Respublikamız xalqına Jańa jıl qutlıqlawı

  Qádirli watanlaslar! Áziz doslar! Sizlerdi insanlar qálbine ózgeshe quwanısh, ilham-yosh, úmit hám isenim baǵıshlap, bársheni jáne de úlken dóretiwshilik islerge ruwxlandırıp atırǵan qutlı áyyyam — Jańa jıl bayramı menen qızǵın qutlıqlayman. Óziniń náwpir suwları, mol bereketi, bálent qırmanları hámde este qalarlıqtay umıtılmas máwritleri menen ajıralıp turatuǵın 2019-jılǵa názer taslar ekenbiz, «Jedel investiciyalar hám sociallıq rawajlanıw jılı»nda keń kólemli jumıslardıń, sociallıq-ekonomikalıq turmısımızdıń barlıq tarawlarında turaqlı rawajlanıwlardıń, xalqımız tárepinen qolǵa kirgizilgen joqarı tabıslardıń gúwası bolamız. Ásirese, Húrmetli Prezidentimizdiń basshılıǵında barlıq tarawlarda alıp barılıp atırǵan reformalar, anıq maqset hám wazıypalardı ózinde jámlegen párman hám qararlar, baǵdarlamalar turmısımızda áhmiyetli orın tutpaqta. Xalqımızdıń iygiligi jolında xızmet etetuǵın bir neshe iri kárxanalardıń, sociallıq-mádeniy obektlerdiń iske túsiwi, infrastrukturnıń jańalanıwı elimizge shın mánisindegi jańalanıw nápesin alıp kelip, xalqımızdı turmıstan razı qılıwǵa tiykar bolmaqta. Bir ǵana Moynaq rayonı mısalında aytatuǵın bolsaq, «Moynaq parlaq tekstil», «Moynaq akva sanaat» kárxanalarınıń iske túskeni, Mádeniyat sarayınıń zamanǵa say iri ońlawdan shıǵarılǵanı, futbol stadionı, Ashıq teatr, «Aral teńizi tariyxı» muzeyi, mámleketlik xızmetler agentligi rayonlıq bólimi jańa imaratınıń, kóp qabatlı turaq jaylardıń paydalanıwǵa tapsırılǵanı kewillerge maqtanısh sezimlerin baǵıshlaydı. Bunday iri kólemdegi ózgerisler menen jańalanıwlardı Nókis qalası, Qanlıkól, Bozataw hám basqa da rayonlarımız mısalında kóplep ushıratıwımız múmkin. Sonı ayrıqsha atap ótiwimiz tiyis, Húrmetli Prezidentimizdiń respublikamızǵa bolǵan hár bir saparı tariyxıy áhmiyetke iye ózgerisler menen jańalanıwlarǵa tiykar bolmaqta. Juwmaqlanıp atırǵan jıldıń 20-21-avgust kúnleri Qaraqalpaqstanǵa bolǵan saparı tiykarında 14 trillion 805 milliard sumlıq 697 joybardı ámelge asırıw, usınıń esabınan 14 mıńnan aslam jańa jumıs ornın jaratıw wazıypası belgilengen bolsa, sonnan ótken qısqa waqıt ishinde 455 milliard sumlıq 111 joybar ámelge asırıldı. Sonday-aq, juwmaqlanıp atırǵan jılda ekonomikamızdıń tiykarǵı baǵdarlarınan bolǵan isbilermenlikti rawajlandırıw, kishi biznes subektlerin qollap-quwatlaw maqsetinde mámleketlik baǵdarlamalar tiykarında 312 milliard swmnan aslam jeńilletilgen kredit qarjıları ajıratıldı. Elimizde isbilermenlerdi hár tárepleme qollap-quwatlaw baǵdarında alıp barılıp atırǵan keń kólemli jumıslar nátiyjesinde xalıqtıń usı tarawdaǵı bántligi 75 procentti, olardıń aymaqlıq jalpı ishki ónimdegi úlesi 50 procentti, xızmetler kórsetiw, sawda, qurılıs hám basqa da tarawlardaǵı úlesi 50-60 procentti quramaqta. Juwmaqlanıp atırǵan jıl sharwashılıq tarawında da unamlı ózgerislerge, jańalanıwlarǵa bay jıl boldı, dewge tolıq tiykarlar bar. Ásirese, Húrmetli Prezidentimizdiń arnawlı qararı tiykarında Bozataw, Qońırat, Moynaq hám Taxtakópir rayonlarınıń usı tarawǵa, sonday-aq, basqa da qala hám rayonlarımızdıń tarawlarǵa qánigelesiwi ekonomikamızdıń jáne de bekkemleniwinde, xalqımızdıń jasaw sharayatların taǵı da jaqsılawda, isbilermenlikti rawajlandırıwda ayrıqsha orın iyeleydi. Jáne bir áhmiyetli tárepi sonda, Húrmetli Prezidentimizdiń baslaması menen Aral teńiziniń átirapında ekologiyalıq jaǵdaydı jaqsılaw maqsetinde ótken máwsimde 1 million 125 mıń gektarǵa shamalas jer maydanı tayarlanıp, 500 mıń gektarǵa shólge shıdamlı ósimlikler egilgen bolsa, bıyılǵı máwsimde 700 mıń gektarǵa egiw reje qılınıp, bul baǵdardaǵı iygilikli isler elimizdiń barlıq orınlarınan kelgen mexanizator hám isshilerdiń qatnasında qızǵın alıp barılmaqta. Húrmetli zamanlaslar! Elimizdiń siyasiy tariyxında áhmiyetli orın tutatuǵın waqıyalardıń biri – bul juwmaqlanıp atırǵan jıldıń 22-dekabr kúni bolıp ótken Ózbekstan Respublikası Oliy Majlisi Nızamshılıq palatasına, Qaraqalpaqstan Respublikası Joqarǵı Keńesine, xalıq deputatları qalalıq hám rayonlıq Keńeslerine bolıp ótken saylawlar bolıp tabıladı. Eń áhmiyetlisi, bul saylawlarda xalqımız ózleriniń siyasiy belsendiligi menen ajıralıp, huqıqıy bilimleriniń jetiliskenin, dúnyaqarası keńeyip atırǵanın, eń tiykarǵısı elimizdiń erteńgi kúnine degen juwapkershilik seziminiń artqanın jáne bir márte dálilledi. Qádirli watanlaslar! Elimizde baslanıp atırǵan Jańa jılda da xalqımızdıń turmıs dárejesin jaqsılaw, insanlardı qıynap atırǵan másele hám mashqalalardı úyme-úy júrip úyreniw, olardı unamlı sheshiw, xalıqtıń bántligin támiyinlew, jaslarımızdı qollap-quwatlaw, isbilermenlikti jedel rawajlandırıw, tarawlarda júrgizilip atırǵan reformalardı bunnan bılay da tereńlestiriwge múnásip úles qosıw sıyaqlı bir qatar máseleler tiykarǵı wazıypalarımızdan bolıp qala beredi. Sizlerdi jáne bir márte Jańa jıl bayramı menen qızǵın qutlıqlap, bársheńizge bekkem densawlıq, jumıslarıńızda jaynaǵan tabıslar tileymen! Jańa jıl hár bir shańaraqqa amanlıq, bereket, quwanısh hám shadlıq alıp kelgey! Elimiz tınısh, xalqımız hámiyshe aman bolsın! Jańa jılıńız bársheńizge qutlı múbárek bolsın, áziz zamanlaslar! M.ERNIYAZOV, Qaraqalpaqstan Respublikası Joqarǵı Keńesiniń Baslıǵı.