Jumıslar juwapkershiligi janlanajaq

6-iyul kúni Ózbekstan Respublikası Bas ministriniń orınbasarı, Respublika Hayal-qızlar komiteti baslıǵı Elmira Bositxonova Ózbekstan Respublikası Prezidenti SH.Mirziyoev tárepinen Oliy Majlis Senatınıń jigirmalanshı jalpı májilisinde belgilep berilgen wazıypalardıń orınlanıwın hám Hayal-qızlar komiteti xızmetiniń ápiwayı hám xalıqshıl bolıwın támi­yinlew, usı taraw jumısların sistemalı shólkemlestiriw, xalıq, ásirese, hayal-qızlardıń jasaw sharayatın jaqsılawdaǵı tásirin kúsheytiw maqsetinde respublikamızda boldı. Mámleketimizde hayal-qızlardıń sociallıq-siyasiy hám sociallıq belsendiligin arttırıw, olardıń hár qıylı tarawlarda ózleriniń qábilet hám imkaniyatların júzege shıǵarıwı ushın sharayatlar jaratıw, huqıq hám nızamlı máplerine sózsiz ámel etiliwin támiyinlew, analıqtı hám balalıqtı hár tárepleme qollap-quwatlaw, sonday-aq, shańaraq institutın bekkemlew boyınsha keń kólemli jumıslar ámelge asırılmaqta. Hayal-qızlardı hár tárepleme qollap-quwatlaw, olar menen maqsetli islerdi shólkemlestiriw, shańaraqlarda ruwxıy ádep-ikramlılıq ortalıǵın bekkemlewge tosqınlıq etip atırǵan mashqala hám kemshiliklerdi saplastırıw maqsetinde bir qatar ilajlar ámelge asırılmaqta. BERUNIYLILERGE SÁTLI KELGEN SAPAR Respublikamızǵa bolǵan saparı ushın dúzilgen «Jol karta»ǵa muwapıq, Ózbekstan Respublikası Bas ministriniń orınbasarı, Respublika Hayal-qızlar komitetiniń baslıǵı Elmira Bositxonova hám Qaraqalpaqstan Respublikası Ministrler Keńesi Baslıǵınıń orınbasarı, Respublika Hayal-qızlar komitetiniń baslıǵı Z.Ibragimovalar qatnasıwında dáslep Beruniy rayonındaǵı Jaslar orayında Beruniy, Tórtkúl hám Ellikqala rayonı hayal-qızları menen kóshpeli qabıllaw ótkerildi. Onda usı 3 rayonnan kelgen hayal-qızlardıń tilek-ótinishleri, mashqalaları tıńlanıp, nızam sheńberinde úyrenip shıǵıldı. Ushırasıw sońında tiyisli taraw basshılarına múrájatlar boyınsha operativ túrde jumısshı topar dúzip, kóterilgen máselelerdiń sheshimi boyınsha Ózbekstan Respublikası Hayal-qızlar komitetine maǵlıwmat beriliwi tapsırıldı. Usı kúnniń ózinde múrájatlar sheshimin tawıp, Beruniy rayonında sociallıq qorǵawǵa mútáj, awır sharayatta jasap atır­ǵan, mayıplılıǵı bolǵan, turaq jayǵa mútáj hayal-qızlarǵa jańa úylerdiń giltleri saltanatlı túrde tapsırıldı. — Mine, búgin beruniyli 18 kem támi­yinlengen, baǵıwshısın joǵaltqan, jal­ǵız ózi erjetpegen perzentlerin tárbiyalap atırǵan, jáne de mayıp perzentine bánt bolıp, oǵan ayrıqsha kútim menen qarap atırǵan analar sheksiz quwanıshqa bólenip atır. Olar arasında bir neshe jıllar dawamında ijarama-ijara júrip, ózleriniń úylerine iye bolmaǵan hayal-qızlarımız da bar bolıp, búgin olar zamanagóy, barlıq qolaylılıqlarǵa iye bolǵan óz jaylarına kóship ótti. Hayal-qızlar komitetiniń járdemi menen baslanǵısh tóleminiń tólep berilgenliginen hám mámleketimizde hayal-qızlardı sociallıq jaqtan qorǵaw boyınsha iske asırılıp atırǵan bunday insanıylıq islerden sheksiz minnetdar ekenligin olardıń hár birinen esitip, gúwası bolmaqtamız, -deydi Beruniy rayonlıq Hayal-qızlar komitetiniń baslıǵı Roza Masharipova. Paytaxtımızdaǵı Jas tamashagóyler teatrında Ózbekstan Hayal-qızlardı qollap-quwatlaw jámiyetlik qorı tárepinen ajıratılǵan medicinalıq reabilitaciya quralları, yaǵnıy, 70 arbasha, 44 hasa tayaq, 4 xodunok, 4 kózi ázziler ushın arnawlı hasa, 4 qoltıq tayaq, 4 tirsekli hasa tayaq respublikamızdaǵı imkaniyatı sheklengen hayal-qızlarǵa tapsırıldı. Bunnan soń qalalıq hám rayonlıq hayal-qızlar komiteti baslıqları, mákan puqaralar jıyınlarındaǵı qánigeler, turmıslıq tájiriybesi mol qáyin eneler, jeńillikli úy alıw baxtına miyasar bolǵan hayallar hám hayal-qızlar komiteti baslanǵısh shólkemleriniń baslıqlarınıń qatnasıwında seminar-trening ótkerildi. Onda Ózbekstan Respublikası Bas ministriniń orınbasarı, Respublika Hayal-qızlar komitetiniń baslıǵı E.Bositxonova kún tártibindegi máseleler bo­yınsha bayanat oqıdı. Óz bayanatında Qaraqalpaqstan Respublikası Hayal-qızlar komitetiniń jumısları Ózbekstan kólemindegi basqa wálayatlarǵa salıstır­ǵanda aldınǵı qatarda ekenligi, bunda respublika basshılarınıń qollap-quwatlawı hám qosshılarınıń záberdes ekenligi úlgi retinde aytıp ótildi. Seminar barısında shańaraq ortalıǵın sawallandırıwǵa úles qosıp atırǵan shańaraqlar menen jumıs alıp barıwshı qánigelerdi xoshametlew, óz-ara shańaraqlıq múnásibetlerdi bekkemlep atırǵan belsendiler, keywanılar menen qáyin eneler de dıqqattan shette qalmadı. Qaraqalpaqstan Respublikası Hayal-qızlar komitetiniń baslıǵı Z.Ibragimova tárepinen Taxtakópir rayonı «Taxtakópir» awıl puqaralar jıyınınan úlgili qáyin ene Aynagúl Saparbaeva, Nókis rayonınan úlgili qáyin ene Gúlnara Qurbaniyazova, Xojeli rayonı «Kún nurı» mákan puqaralar jıyınınıń qánigesi Gúlxan Babaeva, Nókis qalasınan «Nawqan baǵ» mákan puqaralar jı­yınınıń qánigesi Zamira Aytbaevalarǵa hár tárepleme úlgili xızmetleri ushın «Alǵısnama» hám qımbat bahalı sawǵalar saltanatlı jaǵdayda tapsırıldı. *** Berdaq atındaǵı Qaraqalpaq mámleketlik universitetiniń ruwxıylıq zalında búgingi kúnniń talabınan kelip shıqqan halda Zulfiya atındaǵı mámleketlik sıylıqtıń iyeleri, usı sıylıqqa talaban qızlar, tárbiyası awır imkaniyatı sheklengen qızlar menen júzbe-júz sáwbetlesiw ótkerildi. Onda qızlardı sociallıq-siyasiy belsendilikke tartıw, juwapkershiligin kúsheytiw, mashqalaların sheshiwge járdemlesiw máseleleri boyınsha Ózbekstan Respublikası Hayal-qızlar komitetiniń Baspasóz xatkeri — «Dugonalar» jurnalınıń Bas redaktor orınbasarı Gúljamal Asqarova sózge shıqtı. Ol óz sózinde sıylıqlanǵanlardı, al, endi sıylıq alıwǵa talaban bolıp júrgen qızlardı, aymaqtaǵı sociallıq járdemge mútáj, imkaniyatı sheklengen, belsendi bolmaǵan jas qızlardı «Qızlarjan» klubı átirapına birlestiriw, olar arasında óz-ara doslıq múnásibetlerin kúsheytiw kerekligin eskertti. Soń sıylıqqa miyasar bolǵan qaraqalpaqstanlı bárshe qızlardı birme-bir atap, olardıń tabısları hám búgingi kúndegi jumıs processleri menen jıy­nal­ǵanlardı tanıstırıp ótti. Óz gezeginde laureatlar atınan G.Aqımbetova hám Z.Palwaniyazovalar sózge shıǵıp, ózlerine bildirilgen isenim hám juwapkershilikke múnásip bolatuǵınlıǵın, elimiz basshısınıń hayal-qızlarǵa qarat­qan itibarına ılayıq xızmet atqaratuǵınlıǵın isenimli túrde óz pikirleri menen bayan etti. *** Hayal — isbilermen, oqıtıwshı, ekonomist, siya­satshı, mádeniyat hám kórkem óner xızmetkeri. Eń baslısı, olar áwladlardı tutastırıwshılar bolıp tabıladı. Jámiyetimizdiń ilgerilewi hám sociallıq jaǵdayı menen jaqınnan tanısıw maqsetinde onıń qatnasıwshıları bolǵan hár qıylı tarawlarda jemisli miynet etip atırǵan belsendi hayal-qızlar, yaǵnıy, barlıq siyasiy partiyalardıń «Hayallar qanatı» basshıları, «Nuranıy» qorınıń aǵzaları bolǵan hayallar, Jaslar awqamınıń qızları menen de universitette ushırasıw shólkemlestirildi. Onda hayal-qızlardıń jámiyettegi roli, siyasiy belsendiligi, shańaraqta ruwxıy ortalıqtı jaqsılaw, bekkemligin támiyinlew, perzent tárbiyası haqqındaǵı máseleler bo­yınsha pikirler ortaǵa taslandı. — Hayal-qızlar turmısı, ámelge asırılǵan jumıslar, jetiskenlikler haqqında tolıp-tasıp ayta alamız. Názerimde, hayal-qızlar menen jáne de tıǵızıraq jaqınlasıwımız, birigiwimiz talap etilmekte. Imkaniyatı bolǵanınsha, sizlerdiń hár bir miynetińiz bizlerge jetip kelse biz, álbette, quwanamız,-dedi E.Bositxonova. Mámleketimiz basshısı tárepinen hayal-qızlarǵa bildirilgen ayrıqsha isenim, sociallıq-siyasiy turmıstaǵı belsendiligin art­tırıw, saylaw aldı háreketlerin muwapıqlastırıw, aldaǵı waqıtları bolıp ótetuǵın saylawlarda hayal-qızlardıń belsendiligin kúsheytip, olar arasınan múnásip talabanlardı usınıw hám tayarlaw wazıypaları aldımızda turǵanlıǵın atap ótti. Ózbekstan Respublikası Bas ministriniń orınbasarı, Respublika Hayal-qızlar komitetiniń baslıǵı E.Bositxonovanıń pikirlerin maqullap hám qollap-quwatlap Ózbekstan Qaharmanı Onesiya Saytova, universitettiń hayal-qızlar komiteti baslanǵısh shól­keminiń baslıǵı In­jayım Seytnazarova, universitet oqıtıwshısı, ekonomika ilimleriniń kandidatı Gúlnara Ótemuratova, Qońırat rayonlıq hayal-qızlar komitetiniń baslıǵı Jámila Ámetovalar sózge shıqtı. Álbette, bunda hayal-qızlarımız ózleriniń ámeliy isleri menen ózin kórsetiwi, hár bir aymaqqa erinbesten barıp, ózin tanıstırıwı, maqsetli ilajlardı shólkemlestiriwi kerekligi ayrıqsha tapsırma retinde aytıldı. *** Prezidentimiz tárepinen alǵa súrilgen «Bes unamlı baslama»nıń hayal-qızlar bántligin támiyinlewge baylanıslı besinshi baslaması universitette qalayınsha basshılıqqa alınǵanlıǵın kóriw maqsetinde ilaj qatnasıwshıları oqıw ornınıń jataqxanasına qaray jol aldı. Miymanlar «Qızlarjan» klubı, «SHeber qollar» dógeregi, «SHańaraq másláhát orayı», «Milliy kesteshilik» hám «Qol óneri» dógerekleriniń hár biriniń jumısları menen jaqınnan tanıs­tı. Bul jerde qızlardıń dógerek jumıslarınan maqsetli paydalanıwı ushın barlıq qolaylılıqlar hám imkaniyatlar jaratılǵanlıǵınıń gúwası boldı. — Qaraqalpaq zergerlik naǵısları kózdiń jawın alıp turıwınıń sebebi hám ózgesheligi nede eken desem, qızlarımızǵa bulardı muqıyatlap, erinbesten úyretiw dárejesi kúshli eken. Endi ańladım,-deydi E.Bositxonova universitettiń qurılıs fakulteti 4-arxitektura qánigeliginiń studenti Gáwhar Ázerbaevanıń qol miynetinen dórelgen ónerine joqarı bahasın berip. *** Ázelden xalqımızda shańaraq — muqaddes esaplanǵan. Mámleketimiz Prezidenti shańaraqlardı bekkemlewge ayrıqsha itibar qaratıp atırǵan bir payıtta ayı­rım shańaraqlarda kewilsizliklerdiń kelip shıǵıwı ashınarlı jaǵday, álbette. Ilaj barısında miymanlar Qaraqalpaqstan Respublikası Hayal-qızlar komiteti janındaǵı «Hayallar sociallıq-beyimlesiw orayı»nda bolıp, bul jerdegi sharayatlar menen tanıstı. Aytıp ótiw orınlı, bul oray Ózbekstan Respublikası Prezidentiniń 2018-jıl 2-iyul kúngi «Sociallıq reabilitaciya etiw hám beyimlestiriw, sonday-aq, shańaraqlıq-turmıslıq zorlıq isletiwdiń aldın alıw sistemasın jetilistiriw ilajları haqqındaǵı» 3827-sanlı qararı tiykarında ashılıp, búgingi kúnde oray tárepinen hár qıylı mashqalası bar sociallıq qorǵawǵa mútáj hayallarǵa ámeliy járdemler kórsetilmekte. Bul jerde bir qatar hayal-qızlardı Ózbekstan Respublikası Hayal-qızlar komitetiniń baslıǵı E.Bositxonova qabıllap, olardıń múrájatların tıńladı. Jumısqa qayta tikleniw, baqsha máselesi hám mayıp perzentin baǵıw ushın mámleket tárepinen beriletuǵın materiallıq jeńillikler, járdemler hám basqa da máseleler bo­yınsha múrájat etken hayal-qızlar jaqın kúnlerde múrájatı unamlı sheshimin tabatuǵınlıǵına isenimi arttı hám minnetdarshılıǵın bildirdi. *** Húrmetli Prezidentimiz tárepinen aytılǵan «Eger hayal, ana baxıtlı bolsa, shańaraq baxıtlı boladı, shańaraq baxıtlı bolsa, pútkil jámiyet, mámleket bekkem hám turaqlı boladı» degen pikirleri áyne turmıslıq tájiriybeniń kórinisi ekenliginen derek beredi. Paytaxtımızdaǵı 8-sanlı shańaraq poliklinikasında bolǵan ushırasıwda Ózbekstan Respublikası Hayal-qızlar komitetiniń baslıǵı E.Bositxonova «Hayallar másláhátxanası»nıń jumısı, bul jerge biriktirilgen shıpakerdiń wazıypası nelerden ibarat ekenligi, diywalǵa ildirilgen «Xabarnama»nıń nadurıs islengenligi, jumıslar talapqa say shólkemles­tirilmegenligi, hámiledar hayallardı er adamlarǵa aralastırmastan óz aldına kútip otıratuǵın orın bolıw kerekligi, olar bul jerge kelip kóp waqıt gezek kútip otırmawı, eger soǵan tuwrı kelip qalsa olar ushın shártli túrde chay, kofe beriw xızmetleri kórsetilip, olar tar­qatpa materiallar menen tanısıp, bilimlerin bayı­tıwı tiyis ekenligin qatań birme-bir túsindirip berdi. Ana-bala salamatlıǵın bekkemlew, hámiledar hayallardı waqtında medicinalıq tekseriwlerden ótkeriw hám olardıń hár biriniń turmıs sharayatın úyrenip shıǵıw máseleleri qatań tapsırıldı. Soń hápteniń hár ekinshi kúni hámiledarlardı qabıllaw, bul boyınsha hár hápte juwmaǵı boyınsha monitoring islew, ulıwma respublikada bul baǵdardaǵı sistemanı jaqsı jol­ǵa qoyıw kerekligin es­kert­ti. Poliklinikadaǵı «Qızlar salamatlıǵı» xanası menen tanısar eken, bul jerde de jaǵday ashınarlı awhalda ekenligine kúyindi. Jumıslardı jaqsı shólkemlestiriw ushın birinshiden, qızlar arasında puqta medicinalıq tekseriwlerdi ótkeriw, ekinshiden, mekteplerde volonter (kewilli) qızlardı qamtıw, úshinshiden, keselligi barlardı sawallandırıw, yaǵnıy, hesh bir qız itibardan shette qalmawı shárt, dep tapsırma berdi. Sonıń menen birge, hápteniń hár juma kúni mekteplerde ilajlar ótkeriw, máhállelerde «Salamatlıq mektebi»niń aǵzalarınıń iskerligin kúsheytiw kerekligi aytıldı. «QARAQALPAQ KIYIMLERINIŃ HÁR BIRI KÓRKEM ÓNER DÚRDANASÍ» dep Ózbekstan Respublikası Bas ministriniń orınbasarı, Respublika Hayal-qızlar komitetiniń baslıǵı E.Bositxonova tárepinen joqarı baha berilgen bul pikirler Qaraqalpaqstan Respublikası «Zıyada-Nur» Isbilermenlik hám bántlikti támiyinlew oqıw orayında aytıldı. Sebebi, bul jerge kire beristegi hár túrli reńdegi tawarlarǵa milliy naǵıslarımız benen bezetilip tigilgen kóylekler erksiz dıqqatıńdı tartadı. Búgin baslı dıqqat-itibar orayında turǵan máselelerdiń biri — bul hayal-qızlardıń, anıǵıraǵı úyde otırǵan hayal-qızlardıń bántligin támiyinlew hám olardı isbilermenlikke úyretiw menen birge kásipke baǵdarlaw bolıp tabıladı. Qaraqalpaqstan Respublikası «Zıyada-Nur» Isbilermenlik hám bántlikti támiyinlew oqıw orayı mine usınday wazıypalardı óz juwapkershiligine alǵan. Miymanlarǵa oray baslıǵı Zıyada Ótenazarova tárepinen oraydıń jumısları jaqınnan tanıstırıldı. Ilaj qatnasıwshıları hayal-qızlardıń isbilermenlik baslamaların qollap-quwatlaw, bántligin támiyinlew, mámleketimizde ámelge asırılıp atır­ǵan ekonomikalıq reformalarda olardıń belsene qatnasıwın támi­yinlew, hayal-qızlarda isbilermenlik kónlikpelerin qáliplestiriwde oraydıń ayrıqsha xızmeti bar ekenliginen xabardar boldı. Oraydıń tiykarǵı wazıypaları uzaq waqıt bala kútimi menen baylanıslı dem alısta bolǵan, awır ekonomikalıq jaǵdayǵa túsip qalǵan hayallardı miynet bazarında talap etetuǵın kásipler boyınsha qayta tayarlaw hám olardıń jumısqa jaylasıwına járdemlesiwden ibarat. Juwmaqlap aytqanda, siyasiy partiyalar, jámiyetlik shólkemler hám Hayal-qızlar komitetleriniń birliktegi jumısların janlandırıw, hayallardıń saylawlarda talaban hám dawıs beriwshi sıpatında belsene qatnasıwın támi­yinlew, Mámleketimiz basshısınıń sózi menen aytqanda «Házirgi kúnde hár bir hayal-qız demokratiyalıq processlerdiń baqlawshısı emes, al, belsendi hám intalı qatnasıwshısına aylanıwı»nıń ilajların kóriw sıyaqlı máselelerde usınıs hám kórsetpeler, baǵdarlar berildi. Sonday-aq, ilaj barısında hayallarımızǵa ulıwma jaraspaytuǵın unamsız illetler, yaǵnıy, hayal-qızlar arasında huqıqbuzarlıqlar, atap aytqanda, jınayatshılıq, adam sawdası, shańaraqlıq ajırasıwlar, erte nekeniń, óz janına qaslıq etiw jaǵdaylarınıń aldın alıw boyınsha tarawda ámelge asırılıwı tiyis bolǵan anıq wazıypalar belgilep alındı.