Qaraqalpaqstan Respublikası Joqarǵı Keńesiniń on úshinshi sessiyası haqqında málimleme
Usı jıldıń 17-avgust kúni Qaraqalpaqstan Respublikası Joqarǵı Keńesiniń on úshinshi sessiyası ótkerildi. Sessiyaǵa Ózbekstan Respublikası Oliy Majlisi Senatı hám Húkimet aǵzaları, Respublika taraw basshıları, ǵalaba xabar quralları wákilleri, sonday-aq, Joqarǵı Keńestiń deputatları qatnastı.
Dáslep Ózbekstan Respublikası hám Qaraqalpaqstan Resublikasınıń mámleketlik gimnleri jańladı. Sessiyanı Qaraqalpaqstan Respublikası Joqarǵı Keńesiniń Baslıǵı Amanbay Orınbaev kiris sóz benen ashtı hám basqarıp bardı.
Sessiya «Qaraqalpaqstan» telekanalı arqalı tuwrıdan-tuwrı efirde jarıtıp barıldı.
Sessiya kún tártibinde dáslep Qaraqalpaqstan Respublikasınıń aldaǵı jıllardaǵı rawajlanıwın belgilep beretuǵın eń áhmietli hújjet - Qaraqalpaqstan Respublikasın 2030-jılǵa shekem sociallıq-ekonomikalıq rawajlandırıw strategiyası qarap shıǵıldı.
Atap ótiw orınlı, kámbaǵallıqtı qısqartıw hám bántlikti támiyinlew baǵdarında 2030-jılǵa shekem jumıssızlıqtı 3,0 procentten tómenletiw ushın sanaat, xızmet kórsetiw hám awıl xojalıǵı joybarları barlıq máhállelelerde iske túsiriledi.
Bilimlendiriw sisteması hám kadrlar potencialı máselelerinde balalardı baqshalarǵa qamtıp alıw dárejesin 86 procentke jetkeriw, sonın ishinde Nókis qalası, Nókis, Beruniy hám Qoӊırat rayonlarında bul kórsetkishti 100 procentke jetkeriw názerde tutılmaqta.
Mekteplerde bilimlendiriwdiń sapasın arttırıw maqsetinde 80 mektepte qurılıs rekonstrukciya jumısların alıp barıw, mektep pitkeriwshilerin joqarı bilimlendiriwge qamtıp alıwdı 60 procentke shekem asırıw kózde tutılmaqta.
Sociallıq infrastruktura hám kommunallıq xızmetler sapasın jaqsılaw maqsetinde hár jılı 4 mıńnan artıq kvartiralı turaq-jaylardı qurıw, sonday-aq, eń áhmietlisi, xalıqtı ishimlik suwı menen támiyinlew dárejesin házirgi 75 procentten 86 procentke jetkeriw belgilep alınbaqta. Elektr hám gaz támiynatında turaqlılıqqa erisiw ushın 411 dana transformator punkti hám úsh yarım mıń kilometr elektr tarmaqların jańadan qurıw, modernizaciyalaw hám rekonstrukciyalaw jumısları alıp barıladı.
Ekologiyalıq turaqlılıqtı támiyinlew baǵdarında Aralboyı aymaǵında jasıl qorǵaw zonaların eki yarım million gektarǵa jetkeriw, záhárli shań-tozańlardı 30 procentke azaytıw arqalı xalqımızdıń salamatlıǵın ele de bekkemlew názerde tutılmaqta.
Kún tártibindegi dáslepki másele boyınsha Ózbekstan Respublikası Prezidenti janındaǵı Strategiyalıq rawajlanıw hám reformalar agentligi direktorınıń orınbasarı – Taxirjon Safarov shıǵıp sóyledi.
Kún tártibindegi másele tolıq qarap shıǵıldı hám deputatlar tárepinen maqullanıp, qarar qabıl etildi.
Kún tártibindegi keyingi másele Qaraqalpaqstan Respublikası Joqarǵı Keńesiniń Jergilikli hákimiyattıӊ wákillikli hám puqaralardıń ózin-ózi basqarıw uyımları hámde mámleketlik uyımlardıӊ ashıqlıǵın támiyinlew máseleleri komiteti tárepinen islenip atırǵan jumıslar haqqında málimleme tuwralı bolıp, bul másele boyınsha Joqarǵı Keńestiń komitet baslıǵı Sh.Otemisov bayanat jasadı.
Bul másele de tolıq qarap shıǵılıp, deputatlar tárepinen qarar qabıl etildi.
Kún tártibindegi keyingi másele Ózbekstan Respublikasında sharwashılıq tarawı hám onıń tarmaqların rawajlandırıw boyınsha 2022-2026-jıllarǵa mólsherlengen baǵdarlamada belgilengen wazıypalardıń Qaraqalpaqstan Respublikasında orınlanıw barısı boyınsha Ministrler Keńesiniń esabatı tuwralı bolıp, bul másele boyınsha Ministrler Keńesi Baslıǵınıń jaylawlardan nátiyjeli paydalanıwdı shólkemlestiriw, sharwa ot-jem bazasın bekkemlew hám sharwashılıqtı rawajlandırıw máseleleri boyınsha birinshi orınbasarı F.Nurmuxammadov bayanat jasadı.
Bul másele de tolıq qarap shıǵıldı hám deputatlar tárepinen qarar qabıl etildi.
Kún tártibindegi gezektegi másele Qaraqalpaqstan Respublikası Joqarǵı Keńesiniń Sanaat, qurılıs, transport hám málimleme texnologiyaları máseleleri komiteti tárepinen islenip atırǵan jumısları haqqında málimleme tuwralı bolıp, bul másele boyınsha Joqarǵı Keńestiń komitet baslıǵı I.Niyazov bayanat jasadı.
Bul másele de deputatlar tárepinen qarap shıǵılıp, qarar qabıl etildi.
Sessiya kún tártibinde ózbasımshalıq penen ielep alınǵan jer uchastkasına bolǵan ijara huqıqı hámde olarda qurılǵan imaratlar menen obektlerge bolǵan múlk huqıqı tán alınıp atırǵan puqaralardıń dizimin sessiya qararı menen tastıyıqlaw máselesi qarap shıǵıldı.
Ózbekstan Respublikasınıń arnawlı Nızamın basshılıqqa alıp, ózbasımshalıq penen ielep alınǵan jer uchastkasına bolǵan ijara huqıqı jánede olarda qurılǵan imaratlar menen obektlerge bolǵan múlk huqıqı tán alınıp atırǵan 6429 puqaranıń dizimi sessiya qararı menen tastıyıqlandı.
Sessiya májilisiniń kún tártibindegi keyingi másele Joqarǵı Keńes Prezidiumınıń tiyisli qararların tastıyıqlaw haqqında bolıp, bul másele de tolıq qarap shıǵıldı hám deputatlar tárepinen arnawlı qarar qabıl etildi.
Usınıń menen Qaraqalpaqstan Respublikası Joqarǵı Keńesiniń on úshinshi sessiyası óz jumısın juwmaqladı.
