Veterinariya hám sharwashılıq tarawında kadrlar tayarlaw sistemasın túp-tiykarınan jetilistiriw haqqında

Ózbekstan Respublikası Prezidentiniń qararı

Veterinariya hám sharwashılıq tarawında joqarı tájiriybeli kadrlar tayarlaw sistemasın jáne de jetilistiriw, Samarqand veterinariya medicinası institutınıń  jumıs kólemin keńeytiw, xalıqaralıq abırayın arttırıw, ilimiy izertlewlerdi sistemalı alıp barıw, innovaciyalıq tálim hám texnologiyalar transferin qollap-quwatlaw sistemasın jaratıw, bilimlendiriw hám óndiristi izbe-iz baylanıstırıw, sonday-aq, Ózbekstan Respublikası joqarı bilimlendiriw sistemasın 2030-jılǵa shekem rawajlandırıw koncepciyasına muwapıq belgilengen wazıypalardıń orınlanıwın támiyinlew maqsetinde: Veterinariya hám sharwashılıqtı rawajlandırıw boyınsha mámleketlik komiteti, Joqarı hám orta arnawlı bilimlendiriw ministrligi, Ekonomikalıq rawajlanıw hám kámbaǵallıqtı qısqartıw ministrliginiń Samarqand veterinariya medicinası institutı tiykarında Samarqand mámleketlik veterinariya medicinası, sharwashılıq hám biotexnologiyalar universitetin (keyingi orınlarda – Universitet) shólkemlestiriw haqqındaǵı usınısı maqullansın. Tómendegiler Universitettiń tiykarǵı wazıypaları etip belgilensin: veterinariya, sharwashılıq, biotexnologiya, agrotexnologiya, agroekonomika tarmaqları ushın joqarı maǵlıwmatlı kadrlardı tayarlaw; zamanagóy oqıw hám ilimiy-laboratoriya bazasın qáliplestiriw, onı aldıńǵı texnologiyalıq ásbap-úskeneler menen támiyinlew jáne tarawdı rawajlandırıwǵa qaratılǵan ilimiy-innovaciyalıq izertlewlerdi keńeytiw; oqıw procesin ámeliy kónlikpelerdi qáliplestiriwge qaratıw, xalıqaralıq bilimlendiriw standartlarına tiykarlanǵan aldıńǵı pedagogikalıq texnologiyalar, oqıw baǵdarlamaları hám innovaciyalıq oqıw-metodikalıq materiallardı keńnen engiziw, veterinariya klinikası, oqıw ilimiy laboratoriya, oqıw-tájiriybe xojalıǵı, óndiris hám qayta islew kárxanalarında teoriyalıq bilim jáne ámeliyattıń sáykesligin támiiynlew ushın zárúr sharayatlar jaratıw; ilimiy hám ilimiy-pedagogikalıq kadrlar tayarlaw, qayta tayarlaw hám olardıń mamanlıǵın arttırıw boyınsha úzliksiz bilimlendiriw sistemasın jaratıw; jetekshi sırt el joqarı bilimlendiriw mákemeleri menen birgeliktegi bilimlendiriw baǵdarlamaların hám ilimiy joybarlardı ámelge asırıw, Universitet professor-oqıtıwshılarınıń mamanlıǵın arttırıw, pitkeriwshilerdiń respublikalıq hám sırt el joqarı bilimlendiriw mákemelerinde (ilimiy oraylarda) magistratura hám doktorantura baǵdarlamaları boyınsha oqıwın shólkemlestiriw; oqıw procesin studentlerde erkin oqıw, sistemalı tallaw, dóretiwshilik pikirlew hám ámeliy, sonıń ishinde, isbilermenlik kónlikpelerin qáliplestiriwge baǵdarlaw; tarawdaǵı ilimiy-izertlew institutlarınıń jetkshi ilimpazların Universitette oqıp atırǵan talantlı studentlerge biriktirgen halda, ilim, bilimlendiriw hám óndiris integraciyasın támiyinlew; Universittetiń joqarı basqısh studentleri jáne ilimiy izertlewshileriniń ilimiy-izertlew institutınıń laboratoriyalarında jumıs islewi ushın sharayat jaratıw; qaramaǵındaǵı bilimlendiriw mákemeleriniń jumısın muwapıqlastırıw, olardıń materiallıq-texnikalıq bazasın bekkemlew. Samarqand veterinariya medicinası, sharwashılıq hám biotexnologiyalar universiteti Basqarıw keńesiniń (keyingi orınlarda – Basqarıw keńesi) quramı 1-qosımshaǵa muwapıq tastıyıqlansın. Basqarıw keńesine (B.Norqobilov): a) tómendegi wazıypalar júklensin: Universittetiń finans jılı ushın mólsherlengen biznes-rejesi, uzaq hám orta múddetli strategiyalıq rawajlandırıw baǵdarlaması, dáramat hám qárejetler parametrlerin tastıyıqlaw jáne olardıń orınlanıwın qadaǵalaw; Ilimler akademiyasınıń ilimiy mákemeler hám tarmaq ilimiy-izertlew institutları menen birgelikte ilimiy mekteplerdi rawajlandırıw; Veterinariya hám sharwashılıq baǵdarında tálim, izertlew hám ilimiy qollanbalar transferi processlerin rawajlandırıw jáne ilimiy-izertlew hám innovaciyalıq qollanbalar boyınsha buyırtpashılar menen paydalı birge islesiw ornatıw; ilimiy ónimlerdi kommerciyalastırıw, startaplar hám akselerator jumısın jolǵa qoyıw; bilimlendiriw hám izertlew processlerine investiciyalardı tartıw, jetekshi sırt el joqarı bilimlendiriw hám ilimiy izertlew mákemeleri menen nátiyjeli baylanıslardı ornatıw; b) tómendegi wákillikler berilsin: Universitettiń byudjetten tısqarı qarjıları esabınan shártnama tiykarında maman qánigelerdi tartıw; Universitet janında jumısınıń tiykarǵı baǵdarı bilimlendiriw, ilim hám onıń nátiyjelerin engiziw jáne kommerciyalastırıw menen baylanıslı bolǵan, byudjetten tısqarı qarjılar esabınan qarjılandırılatuǵın quramlıq strukturalar, kommerciyalıq hám kommerciyalıq emes shólkemlerdi shólkemlestiriw; tálim baǵdarları hám qánigelikler ushın bilimlendiriw dawamlılıǵı múddetlerin belgilew; bilimlendiriwdiń sapasın ishki qadaǵalaw mexanizmlerin belgilew hám engiziw. Universitet veterinariya medicinası, veterinariyalıq hám sanitariyalıq ekspertiza, veterinariya diagnostikası hám laboratoriya jumısları, veterinariya farmacevtikası, zooinjeneriya, veterinariya biotexnologiyası, sharwashılıq ónimlerin qayta islew texnologiyası baǵdarlarında kadrlar tayarlawshı tayanısh mámleketlik joqarı bilimlendiriw mákemesi bolıp esaplanatuǵını; Universitet Veterinariya hám sharwashılıqtı rawajlandırıw boyınsha mámleketlik komiteti sistemasında jumıs alıp baratuǵını; Samarqand veterinariya medicinası institutınıń studentleri Universitette oqıwın dawam ettiretuǵını hám pitkeriwshilerge mámleket tárepinen tastıyıqlanǵan úlgidegi Universitet diplomı beriletuǵını; Universitetke studentlerdi qabıllaw parametrleri hár jılı tastıyıqlanatuǵın respublikalıq joqarı bilimlendiriw mákemelerine oqıwǵa qabıllawdıń mámleketlik buyırtpası sheńberinde anıqlanatuǵını; Universitet Samarqand veterinariya medicinası institutınıń huqıqları, minnetlemeleri hám shártnamaları, sonıń ishinde, xalıqaralıq shártnamalar boyınsha huqıqıy miyrasxor bolıp esaplanatuǵını belgilensin. Veterinariya tarawında bilimlendiriw processleriniń tikkeley ámeliyat penen únleslikte shólkemlestiriliwin, ilim hám texnologiyalar integraciyasın támiyinlew maqsetinde Universitet janında xojalıq esabında jumıs alıp baratuǵın Veterinariya klinikası hám kesellikler diagnostikası texnoparki (keyingi orınlarda – Texnopark) shólkemlestirilsin. Universitet Texnopark quramında tómendegi strukturalıq bólimlerdi shólkemlestiriwdi názerde tutsın: Veterinariya laboratoriya-diagnostika hám profilaktika-emlew klinikası; Jasalma tuqımlandırıw hám násilshilik-selekciya orayı; sharwashılıq xojalıqları hám xalıq xojalıǵında saqlanıp atırǵan haywanlar ushın azıqlıq jetistiriw, jıynaw hám tayarlaw boyınsha olarǵa ámeliy járdem beretuǵın másláhát orayı. Texnoparkke veterinariya laboratoriya-diagnostika jumısların alıp barıw jáne veterinariya preparatların, sonıń ishinde, veterinariya maqsetleri ushın dárilik qurallar, azıqlıq qosımshaları, biologiyalıq preparatlar hám zoogigiena quralların realizaciyalaw jumısın ámelge asırıw huqıqı berilsin. Ekonomikalıq rawajlanıw hám kámbaǵallıqtı qısqartıw ministrligi, Qarjı ministrligi, Joqarı hám orta arnawlı bilimlendiriw ministrligi, Veterinariya hám sharwashılıqtı rawajlandırıw boyınsha mámleketlik komietetiniń tómendegi usınıslarına kelisim berilsinÚ Universitetke tarawda 5 jıllıq stajǵa iye bolǵan xızmetkerler usınıs xatı tiykarında oqıwǵa usınıs etilgende, tólemli-kontrakt muǵdarın kúndizgi bilimlendiriw baǵdarındaǵı tólemli-kontrakt (stipendiyasız) muǵdarına teńlestiriw; «Tashkent irrigaciya hám awıl xojalıǵın mexanizaciyalaw injenerler institutı» Milliy izertlew universiteti janındaǵı Qarshı irrigaciya hám agrotexnologiyalar institutında 2022-2023-oqıw jılınan bakalavriattıń kúndizgi hám sırtqı tálim túrleri boyınsha «Sharwashılıq ónimlerin qayta islew texnologiyası» tálim baǵdarında kadrlar tayarlawdı jolǵa qoyıw; Qashqadárya wálayatı Qamashi rayonındaǵı Qamashi xızmet kórsetiw texnikumı tiykarında Universitettiń Qamashi veterinariya medicinası texnikumın shólkemlestiriw. Onda, Ekonomikalıq rawajlanıw hám kámbaǵallıqtı qısqartıw ministrligi Qarjı ministrligi menen birgelikte tastıyıqlanǵan joybarlaw-smeta hújjetlerine muwapıq usı texnikumnıń imarat hám obektlerin rekonstrukciyalaw, kapital ońlaw hám úskenelew joybarların 2023-2026-jıllarǵa mólsherlengen Ózbekstan Respublikasınıń sociallıq hám óndirislik infrastrukturasın rawajlandırıw baǵdarlamasına kirgizsin. Samarqand wálayatı, Taylaq rayonındaǵı Veteninariya ilimiy-izertlew institutınıń paydalanılmay kiyatırǵan awıl xojalıǵına mólsherlengen 2-qosımshaǵa muwapıq jámi 27,4 gektar, sonnan 16,8 gektar suwǵarılatuǵın jer uchastkalarınıń jer fondı kategoriyası Awıl xojalıǵı ministrligi hám Suw xojalıǵı ministrliginiń juwmaǵına muwapıq awıl xojalıǵına mólsherlengen jerler kategoriyasınan sanaat, transport, baylanıs, qorǵanıw hám basqa da maqsetlerge mólsherlengen jerler kategoriyasına ótkerilsin. Samarqand wálayatı hákimligi usı bántke muwapıq jer fondı kategoriyası ózgertilgen jer uchastkası belgilengen tártipte rezervke alınıwın, mámleket múlki sıpatında mámleketlik dizimnen ótkeriliwin jáne elektron onlayn-aukcionǵa shıǵarılıwın támiyinlesin. Usı bántke muwapıq rezervke alınǵan jer uchastkaların satıwdan túsken qarjılar (Ministrler Kabinetiniń qararında belgilengen qárejetler shegirilgen halda), burınǵısınan basqasha tárizde, Veterinariya xızmeti hám sharwashılıqtı rawajlandırıw qorınıń arnawlı esap-betine qaratılsın. Veterinariya hám sharwashılıqtı rawajlandırıw boyınsha mámleketlik komiteti jer uchastkasın satıwdan Veterinariya xızmeti hám sharwashılıqtı rawajlandırıw qorına túsken qarjılardı Veterinariya ilimiy-izertlew institutı aymaǵında veterinariya laboratoriyası, veterinariya klinikası hám diagnostikalıq orayı, vivariy jas ilimpazlar ushın jataqxana hám óndiris cexın qurıw hám úskenelew ushın maqsetli baǵdarlasın. Ózbekstan Respublikası Prezidenti janındaǵı Mámleketlik xızmetti rawajlandırıw agentligi 2022-2023-oqıw jılınan baslap veterinariya hám biotexnologiya baǵdarları boyınsha abıraylı sırt el joqarı bilimlendiriw mákemelerinde bakalavriat, magistratura hám doktorantura tálim baǵdarları tiykarında kadrlar tayarlaw ushın «El-yurt umidi» qorınıń stipendiyaları esabınan hár jılı óz aldına kvota ajıratılıwın támiyinlesin. Onda, bilimlendiriw baǵdarlamasınıń juwmaǵı boyınsha studentlerdiń keminde 3 jıl dawamında Veterinariya hám sharwashılıqtı rawajlandırıw boyınsha mámleketlik komiteti hám onıń sistema shólkemlerinde jumıs islep beriw shárti názerde tutıladı. Tómendegiler: 2022-2026-jılları Samarqand mámleketlik veterinariya medicinası, sharwashılıq hám biotexnologiyalar universitetin jáne sistemada jumıs islep atırǵan professional bilimlendiriw mákemeleri, ilimiy-izertlew institutların kompleksli rawajlandırıw baǵdarlaması 3-qosımshaǵa muwapıq; Samarqand mámleketlik veterinariya medicinası, sharwashılıq hám biotexnologiyalar universitetiniń xalıqaralıq abırayın arttırıw boyınsha maqsetli kórsetkishler 4-qosımshaǵa muwapıq; Samarqand mámleketlik veterinariya medicinası, sharwashılıq hám biotexnologiyalar universitetiniń qánigelik kafedraların ilimiy-izertlew mákemeleri, tarmaq kárxana hám shólkemlerge biriktiriw kestesi 5-qosımshaǵa muwapıq; Samarqand mámleketlik veterinariya medicinası, sharwashılıq hám biotexnologiyalar universitetinde shólkemlestiriletuǵın jańa bakalavriat tálim baǵdarları hám magistratura qánigelikleriniń dizimi 6-qosımshaǵa muwapıq; 2023-2026-jılları Veterinariya hám sharwashılıqtı rawajlandırıw boyınsha mámleketlik komiteti sistemasında jumıs alıp barıp atırǵan joqarı hám professional tálim jáne ilimiy-izertlew institutlarınıń obektlerin qurıw, rekonstrukciyalaw, tolıq ońlaw hám úskenelewdiń mánzilli dizimi 7-qosımshaǵa muwapıq tastıyıqlansın. 2022-jıl 1-maydan baslap Veterinariya ilimiy-izertlew institutınıń ilimiy xızmetkerleri (úlken hám kishi ilimiy xızmetker) miynetine haqı tólew boyınsha qárejetler Mámleketlik byudjettiń qarjıları esabınan qarjılandırılsın. Samarqand veterinariya medicinası institutınıń Tashkent hám Nókis filialları tiyisli túrde Universitettiń Tashkent hám Nókis filialları dep qayta atalsın. Samarqand veterinariya medicinası institutınıń akademiyalıq liceyi hám Samarqand, Úrgit, Nókis, Ándijan veterinariya medicinası texnikumları Universitet quramına ótkerilsin. Universitet jumısı Mámleketlik byudjet qarjıları, Universitettiń byudjetten tısqarı qarjıları, qáwenderlik qayırqomlıqları hám grantlar jáne nızamshılıq hújjetlerinde qadaǵan etilmegen basqa da dárekler esabınan qarjılandırılatuǵını belgilensin. Samarqand veterinariya medicinası, sharwashılıq hám biotexnologiyalar universitetiniń jumısın rawajlandırıw qorı shólkemlestirilsin hám tómendegiler onıń qarjı dárekleri etip belgilensin: Veterinariya xızmeti hám sharwashılıqtı rawajlandırıw qorınıń ajıratpaları; Qarakólshilikti rawajlandırıw qorınıń ajıratpaları; sırt el investorları menen investiciyalıq kelisimlerde názerde tutılǵan ilimiy izertlewler, kadrlar tayarlaw hám joybarlardı ámelge asırıw ushın ajıratılatuǵın qarjılar; kadrlardı tayarlaw hám qayta tayarlaw, veterinariya hám sharwashılıq jáne basqa da baǵdarlarda tartılatuǵın donor shólkemlerdiń grant qarjıları; nızamshılıq hújjetlerinde qadaǵan etilmegen basqa da dárekler. Qordıń qarjıların qáliplestiriw hám paydalanıw tártibi Veterinariya hám sharwashılıqtı rawajlandırıw boyınsha mámleketlik komiteti tárepinen Qarjı ministrligi menen kelisilgen halda tastıyıqlanadı. Universitet Veterinariya ilimiy-izertlew institutı, Sharwashılıq hám qusshılıq ilimiy-izertlew institutı, Balıqshılıq ilimiy-izertlew institutı jáne Qarakólshilik hám shól ekologiyası ilimiy-izertlew institutı menen óz-ara birgelikte: magistrlardı professor hám ilimiy xızmetkerlerge biriktirgen halda «ilim-bilimlendiriw-óndiris» principi tiykarında kadrlar tayarlawdıń klaster sistemasın, sonday-aq, doktorantlardıń tikkeley ilimiy-izertlew institutlarınıń laboratoriyalarında ilimiy jumıs alıp barıwın jolǵa qoyatuǵını; Regionda veterinariya, sharwashılıq, biotexnologiya hám agrotexnologiya tarawlarında mashqalalardı saplastırıw boyınsha fundamental, ilimiy-izertlew institutları menen fundamental, ilimiy-ámeliy innovaciyalı izertlewler alıp baratuǵını jáne jergilikli hám xalıqaralıq grant qarjıların tartatuǵını belgilensin. Basqarıw keńesi (B.Norqobilov): a) eki ay múddette: Basqarıw keńesiniń jumısı haqqındaǵı rejeni tastıyıqlasın; Zamanagóy tálim baǵdarların esapqa alǵan halda, Universitet kafedralarınıń ilimiy jumısın tarawlar hám tarmaqlar mashqalalarınıń sheshimine qaratıw maqsetinde olardı qaytadan shólkemlestirsin; Universitet administraciyası, kafedraları hám strukturalıq bólimleri jumısınıń nátiyjeliligin bahalaw normaların jáne joqarı nátiyjelilikke eriskenlerdi xoshametlep barıw sistemasın engizsin; b) oqıw procesine sırt el professor-oqıtıwshıların tańlaw tiykarında tartıw hám Universitet professor-oqıtıwshılarınıń sırt el joqarı bilimlendiriw hám ilimiy-izertlew mákemelerinde mamanlıǵın arttırıw ilajların kórsin; v) 2023-2024-oqıw jılınan baslap veterinariya hám sharwashılıq baǵdarları boyınsha sırt ellerdiń abıraylı joqarı oqıw orınları menen birgelikte birgeliktegi tálim baǵdarlamaları jáne keń kólemli fundamental, ámeliy hám innovaciyalıq izertlewlerdi shólkemlestiriw ilajların kórsin. Veterinariya hám sharwashılıqtı rawajlandırıw boyınsha mámleketlik komiteti, Joqarı hám orta arnawlı bilimlendiriw ministrligi Ádillik ministrligi menen birgelikte eki ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin. Usı qarardıń orınlanıwın nátiyjeli shólkemlestiriwge juwapker hám jeke juwapker etip Ózbekstan Respublikası Bas ministriniń orınbasarı Sh.M.Ǵaniev belgilensin. Qarardıń orınlanıwın dodalap barıw, orınlaw ushın juwapker uyımlardıń jumısın muwapıqlastırıw hám qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidentiniń keńesgóyi A.A.Abduvaxitovqa júklensin. Ózbekstan Respublikası Prezidenti Sh.MIRZIYOEV Tashkent qalası, 2022-jıl 31-mart