Qaraqalpaqstan Respublikası Joqarǵı Keńesi menen Ministrler Keńesiniń medicina xızmetkerlerine bayram qutlıqlawı
2030
Húrmetli shıpakerler hám medicina tarawı xızmetkerleri!
Bársheńizdi hár jılı elimizde keń túrde belgilenip kiyatırǵan kásiplik bayramıńız – «Medicina xızmetkerleri kúni» menen Qaraqalpaqstan Respublikası Joqarǵı Keńesi hám Ministrler Keńesi atınan qızǵın qutlıqlaymız.
Sonı ayrıqsha atap ótiwimiz tiyis, xalqımız Sizlerdi ózleriniń súyenishi retinde tán alıw menen birge, júreklerge úmit, muńlı kózlerge mádet, sınıq kewillerge quwat baǵıshlaytuǵın ilahiy kásip iyeleri sıpatında ayrıqsha qádirleydi hám húrmet etedi.
Insan qádir-qımbatın ulıǵlaw hám onıń salamatlıǵın qorǵaw máselesi mámleketlik siyasat dárejesine kóterilgen elimizde densawlıqtı saqlaw tarawına qaratılıp atırǵan joqarı itibar medicinalıq xızmet kórsetiwdiń sapasın túp-tiykarınan jaqsılawda, dúnya medicinası ámeliyatında erisilgen jetiskenlikler menen aldınǵı texnologiyalardı keńnen engiziwde, maman kadrlar tayarlawda, mámleketlik emes sektordı rawajlandırıwda, tarawdıń materiallıq-texnikalıq bazasın bekkemlewde, xalıqqa sapalı dári-dármaqlar jetkerip beriwde áhmiyetli orın tutpaqta.
Bunda álbette, Húrmetli Prezidentimiz tárepinen tarawǵa baylanıslı bir qatar áhmiyetli Párman hám Qararlardıń qabıl etiliwi, mámleketlik baǵdarlamalardıń islep shıǵılıwı elimizde xalıqtıń salamatlıǵın, analıqtı hám balalıqtı qorǵawda, medicinalıq xızmettiń sapasın jáne de jetilistiriwde áhmiyetli sanaladı.
Tarawda alıp barılıp atırǵan keń kólemli reformalar nátiyjesinde búgingi kunde birlemshi medicinalıq-profilaktika, tez hám qánigelestirilgen medicinalıq járdem kórsetiwdiń sapasın jaqsılaw, xalıqaralıq shólkemler menen birgelikte úlken joybarlar tiykarında analar hám balalardıń salamatlıǵın bekkemlew, olar arasında ushırasıp atırǵan keselliklerdiń aldın alıw boyınsha ámelge asırılıp atırǵan ilajlar jańa basqıshlarǵa kóterilip barmaqta.
Sonıń menen birge, qıstawlı medicinalıq járdem kórsetiw sistemasın jedel rawajlandırıw, xalıq medicinası tarawın tártipke salıw, sociallıq járdemge mútáj insanlarǵa medicinalıq-sociallıq járdem kórsetiwdiń sapasın hám nátiyjeliligin arttırıw búgingi kúndegi eń áhmiyetli wazıypalardan bolıp tabıladı.
Bársheńizdiń xabarıńız bar, elimizde hár jıl sayın medicina tarawınıń materiallıq-texnikalıq bazasın bekkemlew, taraw xızmetkerleri hám xalqımız ushın qolaylı sharayatlar jaratıp beriw mámleketimizdiń dıqqat-itibarında turǵan tiykarǵı máselelerden sanaladı. Mine, bıyılǵı jıldıń ózinde investiciya baǵdarlamasına muwapıq 12 densawlıqtı saqlaw obektinde 61 milliard swmlıq, al, jergilikli byudjet esabınan 34 obektte 32 milliard swmlıq qurılıs hám iri ońlaw jumısları ámelge asırıldı. Sonıń ishinde Nókis qalası, Moynaq, Qanlıkól, Ellikqala hám Nókis rayonlarında 7 densawlıqtı saqlaw obekti jańadan qurılıp, paydalanıwǵa berildi. Sonday-aq, Tashkent pediatriya medicina institutı Nókis filialınıń jańa oqıw binasında 38 milliard swmnan aslam qarjı esabınan qurılıs jumısları alıp barılmaqta.
Usılar menen bir qatarda, respublikalıq emlew mákemelerin hám rayonlıq medicina birlespelerin zamanagóy ásbap-úskeneler menen támiyinlew maqsetinde jergilikli byudjet esabınan 12 milliard swmnan aslam qarjı ajıratıldı.
Qalaberse, hár jıl sayın tarawdıń bir qatar pidayılarına mámleketlik sıylıqlardıń tapsırılıwı - bul Sizlerge degen ayrıqsha itibar hám ǵamqorlıqtıń, joqarı isenimniń kórinisi sanaladı.
Buǵan juwap retinde hár birińiz xalqımızdıń biybaha baylıǵı bolǵan insan salamatlıǵın qorǵawda, keselliklerdi erte anıqlawda hám aldın alıwda, salamat turmıs tárizin qáliplestiriwde belsendilik kórsetesizler, dep bekkem isenemiz.
Húrmetli medicina tarawı xızmetkerleri!
Sizlerdi kásiplik bayramıńız benen jáne bir márte qızǵın qutlıqlap, bársheńizge bekkem densawlıq, shańaraqlarıńızǵa amanlıq, xalıq iygiligi jolındaǵı oǵada juwapkershilikli, mashaqatlı hám maqtanıshlı jumıslarıńızda tabıslar tileymiz!
Qaraqalpaqstan Respublikası Joqarǵı Keńesiniń Baslıǵı M.Erniyazov
Qaraqalpaqstan Respublikası Ministrler Keńesiniń Baslıǵı Q.Sariev