Jańa kislorod stanciyası ornatıladı
1866
Qaraqalpaqstan Respublikası Joqarǵı Keńesi Prezidiumınıń arnawlı qararı tiykarında Respublikalıq qıstawlı medicinalıq járdem ilimiy orayınıń Qaraqalpaqstan filialına kislorod stanciyası ornatıladı.
Elimizde densawlıqtı saqlaw sistemasında, ásirese, keshiktirip bolmaytuǵın qıstawlı medicinalıq járdem kórsetiwdiń materiallıq-texnikalıq bazasın bekkemlew, maman kadrlar, dári quralları, medicinalıq ásbap-úskeneler, qánigelestirilgen avtotransport hám baylanıs quralları menen támiyinlew dárejesin jaqsılaw máselesine ayrıqsha itibar qaratılmaqta.
Ózbekstan Respublikası «Ezgu amal» jámiyetlik fondı tárepinen 2020-jıldıń dekabr ayında Respublikalıq qıstawlı medicinalıq járdem ilimiy orayınıń Qaraqalpaqstan filialına jámi bahası 55 162 AQSh dollarlıq jańadan kislorod stanciyası alıp kelingen edi. Usı kislorod stanciyasın ornatıw ushın qosımsha imarat qurıw hám eski kislorod bólistiriw imaratın rekonstrukciyalaw zárúrligi payda bolmaqta.
Xalıqqa qıstawlı medicinalıq járdem kórsetiwdiń nátiyjeliligin elede kúsheytiw hám sapasın jánede jaqsılaw maqsetinde Qaraqalpaqstan Respublikası Joqarǵı Keńesi Prezidiumınıń arnawlı qararı qabıl etildi. Qararǵa muwapıq Respublikalıq qıstawlı medicinalıq járdem ilimiy orayınıń Qaraqalpaqstan filialına kislorod stanciyasın ornatıwǵa qurılıs hám rekonstrukciyalaw jumısların ámelge asırıw ushın zárúr bolǵan 309 million swmnan artıq qarjı ajıratılmaqta.
Qaraqalpaqstan Respublikası Joqarǵı Keńesiniń baspasóz xızmeti