Tańlaw jeńimpazına sertifikat tapsırıldı
2035
18-avgust kúni Qaraqalpaqstan Respublikası Joqarǵı Keńesinde Joqarǵı Keńes janındaǵı mámleketlik emes kommerciyalıq emes shólkemlerdi hám puqaralıq jámiyetiniń basqa da institutların qollap-quwatlaw Jámiyetlik fondı tárepinen mámleketlik sociallıq buyırpa boyınsha járiyalanǵan 4-tańlawdıń jeńimpazına sertifikat tapsırıldı.
Usı jıl 27-iyul kúni ótkerilgen Qaraqalpaqstan Respublikası Joqarǵı Keńesi janındaǵı Sociallıq sheriklik boyınsha jámiyetlik komissiyanıń májilisinde tańlawǵa kelip túsken joybarlardıń mazmunı, tiykarǵı maqsetleri, ámelge asırıw mexanizmleri hám kútilip atırǵan nátiyjeleri komissiya aǵzaları tárepinen keńnen dodalanıp, “Aral altın miyrası” jámiyetlik birlespesiniń “Qaraqalpaqstan Respublikasınıń awıllıq aymaqlarında sociallıq mashqalalardı sheshiw hámde kem támiyinlengen xalıq, ásirese jaslar hám hayal-qızlarda isbilermenlik kónlikpelerin qáliplestiriw hám olardıń bántligin támiyinlewdegi socillıq birge islesiwdiń innovaciyalıq mexanizmleri” atamasındaǵı joybarı komissiya aǵzaları tárepinen berilgen dawıslar tiykarında jeńimpaz dep tabılǵan edi.
Qaraqalpaqstan Respublikası Joqarǵı Keńesiniń Sociallıq-mádeniy rawajlanıw hám jámiyetlik birlespeler máseleleri komitetiniń baslıǵı, Joqarǵı Keńes janındaǵı Sociallıq sheriklik boyınsha jámiyetlik komissiyanıń baslıǵı D.Qurbaniyazov tańlaw jeńimpazın qutlıqlap, bul joybar keleshekte elimizdiń rawajlanıwına, xalıq iygiligine xızmet etetuǵınlıǵına isenim bildirdi.
Qaraqalpaqstan Respublikası Joqarǵı Keńesiniń baspasóz xızmeti