayatında islep shıǵarıw hám isbilermenlik penen shuǵıllanıwı ushın arnawlı úskeneler alıp keliw ilajları kórilmekte. Bunnan tısqarı, bántlik, sociallıq qollap-quwatlaw hám basqa da turmıslıq máseleler sheshiliwi názerde tutılǵan.

Búgingi ótkerilgen ushırasıwda da jaslardıń pikir-usınısları tıńlanıp, ornında sheshimin tabıw ilajları kórildi hám olardıń baslamaların qollap-quwatlaw boyınsha juwapkerlerge anıq tapsırmalar berildi.