Nókiste gúller bayramı

Nókis qalasınıń oraylıq maydanında Gúller bayramı bolıp ótti. Qaraqalpaqstan Respublikası Joqarǵı Keńesi menen Ministrler Keńesiniń baslaması menen ótkerilgen ilajda ministrlikler, kárxana, mákeme, shólkemler, oqıw orınları ózlerinde jetilistirip atırǵan gúller, sonday-aq, gúlden tayarlanǵan júzden aslam dekaraciyaları menen qatnastı. Birinshi márte ótkerilgen bul bayram qalamız turǵınları menen miymanlarda ayrıqsha tásir qaldırdı. Bunı olardıń kewil-keypiyatınan da ańlawımızǵa boladı. Haqıyqatında, gúller hámiyshe gózzallıq, quwanısh hám tınıshlıqtıń simvolı bolıp kelgen. Insanlar ózleriniń quwanıshlı kúnlerinde biri-birine gúl sawǵa etedi. Írǵalısqan shıraylı gúller qorshaǵan ortalıqtı gózzallıqqa bóleydi. Respublikamız paytaxtı menen rayon orayları jıldan-jılǵa abadanlasıp, rawajlanıp barmaqta. Sońǵı jılları qıyabanlarımız menen kóshelerimizge egilgen túrli reńdegi gúller kimniń bolsada dıqqatın ózine tartadı. Olardıń ishinde jergilikli, sonıń menen birge, sırt ellerden alıp kelingen gúllerdi ushıratıwımızǵa boladı. Ásirese, úy sharayatında ósirilip atırǵan gúller shańaraqqa sán-saltanat baǵıshlap ǵana qoymastan, insan salamatlıǵına da óziniń shıpabaǵısh qásiyeti menen tásir etedi. Bunı usı kúni shólkemlestirilgen gúller yarmarkasınan da kóriwimizge boladı. -Bunday ilajlardıń ótkeriliwi insanlardıń gúl ósiriwge bolǵan ıqlasın arttırıp, olardı gózzallıqqa talpındıradı,-deydi Ellikqala rayonınan Janibek Babajanov.-Bayramǵa ózlerimizde jetistirilgen eliwden aslam túrdegi gúllerimiz benen qatnasıp atırmız. Xalqımız olardı ayrıqsha qızıǵıwshılıq penen satıp almaqta. Bunday bayramlar dóretiwshi insanlarǵa ilham-yosh baǵıshlaydı. Jas súwretshiler tárepinen ana tábiyatımız, gúller tuwralı sızǵan súwretleriniń bir-birinen shıraylı ekenligin kóriwimizge boladı. Gúller bayramı respublikamız kórkem óner sheberleriniń atqarıwındaǵı koncert baǵdarlaması menen juwmaqlandı. Ilajǵa Qaraqalpaqstan Respublikası Joqarǵı Keńesiniń Baslıǵı M.Erniyazov qatnastı.