Pillekeshlerimiz shártnama rejesin artıǵı menen orınladı

Pille – xalıq baylıǵı. Awıl xojalıǵı tarawında pilleshiliktiń óz ornı bar. Bunı tereń sezingen respublikamızdıń pillekeshleri hár jılı pilleden mol zúráát alıw ushın tınımsız miynet etedi. Mine bıyılǵı jılı bahárgi pille jetistiriw máwsimin jaqsı ótkergen respublikamızdıń pillekeshleri ózlerine bildirilgen isenimdi aq júzli, abıroylı bolıp aqlap shıqtı. Yaǵnıy, olar 591,7 tonna pille qırmanın jaratıp, shártnama rejelerin artıǵı menen orınlap shıǵıwǵa miyasar boldı. Álbette, bul miynet jeńisi elimizde Húrmetli Prezidentimizdiń basshılıǵında ekonomikanıń áhmiyetli tarmaǵı bolǵan awıl xojalıǵında ámelge asırılıp atırǵan reformalardıń, ásirese, diyqan hám fermerlerimizge jaratılıp atırǵan keń imkániyatlardıń nátiyjesi bolıp esaplanadı. Bul miynet jeńisine birinshilerden bolıp óz úleslerin qosqan SHımbay (8,18t), SHomanay (2,12t) rayonları pillekeshleriniń miynetlerin ayrıqsha atap ótsek boladı. Sonday-aq, bul iygilikli iske Ámiwdárya (176,2 t), Ellikqala (119,95 t), Tórtkúl (129,3 t), Beruniy (114,1 t), Xojeli (15,11 t), Taqıyatas (12,91 t), Kegeyli (10,81 t), Qanlıkól (1,5 t) hámde Nókis (1,5 t) rayonlarınıń miynetkeshleri de salmaqlı úleslerin qostı. Maǵlıwmat ornında aytıp ótsek, báhárgi pille jetistiriw máwsiminde respublika boyınsha hár bir qutı náwqan qurtınan ortasha 55,3 kg nan pille jetistirilip, tayarlaw punktlerine 591,7 tonna sapalı pille zúrááti kelip tústi. Elimizdiń sociallıq-ekonomikalıq rawajlanıwına ózleriniń úleslerin qosıwdı maqtanısh dep bilgen respublikamız pillekeshlerin erisken tabısları menen qızǵın qutlıqlap, pilleden ekinshi zúráát alıw máwsimin de joqarı dárejede shólkemlestirip, pille qırmanınıń jáne de bálentlewinde belsendilik kórsetiwine isenemiz.