Qaraqalpaqstan Respublikası Joqarǵı Keńesiniń on ekinshi sessiyası haqqında málimleme
Usı jıldıń 15-iyun kúni Qaraqalpaqstan Respublikası Joqarǵı Keńesiniń on ekinshi sessiyası ótkerildi. Sessiyaǵa Ózbekstan Respublikası Oliy Majlisi Senatı hám Húkimet aǵzaları, Respublika taraw basshıları, ǵalaba xabar quralları wákilleri, sonday-aq, Joqarǵı Keńestiń deputatları qatnastı.
Dáslep Ózbekstan Respublikası hám Qaraqalpaqstan Resublikasınıń mámleketlik gimnleri jańladı. Sessiyanı Qaraqalpaqstan Respublikası Joqarǵı Keńesiniń Baslıǵı Amanbay Orınbaev kiris sóz benen ashtı hám basqarıp bardı.
Sessiya «Qaraqalpaqstan» telekanalı arqalı tuwrıdan-tuwrı efirde jarıtıp barıldı.
Sessiya kún tártibinde dáslep «Jámietlik qadaǵalaw haqqında»ǵı Qaraqalpaqstan Respublikası Nızamınıń joybarı tuwralı másele boyınsha Joqarǵı Keńestiń Jergilikli hákimiyattıӊ wákillikli hám puqaralardıӊ ózin-ózi basqarıw uyımları hámde mámleketlik uyımlardıӊ ashıqlıǵın támiyinlew máseleleri komiteti baslıǵı Sh.Otemisov bayanat jasadı.
Kún tártibindegi másele tolıq qarap shıǵıldı hám deputatlar tárepinen qarar qabıl etildi.
Kún tártibindegi keyingi másele «Energiyanı únemlew, onnan aqılǵa uǵras paydalanıw hám energiya nátiyjeliligin arttırıw haqqında»ǵı Qaraqalpaqstan Respublikası Nızamınıń joybarı tuwralı bolıp, bul másele boyınsha Joqarǵı Keńestiń Sanaat, qurılıs, transport hám málimleme texnologiyaları máseleleri komiteti baslıǵı I.Niyazov bayanat jasadı.
Bul másele de tolıq qarap shıǵıldı hám deputatlar tárepinen qarar qabıl etildi.
Bunnan soń Byudjet dáramatları rejesiniń orınlanıwı hám salıq qarızdarlıqların kemeytiwde ámelge asırılǵan jumıslar boyınsha Qaraqalpaqstan Respublikası Salıq basqarmasına parlamentlik soraw jiberiw tuwralı másele haqqında Joqarǵı Keńestiń Byudjet, ekonomikalıq reformalar, investiciyalar hám innovaciya máseleleri komiteti baslıǵı B.Seytnazarov bayanat jasadı.
Kún tártibindegi másele tolıq qarap shıǵıldı hám deputatlar tárepinen qarar qabıl etildi.
Sessiya kún tártibindegi keiyngi másele Ózbekstan Respublikası Oliy Majlisi Insan huqıqları boyınsha wákiliniń Qaraqalpaqstan Respublikasındaǵı aymaqlıq wákiliniń 2025-jılda ámelge asırǵan jumısları haqqında bolıp, bul másele boyınsha Qaraqalpaqstan Respublikasındaǵı aymaqlıq wákil J.Shlımbetov bayanat jasadı.
Bul másele de tolıq qarap shıǵıldı hám deputatlar tárepinen qarar qabıl etildi.
Sessiya dawamında Qaraqalpaqstan Respublikası byudjetiniń 2025-jılda orınlanıwın sırtqı audit hám bahalawdan ótkeriwdiń juwmaǵı tuwralı másele boyınsha Esap palatasınıń bas inspektorı - Qaraqalpaqstan Respublikası Ministrler Keńesindegi wákili X.Qurbonov bayanat jasadı.
Bul másele de tolıq qarap shıǵılıp, deputatlar tarepinen qarar qabıl etildi.
Sessiyada kommerciyalıq bankler tárepinen baǵdarlamalar sheńberinde kredit qarjıları ajıratılıwı hámde fizikalıq hám yuridikalıq shaxslardıń múrájatları menen islesiw, sonday-aq, xızmetkerler arasında korrupciyanıń aldın alıwǵa qaratılǵan jumıslar boyınsha Oraylıq banki Qaraqalpaqstan Respublikası Bas basqarmasına jiberilgen Parlamentlik sorawdıń nátiyjesi tuwralı másele qarap shıǵıldı.
Atap ótiw orınlı, Joqarǵı Keńestiń ótken toǵızınshı sessiyasında usı másele boyınsha Oraylıq banki Qaraqalpaqstan Respublikası Bas basqarmasına Parlamentlik sorawı jiberilgen edi.
Búgingi sessiyada Parlamentlik sorawdıń nátiyjesi boyınsha Oraylıq banki Qaraqalpaqstan Respublikası Bas basqarması baslıǵı A.Isakov bayanat jasadı.
Kún tártibindegi másele qarap shıǵılıp, deputatlar tárepinen qarar qabıl etildi.
Sessiya kún tártibinde ózbasımshalıq penen ielep alınǵan jer uchastkasına bolǵan ijara huqıqı hámde olarda qurılǵan imaratlar menen obektlerge bolǵan múlk huqıqı tán alınıp atırǵan puqaralardıń dizimin sessiya qararı menen tastıyıqlaw máselesi qarap shıǵıldı.
Ózbekstan Respublikasınıń arnawlı Nızamın basshılıqqa alıp, ózbasımshalıq penen ielep alınǵan jer uchastkasına bolǵan ijara huqıqı jánede olarda qurılǵan imaratlar menen obektlerge bolǵan múlk huqıqı tán alınıp atırǵan 800 puqaranıń dizimi sessiya qararı menen tastıyıqlandı.
Sessiya kún tártibinde Qaraqalpaqstan Respublikası sudı baslıǵınıń orınbasarı - jınayat isleri boyınsha sudlaw kollegiyasınıń baslıǵın saylaw tuwralı másele kórip shıǵıldı.
Bul másele boyınsha Abibullaev Elubay Onǵarbaevichtiń kandidaturası usınıldı.
Talabannıń kandidaturası deputatlar tárepinen maqullandı hám E.Abibullaev – Qaraqalpaqstan Respublikası sudı baslıǵınıń orınbasarı - jınayat isleri boyınsha sudlaw kollegiyasınıń baslıǵı lawazımına saylandı.
Sessiya májilisiniń kún tártibindegi keyingi másele Joqarǵı Keńes Prezidiumınıń tiyisli qararların tastıyıqlaw haqqında bolıp, bul másele de tolıq qarap shıǵıldı hám deputatlar tárepinen arnawlı qarar qabıl etildi.
Usınıń menen Qaraqalpaqstan Respublikası Joqarǵı Keńesiniń on ekinshi sessiyası óz jumısın juwmaqladı.
