Muǵallimler hám ustazlar kúnine baǵıshlandı

Usı jıl 30-sentyabr kúni Berdaq atındaǵı Qaraqalpaq mámleketlik akademiyalıq muzıkalı teatrında  1-oktyabr — Muǵallimler hám ustazlar kúnine baǵıshlanǵan saltanatlı májilis  bolıp ótti.

Qaraqalpaqstan Respublikası Joqarǵı Keńesiniń Baslıǵı M.Erniyazov jıynalǵanlardı kásiplik bayram menen qutlıqlap, Ózbekstan Respublikasmınıń Prezidenti Sh.Mirziyoevtiń Ózbekstan muǵallimleri hám ustazlarına jollaǵan bayram qutlıqlawın oqıp esittirdi hám elimizde Húrmetli Prezidentimiz basshılıǵında bilimlendiriw tarawın rawajlandırıw, taraw xızmetkerlerine qolaylı sharayatlar jaratıw boyınsha alıp barılıp atırǵan keń kólemli iygilikli isler haqqında aytıp ótti.

Atap ótilgenindey, búgingi qutlı bayramda  bárshemiz bilim úyretken, turmıs sabaǵın bergen jankúyer, pidayı muǵallim ustazlarımızǵa tereń húrmet kórsetip, shın júrekten tájim etemiz.  Búgingidey quramalı bir dáwirde balalarımızdı keleshekke tayarlap, salamat hám jetik insanlar etip kamalǵa jetkeriw, bul tálim-tárbiya tarawı oqıtıwshısı miynetiniń túp-tiykarın quraydı.

Ótken qısqa dáwirde mektepke shekemgi bilimlendiriw mákemeleriniń tarmaǵın keńeytiw, mektep bilimlendiriwinde 11 jıllıq sistemaǵa ótiw, akademiyalıq licey hám kásip-óner kolledjlerin optimallastırıw, mámleketlik emes bilimlendiriw xızmetin kórsetiw boyınsha keń kólemli jumıslar ámelge asırıldı.

Búgingi kúnde pútkil el-jurtımızdıń qızǵın qollap-quwatlawı menen mektep bilimlendiriwin rawajlandırıw ulıwmamilliy maqsetke, ulıwmaxalıqlıq háreketke aylanıp barmaqta. Ullı alımlarımız, belgili shayır hám jazıwshılarımızdıń atı menen atalatuǵın dóretiwshilik hám tábiyǵıy pánlerge qánigelestirilgen mektepler, «Temurbekler mektebi», Prezident mektepleri sıyaqlı pútkilley jańa úlgidegi zamanagóy hám innovaciyalıq bilimlendiriw orayları áne usı maqsetke xızmet etedi. Bilimlendiriw hám tárbiya máselesine kompleksli qatnas jasay otırıp, baqsha bilimlendiriwi menen birge joqarı bilimlendiriw sistemasın da úzliksiz rawajlandırıwǵa ayrıqsha itibar qaratılmaqta.

Bıyılǵı jıldıń ózinde 49 balalar baqshasında 90 milliard sumlıq, 95 ulıwma bilim beriw mektebinde 167 milliard sumlıq qurılıs-ońlaw jumısları, 4  balalar muzıka hám kórkem óner mektebinde, 7 sport obektinde 52,2  milliard sumlıq qurılıs jumısları ámelge asırılǵan bolsa, Nókis mámleketlik pedagogikalıq institutında,  Tashkent pediatriya medicina institutınıń Nókis filialında ulıwma nırqı 141 milliard sumnan zıyat qurılıs-ońlaw jumısları alıp barılmaqta. Jergilikli byudjet esabınan ulıwma bilim beriw mektepleriniń materiallıq-texnikalıq bazaları menen infrastrukturasın  bekkemlew maqsetinde 150,5 milliard sum qarjı ajıratıldı. Sonı ayrıqsha atap ótiwimiz kerek,  búgingi kúni oqıwshı-jaslarımız bir qatar tabıslardı qolǵa kirgizip kelmekte. Atap aytqanda, Qubla Afrika mámleketinde ótkerilgen xalıqaralıq matematika jarısında shımbaylı Damir Dilmuratovtıń qola medalın jeńip alıwı, gúres túrleri boyınsha Qazaqstanda ótkerilgen Jáhán chempionatında  qaraózekli Jalǵas Berdimuratovtıń jeńimpaz bolıp, kelesi jılı Tokio qalasında bolıp ótken Olimpiada oyınlarına jollama alıwı,  dzyudo boyınsha Tashkent qalasında bolıp ótken xalıqaralıq jarısta ámiwdáryalı Sharapatdin Baltabaevtıń birinshi orındı iyelewi, qılıshpazlıq boyınsha Oraylıq Aziya chempionatında Nókis qalasınan Zaynab Dayıbekova altın medaldı, Aysulıw Usnatdinovanıń qola medalın jeńip alıwı, sambo boyınsha Hindstan mámleketinde bolıp ótken Aziya chempionatında Nókis rayonınan Aman Ǵanievtıń altın medaldı jeńim alıwı - bul hár birimiz maqtanısh etetuǵın waqıyalardan bolıp tabıladı.

Kásiplik bayram múnásibeti menen elimizde bilimlendiriw tarawın rawajlandırıw, tereń bilim hám zamanagóy kásip ónerge iye maman kadrlardı tayarlaw jumıslarına qosqan múnásip úlesi, erkin pikirleytuǵın, talantlı, salamat hám bárkamal áwladtı tárbiyalaw, olardı watansúyiwshilik, milliy hám ulıwmainsanıylıq qádiriyatlarǵa húrmet ruwxında tárbiyalawdaǵı úlken xızmetleri ushın  bir topar muǵallim hám ustazlar Ózbekstan hám Qaraqalpaqstan Respublikalarınıń húrmetli ataqları, orden hám medalları, «Watan pidayısı» kókirek nıshanı menen sıylıqlanǵan edi. Ilajda taraw pidayılarına mine usı mámleketlik sıylıqlar saltanatlı jaǵdayda tapsırıldı.

Sıylıqlanǵanlar atınan Shımbay rayonındaǵı 14-sanlı ulıwma bilim beriw mektebiniń muǵallim, «Mehnat shuhrati» ordeniniń iyesi  G.Romanova, Nókis qalasındaǵı 46-sanlı qánigelestirilgen ulıwma bilim beriw mektebiniń muǵallimi, «Shuhrat» medalınıń iyesi K.Eshimbetova, Ájiniyaz atındaǵı Nókis mámleketlik pedagogikalıq institutınıń kafedra baslıǵı, Qaraqalpaqstan Respublikasına miyneti sińgen xalıq bilimlendiriw xızmetkeri Sh.Yuldasheva, sonday-aq, Ózbekstan Milliy akademiyalıq teatrınıń aktrisası, Ózbekstan Respublikası xalıq artisti G.Zakirova shıǵıp sóylep,   bilimlendiriw tarawına qaratılıp atırǵan ayrıqsha itibar ushın Prezidentimizge sheksiz minnetdarshılıq bildirdi.

Saltanatlı májilis respublikamız kórkem óner sheberleri hám jas atqarıwshılarınıń koncert baǵdarlaması menen juwmaqlandı.