Mehribanlıq úyiniń tárbiyalanıwshıları qollap-quwatlanbaqta

Qaraqalpaqstan Respublikası Joqarǵı Keńesi Prezidiumınıń arnawlı qararına muwapıq Respublikalıq 1-sanlı «Mehribanlıq úyi»ne 57 million swmnan artıq qarjı ajıratıldı. Elimizde sociallıq qorǵawǵa mútáj xalıqtı, sonıń ishinde jetim hám ata-anasınıń qaramaǵınan ayrılǵan balalardı qollap-quwatlawǵa ayrıqsha itibar qaratılıp, bul boyınsha bir qatar ilajlar ámelge asırılmaqta. Atap aytqanda, Qaraqalpaqstan Respublikası Joqarǵı Keńesi Prezidiumınıń 2021-jıl 10-fevraldaǵı qararı menen Respublikalıq 1-sanlı «Mehribanlıq úyi» tárbiyalanıwshılarınıń bos waqıtların mazmunlı shólkemlestiriw hámde olardıń mádeniyat hám kórkem-ónerge bolǵan qızıǵıwshılıǵın arttırıw maqsetinde Mehribanlıq úyi tárbiyalanıwshılarınan dúzilgen «Tań ǵumshaları» ayaq oyın ansamblin saxnalıq kiyimler menen támiyinlew hámde usı jerde tárbiyalanıp shıqqan talantlı jaslardı materiallıq xoshametlew ushın 57 million swmnan artıq qarjı  ajıratıldı. Bunday iygilikli isler jaslardıń qalbinde ózine bolǵan bekkem isenim hám keleshekke úmit sezimlerin oyatıwǵa xızmet etedi.

Qaraqalpaqstan Respublikası Joqarǵı Keńesiniń baspasóz xızmeti