QARAQALPAQSTANDA ÁMELGE ASÍRÍLATUǴÍN INVESTICIYaLÍQ JOYBARLARDÍŃ PREZENTACIYaSÍ ÓTKERILDI

Prezident Shavkat Mirziyoev 9-mart kúni Qaraqalpaqstan Respublikasında ámelge asırılatuǵın investiciyalıq joybarlardıń prezentaciyası menen tanıstı. Mámleketimiz basshısı 2020-jıldıń 2-oktyabr kúni Qaraqalpaqstan Respublikası Joqarǵı Keńesiniń gezeksiz sessiyasında aymaqtıń ekonomikasın rawajlandırıw, xalıqtıń turmısın jaqsılaw boyınsha kórsetpeler bergen edi. Onnan soń, qánigeler tárepinen hár bir qala hám rayondaǵı imkaniyat hám mashqalalar úyrenilip, usınıslar islep shıǵıldı. Solar tiykarında, ótken jılı 11-noyabrde Prezidenttiń "2020-2023-jıllarda Qaraqalpaqstan Respublikasın kompleksli sociallıq-ekonomikalıq rawajlandırıw ilajları haqqında"ǵı qararı qabıl etildi. Prezentaciyada, eń dáslep, usı qarardıń orınlanıwı sheńberinde injenerlik hám jol infrastrukturasın rawajlandırıw, máhálle hám awıllarda turmıs sharayatların jaqsılaw, xalıqtıń bántligin támiyinlew boyınsha alıp barılıp atırǵan jumıslar haqqında maǵlıwmat berildi. Ótken jılı Qaraqalpaqstanda ulıwma bahası 436 million dollarlıq 712 joybar ámelge asırılıp, 4 mıń 300 den aslam jumıs ornı jaratılǵan. Usı jıldıń yanvar-fevral aylarında bolsa 52 joybar orınlanıp, 300 den artıq adamnıń bántligi támiyinlengen. Bul baǵdardaǵı jumıslar sistemalı túrde dawam ettirilmekte. Atap aytqanda, ulıwma bahası 887 million dollardan aslam bolǵan jáne 711 joybar qáliplestirilgen. Tarawlar kesiminde aytatuǵın bolsaq, 201 joybar sanaat, 280 joybar xızmet kórsetiw, 230 joybar awıl xojalıǵı tarmaqlarına tuwrı keledi. Barlıq joybarlar nátiyjesinde 222 million dollarlıq islep shıǵarıw quwatlılıǵın shólkemlestiriw, 100 million dollarlıq import ornın basıw hámde 41 million dollarlıq eksporttı támiyinlew múmkin boladı. 22 mıńnan aslam jańa jumıs ornı jaratıladı. Qaraqalpaqstannıń jeri mineral resurslarǵa bay. Olardı qayta islep, qurılıs materialların tayarlaw maqsetinde 150 joybar rejelestirilgen. Nátiyjede jılına bahası 1 trillion swmnan artıq bolǵan ónim islep shıǵarılıp, qosımsha 3 million dollar muǵdarındaǵı ónimdi eksport qılıw imkaniyatı jaratıladı. Máselen, Moynaq rayonında keramika hám qamıstan plitalar, Tórtkúl rayonında ayna islep shıǵarıw rejelestirilgen. Tekstil tarawında 40, farmacevtika baǵdarında 16 kárxana shólkemlestiriw mólsherlengen. Bul kárxanalarda 5 mıńnan aslam adam jumıs penen támiyinlenedi. Olardıń biri - artemiya cistasın qayta islew boyınsha joybar bolıp esaplanadı. Onnan tayarlanatuǵın ónimler medicina, farmacevtika, kosmetologiya, awıl xojalıǵı sıyaqlı kóplegen tarawlarda paydalanıladı. Sonıń ushın 30 million dollarlıq kárxana shólkemlestirip, jılına 3 mıń 500 tonna artemiya cistasın qayta islewdi jolǵa qoyıw rejelestirilgen. Onıń eksport quwatlılıǵı 30 million bolıwı mólsherlengen. Bul jerde 500 turaqlı, 2 mıń máwsimlik jumıs ornı jaratıladı. Boyan tamırın qayta islew boyınsha jáne 13 joybar qáliplestirilgen. Olardıń nátiyjesinde boyan tamırı ónimleriniń eksportınıń muǵdarın házirgi 29 million dollardan 62 million dollarǵa jetkeriw maqset etilgen. Qaraqalpaqstannıń awıl xojalıǵı tarawındaǵı imkaniyatları da júdá keń. Máselen, sharwashılıq, balıqshılıq hám qusshılıq boyınsha 117 joybar islep shıǵılǵan. Olardıń nátiyjesinde 7 mıńǵa jaqın adamnıń bántligi támiyinlenedi. Áhmiyetlisi, 24 joybar gósh, sút hám terini qayta islew, aralas jem islep shıǵarıwǵa baǵdarlanǵan. Mámleketimiz basshısı sırt el tájiriybesin engizgen halda, násilli sharwashılıq hám balıqshılıqtı rawajlandırıw zárúrligin atap ótti. Resurslardı tolıq iske qosıp, qayta islewdi tereńlestiriw, adamlarǵa turaqlı dáramat deregin jaratıw ilajları boyınsha kórsetpeler berdi.

Derek: president.uz