«Jaslıq»ta kóshpeli qabıllaw

Usı jıldıń 6-iyul kúni Qaraqalpaqstan Respublikası Joqarǵı Keńesiniń Baslıǵı M.Er­niya­zovtıń puqaralardı kóshpeli qabıllawı paytaxtımız Nókis qalasınan 300 km uzaqlıqtaǵı, respublikamızdıń eń shetki aymaqlarınıń biri esaplanǵan Qońırat rayonınıń «Jaslıq» posyolka puqaralar jıyınında bolıp ótti. Ilajǵa ministrlikler menen ve­domstvolardıń, huqıq qorǵaw uyımlarınıń, rayon hákimliginiń basshıları, jámiyetlik shólkemlerdiń, ǵalaba xabar qurallarınıń wákilleri qatnastı. Húrmetli Prezidentimizdiń baslaması menen jol­ǵa qoyıl­ǵan bunday qabıllawlar tek qala hám ra­yon oraylarında emes, al, eń shetki awıllarda da shólkemlestirilmekte. Bul óz gezeginde múrájat etiwshi puqaralarımızǵa biraz qolaylıqlar jaratıw menen birge, olardıń turmısında ushırasıp atırǵan mashqalalardıń óz waqtında, unamlı sheshiliwine xızmet etpekte. Rayon orayınan uzaqta, Qazaqstan Respublikası menen shegaralas aymaqqa jaqın jaylasqan bul posyolkada búgingi kúnde 4 mıńnan aslam xalıq jasaydı. Ótkerilgen kóshpeli qabıllaw barısında puqaralar tiykarınan jumıssızlıq, jol qurılısı, bilimlendiriw, medicinalıq hám kommunallıq xızmet kórsetiw sıyaqlı máselelerde múrájat etti. Qabıllawda puqaralardıń 50den aslam múrájatı tıńlanıp, sonnan 30ǵa shamalası ornında óz sheshimin taptı. Qosımsha úyreniw hám waqıt talap etetuǵın múrájatlar boyınsha tiyisli ministrlik, mákeme hám shólkemlerdiń basshılarına anıq tapsırmalar belgilep berildi.