Saylaw nızamshılıǵına kirgizilgen ózgeris hám qosımshalardıń mazmunı hám áhmiyeti talqılandı

Kópshilikke málim, 2021-jıl 24-oktyabr Ózbekstan Respublikası Prezidentin saylaw kúni, dep belgilendi. Saylaw kampaniyasına usı jıldıń 23-iyulinen start berildi. Bul siyasiy mapazdı siyasiy-huqıqıy hám shólkemlestiriwshilik jaqtan joqarı dárejede ótkeriw maqsetinde Oraylıq saylaw komissiyası tárepinen usı jıldıń 14-aprelinde tastıyıqlanǵan Ózbekstan Respublikası Prezidenti saylawına tayarlıq kóriw boyınsha tiykarǵı ilajlar baǵdarlamasına muwapıq, birge islesiwshi shólkemler menen birgelikte keń kólemli jumıslar ámelge asırılmaqta. Oǵan bola, Prezident saylawınıń áhmiyeti, ózine tán tárepleri, Saylaw kodeksi, saylaw nızamshılıǵına kirgizilgen ózgerisler hám qosımshalardıń mazmun-mánisin saylawshılarǵa hám saylawdı shólkemlestiriwshilerge jetkeriw áhmiyetli wazıypa sıpatında belgilengen. Mine usı tiykarda Qaraqalpaqstan Respublikası sudı imáratında Qaraqalpaqstan Respublikası Joqarǵı Keńesiniń nızamlılıq, sud-huqıq hám korrupciyaǵa qarsı gúresiw máseleleri komiteti hám Qaraqalpaqstan Respublikası sudları sudyaları, sonday-aq, Nókis qalasında jaylasqan saylaw uchastkalarınıń saylaw komissiyası baslıqlarına talabanlardıń qatnasıwında konferenciya bolıp ótti. Konferenciyanı Qaraqalpaqstan Respublikası sudı baslıǵı G.Bazarbaeva kiris sózi menen ashtı basqarıp bardı. Konferenciyaǵa Qaraqalpaqstan Respublikası Joqarǵı Keńesi deputatı Sh.Ótemisov qatnasıp, bul siyasiy mapazdıń áhmiyeti hám saylawdı joqarı shólkemleskenlik penen ótkeriw boyınsha orınlarda ámelge asırılatuǵın úgit-násiyat, túsindiriw jumıslarınıń nátiyjeliligin arttırıw boyınsha aytıp ótti. Iláj barısında, Ózbekstan Respublikası Prezidenti saylawınıń ózine tán ózgeshelikleri, saylaw nızamshılıǵına kirgizilgen ózgeris hám qosımshalardıń mazmunı hám áhmiyeti, saylaw ótkeriletuǵın saylaw komissiyalarınıń iskerligi, saylawda sırt el mámleketleri hám xalıq aralıq shólkemler menen jergilikli baqlawshılardıń, sonday-aq ǵalaba xabar kurallarınıń qatnasıwı, saylaw kúni dawıs beriwdi shólkemlestiriw, saylaw nátiyjelerin anıqlaw hám járiyalaw tártibi, saylaw nızamshlıǵınıń buzılıwı boyınsha múrájatlerdi kórip shıǵıw tártibi, saylaw haqqındaǵı nızamshılıq hújjetlerin buzǵanlıǵı ushın juwapkershilik temalarında sudyalar tárepinen bayanatlar oqıldı. Bayanatlar tiykarında arnawlı slaydlı prezentaciyalar islendi. Bul konferenciya saylaw mapazın nızam tiykarında ádil shólkemlestirip ótkeriwde tiyisli taraw qánigeleriniń bilim hám kónlikpelerin arttırıwda áhmiyetli boldı.

Qaraqalpaqstan Respublikası sudı