Nawayı mámleketlik kánshilik hám texnologiyalar universitetin shólkemlestiriw haqqında

Ózbekstan Respublikası Prezidentiniń qararı

Nawayı wálayatında joqarı mamanlıqtaǵı, tereń teoriyalıq bilim hám ámeliy kónlikpelerge iye, ekonomika tarmaqlarınıń turaqlı rawajlanıwına múnásip úles qosa alatuǵın, miynet bazarında óz ornın taba alatuǵın joqarı qánigeliktegi injener kadrlar tayarlaw sistemasın jolǵa qoyıw, sonday-aq, Ózbekstan Respublikası Prezidentiniń 2019-jıl 8-oktyabrdegi PP-5847-sanlı Pármanı menen tastıyıqlanǵan Ózbekstan Respublikası joqarı bilimlendiriw sistemasın 2030-jılǵa shekem rawajlandırıw koncepciyasında belgilengen wazıypalardıń orınlanıwın izbe-iz támiyinlew maqsetinde: Nawayı mámleketlik kánshilik institutı Nawayı mámleketlik kánshilik hám texnologiyalar universiteti (keyingi orınlarda – Universitet) etip qayta shólkemlestirilsin. Universitet jumısınıń tiykarǵı baǵdarları etip tómendegiler belgilensin: sanaat, texnika-texnologiya, injenerlik tarawları ushın joqarı maǵlıwmatlı qánigeler hám ilimiy-pedagogikalıq kadrlardı tayarlaw, qayta tayarlaw jáne olardıń mamanlıǵın arttırıw; jetekshi sırt el joqarı bilimlendiriw mákemeleri menen qospa bilimlendiriw baǵdarlamaları hám ilimiy joybarlardı ámelge asırıw, sonday-aq, bilimlendiriw procesine aldınǵı pedagogikalıq hám aralıqtan bilimlendiriw texnologiyaların, ilim texnikasınıń jańa jetiskenliklerin engiziw; zamanagóy oqıw hám ilimiy laboratoriya bazasın qáliplestiriw, ekonomika tarmaqlarınıń rawajlanıwı ushın jańa qollanbalardı jaratıw, studentlerge bilimlendiriw procesinde ilimiy jumıs penen shuǵıllanıw ushın sharayat jaratıw; sanaat shólkemleriniń mashqalaların sheshiwge qaratılǵan ilimiy, ámeliy hám innovaciyalıq izertlewlerdi rawajlandırıw, izertlew nátiyjeleri hám aldınǵı texnologiyalardı ámeliyatqa engiziw boyınsha usınıslar islep shıǵıw; bilimlendiriw hám ilimiy izleniwler procesine maman qánigelerdi tartıw, respublikalıq hám jetekshi sırt el joqarı bilimlendiriw mákemeleri, ilimiy oraylar hám óndiris kárxanaları menen birge islesiw baylanısların rawajlandırıw; oqıw procesine xalıqaralıq bilimlendiriw standartların engiziw, studentlerdiń teoriyalıq bilimleriniń óndiris ámeliyatı menen úzliksiz baylanıslılıǵın támiyinlew, pitkeriwshilerdi jumıs penen támiyinlew boyınsha maqsetli birge islesiwdi jolǵa qoyıw; studentlerde joqarı ruwxıy hám ádep-ikramlılıq pazıyletlerin rawajlandırıw, Watanǵa muhabbat, onıń táǵdirine qol qatılmaslıq, kásipke sadıqlıq sezimin bekkemlew, tálim-tárbiya procesi hám ruwxıy-aǵartıwshılıq jumıslardıń nátiyjeliligin arttırıw; oqıw procesin studentlerde erkin bilim alıw, sistemalı tallaw, dóretiwshilik pikirlew hám ámeliy, sonıń ishinde, isbilermenlik kónlikpelerin qáliplestiriwge baǵdarlaw; ilimiy-pedagogikalıq potencialdı arttırıp barıw, sonıń ishinde, professor-oqıtıwshılardıń stajirovkası hám mamanlıq arttırıwın abıraylı respublikalıq hám sırt el joqarı bilimlendiriw hám ilimiy-izertlew oraylarında shólkemlestiriw. Universitet janında tómendegiler shólkemlestirilsin: a) Nawayı mámleketlik kánshilik institutınıń Nókis filialı negizinde – Nókis kánshilik institutı; b) «Nawayı» ilimiy-texnologiyalıq sanaat parki; v) 2022-2023-oqıw jılında: Nawayı mámleketlik pedagogikalıq institutı janındaǵı Karmana xızmet kórsetiw hám servis texnikumı negizinde – Karmana politexnika texnikumı; «Ózsanaatqurılısmaterialları» associaciyası sistemasındaǵı Nurata sanaat-kánshilik kolledji negizinde – Ǵazǵan politexnika texnikumı. Nawayı mámleketlik kánshilik institutı janındaǵı Úshqudıq sanaat texnikumı hám Zarafshan sanaat texnikumı Universitet quramına ótkerilsin. Universitettiń jumısın muwapıqlastırıw boyınsha basqarma keńesi (keyingi orınlarda – Basqarma keńesi) shólkemlestirilsin hám onıń quramı 1-qosımshaǵa muwapıq tastıyıqlansın. Basqarıw keńesine (Q.S.Sanakulov): a) tómendegi wazıypalar júklensin: Universitettiń jaqın, orta hám uzaq múddetke mólsherlengen rawajlandırıw baǵdarlamasın, finanslıq jıl ushın mólsherlengen biznes-rejesin, dáramat hám qárejetler parametrlerin tastıyıqlaw jáne olardıń orınlanıwın qadaǵalaw; Universitette bilimlendiriw procesiniń ámeliyat penen úzliksizligin, atap aytqanda, studentlerdiń oqıw procesinde alǵan teoriyalıq bilimleri óndirislik ámeliyat penen tıǵız baylanıslılıǵın támiyinlew; Ilimler akademiyası ilimiy mákemeler hám tarmaq ilimiy-izertlew institutları menen birge islesiwde ilimiy mekteplerdi rawajlandırıw; Universitettiń bilimlendiriw hám izertlew processlerine maman sırt el qánigelerin tartıw, sonday-aq, jetekshi sırt el joqarı bilimlendiriw hám ilimiy izertlew mákemeleri menen nátiyjeli baylanıslar ornatıw; Universitettiń ilimiy-izertlew hám qollanbalar transferi processlerin rawajlandırıw hám ilimiy-izertlew hám innovaciyalıq qollanbalar boyınsha buyırtpashılar menen paydalı birge islesiwin ornatıw; bilimlendiriw hám izertlew processlerine investiciyalardı tartıw, ilimiy ónimlerdi kommerciyalastırıw, startaplar hám akselerator jumısların jolǵa qoyıw; b) tómendegi wákillikler berilsin: bilimlendiriw hám ilimiy-izertlew processlerine tartılǵan sırt elli qánigelerdiń miynetine haqı tólew muǵdarların bazar konyunkturasınan kelip shıǵıp belgilew; jumıs beriwshilerdiń talapların esapqa alǵan halda, oqıw rejelerindegi teoriyalıq bilimlendiriw úlesin qısqartıw esabınan ámeliy sabaqlardıń kólemin arttırıw, háptede bir kúnlik ámeliyat tájiriybesin qollanıw; Universitet rektorı hám prorektorların lawazımǵa tayınlaw hám lawazımınan azat etiw boyınsha usınıs kirgiziw; Universitet hám onıń quramaǵındaǵı bilimlendiriw shólkemleriniń strukturaların tastıyıqlaw; Universitettiń shólkemlestiriwshilik strukturasına byudjetten tısqarı qarjılar esabınan qarjılandırılatuǵın jańa lawazım hám strukturalıq bólimler hám qosımsha shtat birliklerin engiziw. Universitet mámleketlik joqarı bilimlendiriw mákemesi esaplanatuǵını hám Joqarı hám orta arnawlı bilimlendiriw ministrligi sistemasında jumıs alıp baratuǵını; Universitet hám onıń janındaǵı Nókis kánshilik institutına studentlerdi qabıllaw parametrleri hár jılı tastıyıqlanatuǵın respublikalıq joqarı bilimlendiriw mákemelerine oqıwǵa qabıllawdıń mámleketlik buyırtpası sheńberinde anıqlanatuǵını; Nawayı mámleketlik kánshilik institutı hám onıń Nókis filialınıń studentleri oqıwın tiyisliligi boyınsha Universitet jáne onıń janındaǵı Nókis kánshilik institutında dawam ettiretuǵını; Universitet janındaǵı texnikumlarda sanaat, kánshilik, metallurgiya, mashina qurılısı, qurılıs, energetika, elektrotexnika, xızmet kórsetiw sıyaqlı baǵdarlarda kadrlar tayarlaw jolǵa qoyılatuǵını; Karmana xızmet kórsetiw hám servis texnikumı hám Nurata sanaat-kánshilik kolledjinde bilim alıp atırǵan oqıwshılardıń oqıwın pitkergenine shekem usı bilimlendiriw mákemelerinde ámeldegi bilimlendiriw baǵdarlamaları boyınsha oqıwın dawam ettiretuǵını; Universitet, onıń janındaǵı Nókis kánshilik institutı, Karmana hám Ǵazǵan politexnika texnikumları tiyislisinshe Nawayı mámleketlik kánshilik institutı, onıń Nókis filialı, Karmana xızmet kórsetiw hám servis texnikumı hám Nurata sanaat-kánshilik kolledjiniń huqıqları, minnetlemeleri menen shártnamaları, sonıń ishinde, xalıqaralıq shártnamalar boyınsha huqıqıy miyrasqorı bolıp esaplanatuǵını belgilensin. Tómendegiler: Nawayı mámleketlik kánshilik hám texnologiyalar universitetiniń jumısın jolǵa qoyıw jáne onı 2026-jılǵa shekem kompleksli rawajlandırıw baǵdarlaması 2-qosımshaǵa muwapıq; Nawayı mámleketlik kánshilik hám texnologiyalar universitetin 2026-jılǵa shekem rawajlandırıwdıń maqsetli kórsetkishleri 3-qosımshaǵa muwapıq; Nawayı mámleketlik kánshilik hám texnologiyalar universitetinde shólkemlestiriletuǵın bakalavriat tálim baǵdarları hám magistratura qánigelikleriniń dizimi 4-qosımshaǵa muwapıq; Nawayı mámleketlik kánshilik hám texnologiyalar universitetiniń bakalavriat tálim baǵdarları hám magistratura qánigeliklerin ámeliyat ótew obektleri boyınsha ilimiy-izertlew mákemeleri, tarmaq kárxanaları hám shólkemlerine biriktiriw kestesi 5-qosımshaǵa muwapıq tastıyıqlansın. Universitetke tómendegi huqıqlar berilsin: xalıqaralıq tán alınǵan shólkemlerdiń ámeldegi reytinginde joqarı bilimlendiriw mákemeleri arasında birinshi 1 000 lıqqa kirgen sırt el joqarı bilimlendiriw mákemesiniń baǵdarlaması tiykarında óz bilimlendiriw baǵdarlamaların qáliplestiriw; Universitettiń jumıs baǵdarları boyınsha másláhát hám ekspert-analitikalıq xızmetlerdi shártnama tiykarında kórsetiw, sonday-aq, usınılatuǵın xızmetlerdi nátiyjeli ámelge asırıw ilimiy-izertlew hám innovaciyalıq xızmet kórsetiwshi kárxanalardı shólkemlestiriw; bilimlendiriw hám ilimiy-izertlew procesine sırt el qánigelerin tartıw jáne olarǵa Basqarma keńesi tárepinen belgilengen muǵdarda Universitettiń byudjetten tısqarı qarjılar esabınan aylıq miynet haqı hám basqa da tólemlerdi tólew; professor-oqıtıwshılardı oqıw-metodikalıq, ilimiy-izertlew jumısları hám «ustaz-shákirt» sisteması boyınsha orınlanǵan jumıslardıń nátiyjesi boyınsha xoshametlep barıw. Universitettiń jumısı Mámleketlik byudjet qarjıları, tólemli-kontrakt tiykarında oqıtıwdan túsetuǵın qarjılar, xojalıq jumısı hám shártnama tiykarında xızmetler kórsetiwden túsetuǵın túsimler, grantlar hám qáwenderlik qayırqomlıqları hám nızamshılıq hújjetlerinde qadaǵan etilmegen basqa da dárekler esabınan qarjılandırılatuǵını belgilensin. «Nawayı kán-metallurgiya kombinatı» AJ hám «Nawayı kán-metallurgiya kombinatı qorı» mámleketlik mákemesiniń; Universitette bilimlendiriw procesiniń óndiris penen úzliksizligin támiyinlew hám Universitet janında «Nawayı» ilimiy-texnologiya sanaat parkin jaylastırıw maqsetinde «Nawayı mashina qurılısı zavodı» óndirislik birlespesi avtoońlaw cexı 2-korpus imaratın úskeneler menen birgelikte Universitetke operativ basqarıw huqıqı tiykarında biypul beriw; óz qarjıları esabınan Universitet hám onıń janındaǵı Nókis kánshilik institutınıń materiallıq-texnikalıq bazasın bekkemlew, qurılıs-ońlaw jumısların ámelge asırıw, professor-oqıtıwshılardı materiallıq xoshametlew, sonday-aq, oqıw hám ilimiy-izertlew jumısın rawajlandırıwǵa baylanıslı qárejetlerdi qarjılandırıw haqqındaǵı usınısları maqullansın. Nawayı wálayatı hákimligi «Nawayı kán-metallurgiya kombinatı» AJ, «Nawayıazot» AJ, «Nawayı ıssılıq elektr stanciyası» AJ, «Nawayıuran» MK hám aymaqtaǵı basqa da sanaat kárxanaları menen birgelikte: Universitettiń bakalavriat basqıshı joqarı kurs studentlerin hám magistrantlardı miynet haqı tólenetuǵın sistema arqalı bánt etiw, sonıń ishinde, olarǵa ámeliyat ótew dáwirinde haqı tólew sistemasın engiziw; Universitet professor-oqıtıwshıları hám ilimiy xızmetkerlerine óndiris kárxanalarında stajirovka ótew hám ilimiy izertlewler alıp barıw ushın sharayat jaratıw ilajların kórsin. Joqarı hám orta arnawlı bilimlendiriw ministrligi: a) 2022-2023-oqıw jılına shekem: Universitetti tańlaw tiykarında óndirislik shólkemler, joqarı bilimlendiriw hám ilimiy-izertlew mákemelerinde úlken ilimiy hám (yamasa) ámeliy tájiriybe arttırǵan qánigeler, tiykarǵı tárizde, ilimiy dárejege iye bolǵan joqarı maman kadrlar menen tolıqtırıw ilajların kórsin; Ekonomikalıq rawajlanıw hám kámbaǵallıqtı qısqartıw ministrligi hám Ilimler akademiyası menen birgelikte Universitettiń qánigelesken fakultet hám kafedraların sáykes baǵdarlar boyınsha mámleketlik úleske iye iri xojalıq júrgiziwshi subektler hám ilimiy-izertlew institutları menen birge islesiwin jolǵa qoyıw boyınsha «jol kartası»n tastıyıqlasın; Málimleme texnologiyaları hám kommunikaciyaların rawajlandırıw ministrligi menen birgelikte Universitetti joqarı tezliktegi Internet tarmaǵına jalǵaw hám zárúr telekommunikaciya úskeneleri menen támiyinlew ilajların kórsin; b) Innovaciyalıq rawajlanıw ministrligi, «Nawayı kán-metallurgiya kombinatı» AJ, «Nawayıazot» AJ, «Nawayıuran» MK menen birgelikte: 2022-2023-oqıw jılına shekem Universitet janındaǵı «Nawayı» ilimiy-texnologiyalıq sanaat parkin zamanagóy laboratoriya úskeneleri menen támiyinlesin hám onıń jumısın jolǵa qoysın; 2023-2024-oqıw jılınan baslap Universitet janındaǵı «Nawayı» ilimiy-texnologiyalıq sanaat parkinde jetekshi sırt el izertlew orayları hám maman sırt el ilimpazlarınıń qatnasıwında ilimiy-izertlew jumısların ámelge asırıwdı jolǵa qoysın; v) Ekonomikalıq rawajlanıw hám kámbaǵallıqtı qısqartıw ministrligi hám Innovaciyalıq rawajlanıw ministrligi menen birgelikte Universitettiń ilimiy potencialın arttırıw maqsetinde 2022-2023-oqıw jılınan baslap jetekshi joqarı bilimlendiriw mákemelerinde tiyisli magistratura qánigelikleri hám 2023-jıldan baslap tayanısh doktoranturada kadrlardı maqsetli tayarlaw ilajların kórsin; g) Sırtqı isler ministrligi menen birgelikte Universitette 2023-2024-oqıw jılınan baslap jetekshi sırt el joqarı bilimlendiriw mákemeleri menen birgelikte texnika baǵdarı boyınsha qospa bilimlendiriw baǵdarlamaları tiykarında kadrlar tayarlawdı jolǵa qoysın; d) Investiciyalar hám sırtqı sawda ministrligi menen birgelikte Universitet jumısın qollap-quwatlaw ushın xalıqaralıq finans institutları, donorlar hám basqa da sırt el shólkemleriniń qarjıların tartıw ilajların kórsin; e) hár jılı investiciyalıq baǵdarlamaǵa kirgiziw ushın Universitet hám onıń janındaǵı Nókis kánshilik institutınıń imarat hám obektlerin qurıw, rekonstrukciyalaw hám kapital ońlaw jumısların tarawǵa ajıratılǵan limitler sheńberinde ámelge asırıw boyınsha Ekonomikalıq rawajlanıw hám kámbaǵallıqtı qısqartıw ministrligine usınıslar berip barsın. Nawayı wálayatı hákimligi Universitetke óz jumısın nátiyjeli shólkemlestiriw hám jańa imarat jáne obektlerdi qurıw ushın zárúr jer maydanlarınıń turaqlı paydalanıw huqıqı tiykarında belgilengen tártipte ajıratılıwın támiyinlesin. «Ózbekstan temir jolları» AJ hám Joqarı hám orta arnawlı bilimlendiriw ministrliginiń Nókis temir jol transportı kolledji imaratın Universitet janındaǵı Nókis kánshilik institutına operativ basqarıw huqıqı tiykarında biypul beriw jáne onı usı kolledjdiń imaratı hám obektlerine biypul jaylastırıw haqqındaǵı usınısına kelisim berilsin. Joqarı hám orta arnawlı bilimlendiriw ministrligi mápdar ministrlikler hám uyımlar menen birgelikte bir ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin. Usı qarardıń orınlanıwın nátiyjeli shólkemlestiriwge juwapker hám jeke juwapker etip joqarı hám orta arnawlı bilimlendiriw ministri A.X.Toshkulov, «Nawayı kán-metallurgiya kombinatı» AJ basqarmasınıń baslıǵı Q.S.Sanakulov belgilensin. Qarardıń orınlanıwın qadaǵalaw, orınlaw ushın juwapker shólkemlerdiń jumısın muwapıqlastırıw Ózbekstan Respublikası Bas ministri A.N.Aripovqa hám Ózbekstan Respublikası Prezidentiniń keńesgóyi A.A.Abduvaxitovqa júklensin. Ózbekstan Respublikası Prezidenti Sh.MIRZIYOEV Tashkent qalası, 2022-jıl 31-mart