Xoshxabar: Taqıyatas rayonı paxta tapsırıw shártnamasın orınladı

Taqıyataslı pidayı, miynetkesh paxtakeshlerdiń awızbirshilikte  etken miynetleriniń nátiyjesinde bul rayon mámleketimizge paxta tapsırıw boyınsha shártnamalıq rejesin birinshi bolıp artıǵı menen, yaǵnıy, 100,6 payızǵa orınlap, miynet jeńisine eristi. Álbette, hár qanday nátiyjege óz-ózinen erisip bolmaydı. Bul iygilikli iske rayonda birinshilerden bolıp shártnamalıq rejelerin orınlaǵan «Madat batır» (120 payız), «Azamat» (134 payız), «Ádilbek» (103 payız) hám basqa fermer xojalıqlarınıń úlesi ayrıqsha boldı. Paxta jıyın-terim máwsimin jawın-shashınlı kúnlerge qaldırmastan qısqa múddetlerde shólkemlestirilgenlik jaǵdayında ótkeriw maqsetinde respublikamızda bir qatar ilajlar ámelge asırılmaqta. Atap aytqanda, aldınǵı terimshilerge avtomashina, muzlatqısh, televizor, gaz plitası hám basqa sawǵalardıń beriliwi jıyın-terimniń nátiyjeliligin arttırıwda úlken áhmiyetke iye bolmaqta. Paxtadan hasıl bolǵan bálent qırman tek fermer xojalıqlarınıń  dáramatın arttırıp ǵana qoymastan, rayon xalqınıń turmıs dárejesiniń jáne de jaqsılanıwına bekkem tiykar bolmaqta.