«Moynaq akva sanaat» kárxanası da paydalanıwǵa tapsırıldı.

«Moynaq akva sanaat» kárxanası da paydalanıwǵa tapsırıldı. Onıń ashılıwında Qaraqalpaqstan Respublikası Joqarǵı Keńesiniń Baslıǵı M.Erniyazov shıǵıp sóylep, Prezidentimizdiń basshılıǵında ámelge asırılıp atırǵan Aral apatshılıǵı aqıbetlerin saplastırıw, aymaqta jasawshı xalıqtıń turmıs sharayatların jaqsılaw, sonıń menen birge, olardıń bántligin támiyinlew boyınsha ámelge asırılıp atırǵan joybarlarǵa toqtap ótti. Haqıyqatında da, Prezidentimizdiń Birlesken Milletler Shólkemi Bas assambleyasınıń 72-sessiyasında shıǵıp sóylegen sózinde dúnya elleriniń itibarın Aral mashqalasına qaratıwı, 2018-jıldıń 27-noyabr kúni Birlesken Milletler Shólkeminiń májilisinde Trast fondınıń shólkemlestiriwi xalqımız turmısındaǵı tariyxıy jańalıqlardan biri bolıp tabıladı. Jańadan paydalanıwǵa tapsırılǵan «Moynaq akva sanaat» kárxanasınıń joybar bahası 20,2 milliard sum bolıp, jılına 4 mıń tonna balıqtı qayta islew quwatlıǵına iye. Bul jerde 200 tonna duzlanǵan balıq, 780 tonna farsh, 400 tonna file, 9 million dana konserva islep shıǵarıladı. Jańa kárxananıń iske túsiriliwi menen 150 jańa jumıs ornı jaratıldı. Ónimlerdiń 30 procenti eksportqa shıǵarıladı. Usı kúni sonday-aq, rayon orayında qurıp pitkerilgen 18 kvartiralı eki turaq jay paydalanıwǵa tapsırıldı. Qaraqalpaqstan Respublikası Joqarǵı Keńesiniń Baslıǵı M.Erniyazov jıynalǵanlardı jańa turaq jaydıń paydalanıwǵa tapsırılıwı menen qutlıqladı. Usı jerde turaq jay iyeleri bolǵan bir topar jas shańaraqlarǵa sertifikatlar tapsırıldı. Ilajlarda Ózbekstan Respublikası Prezidentiniń keńesgóyi T.Xudaybergenov qatnastı.