Isbilermenlerdiń múrájatları sheshilmekte
1179
Qaraqalpaqstan Respublikası Joqarǵı Keńesiniń Baslıǵı M.Erniyazov usı jıldıń 30-may – 1-iyun kúnleri qala hám rayonlardıń isbilermenleri menen videokonferencbaylanıs arqalı ushırasıwlar ótkergen edi.
Isbilermenlikti rawajlandırıw, isbilermenlerdi hár tárepleme qollap-quwatlaw, oylandırıp atırǵan mashqalalardı saplastırıw, múrájatların unamlı sheship beriw, olarǵa qolaylı sharayatlar jaratıw maqsetinde shólkemlestirilgen ushırasıwlarda isbilermenlerdiń múrájatları tıńlanıp, olardıń belgili bir bólimi ornında óz sheshimin tapqan bolsa, qosımsha úyreniw hám waqıt talap etetuǵın múrájatlar boyınsha juwapker basshılarǵa anıq tapsırmalar belgilep berilgen edi.
Biz búgingi kúnde múrájatları sheshimin tapqan isbilermenlerimizdiń ayırımları menen sáwbetlestik:
– Joqarǵı Keńes Baslıǵınıń isbilermenler menen ushırasıp, biziń mashqalamız hám jumısımızǵa óziniń keri tásirin tiygizetuǵın ayırım kemshilikler xaqqında múrájatımızdı tıńlaǵanı bizlerdi quwanıshqa bóledi, – deydi Kegeyli rayonı «Baymaqlı Esemurat» JShJ baslıǵı Esemurat Aljanov. – Videokonferenciyada men óz isbilermenlik háreketimdi ele de jetilistiriw, naq pul aylanısı menen birge plastik karta arqalı pul aylanısların jolǵa qoyıw ushın Xalıq banki tárepinen terminal alıwda járdem soraǵan edim. Bul múrájatım kóp waqıtqa sozılmay óziniń unamlı sheshimin taptı. Búgin Prezidentimiz, sonıń menen birge mámleketimiz ushın ayanbay miynet etip atırǵan barlıq basshılardıń isbilermenlikti rawajlandırıwdı maqset etken zamanlaslarımızǵa bolǵan itibarı ushın minnetdarshılıq bildiremiz.
–Bozataw rayonı qayta shɵlkemlestirilgennen keyin rayonda sharwashılıq tarawın rawajlandırıw boyınsha bir qansha isler ámelge asırılmaqta, – deydi Bozataw rayonı "Abılov Bayrambay" fermer xojalıǵı baslıǵı Bektilew Abılov. – Biraq biz kútken nátiyjege erisiwimiz ushın jaylaw jerler menen egislik jerlerdi babında suwǵarıw talap etiledi. Sonlıqtan, “Kusxanataw” awıl puqaralar jıyını aymaǵında fermer xojalıqlarınıń egislik jerlerin, tazadan ashılatuǵın jerlerdi hám jaylaw jerlerin suwǵarıwda mashqalalar payda bolmaqta. Ushırasıwda Ámiwdárya dáryasınan Erkindárya kanalına tuwrıdan-tuwrı suw jetkerip beriw ushın 5 kub quwatlıqtaǵı nasos stanciyasın qurıp beriwde ámeliy járdem soradıq. Sonday-aq, rayonımız jańadan shólkemlestiriliwine baylanıslı fermerlerge xızmet kórsetiwshi mashina traktor parkin ashıwǵa, awıl xojalıq texnikaların janar may menen támiyinlew ushın may quyıw shaqapshasın hámde sharwa azıqlıq eginlerin, palız ónimlerin mineral tógin menen azıqlandırıw ushın agroximiya shaqapshasın ashıwda ámeliy járdem soradıq. Múrájatımız úyrenilip, unamlı sheshimin tappaqta.
– Qaraqalpaqstan Respublikası Joqarǵı Keńesiniń Baslıǵı ótkergen ushırasıwda men rayonlıq Diagnostika orayın keńeytiӯ maqsetinde qosımsha imarat hám sırt elden medicina ásbap-úskenelerin satıp alıӯ ushın 1 milliard sum muǵdarında jeńillestirilgen kredit qarjıların ajıratıӯda ámeliy járdem sorap múrájat ettim, – deydi Shımbay rayonındaǵı “PINTOK” jeke menshik firması baslıǵı Rustem Dawletmuratov. – Meniń múrájatım unamlı sheshildi.
Qaraqalpaqstan Respublikası Joqarǵı Keńesiniń baspasóz xızmeti