Isbilermenlerdiń mashqalaları úyrenildi

Usı jıl 8-iyul kúni Qaraqalpaqstan Respublikası Joqarǵı Keńesinde isbilermenler menen ushırasıw bolıp ótti. Ilajdı Qaraqalpaqstan Respublikası Joqarǵı Keńesi Baslıǵınıń orınbasarı A.Hamraev basqarıp bardı. Ushırasıwda Ózbekstan Respublikası Bas prokurorı N. Ywldoshev sózge shıǵıp, Prezidentimizdiń basshılıǵında elimizde kishi biznes hám jeke isbilermenlikti rawajlandırıw, olardı qollap-quwatlaw baǵdarında ámelge asırılıp atırǵan keń kólemli jumıslarǵa toqtap ótti. Atap ótilgenindey, sońǵı jıllarda respublikada isbilermenlikti rawajlandırıw, investiciyalardı tartıw hám biznes júrgiziw ushın qolaylı ortalıq jaratıw, isbilermenlerdiń nızamlı máplerin qorǵawdıń huqıqıy kepilliklerin bekkemlew tarawında keń kólemli jumıslar ámelge asırılmaqta. Sonıń ishinde, salıq sisteması túp-tiykarınan reformalandı, ruxsat beriwshi hújjetlerdi alıw tártibi sezilerli dárejede ápiwayılastırıldı, isbilermenlik subektleriniń finans-xojalıq jumısına baylanıslı bolmaǵan jobalı tekseriwler biykarlandı. Atap aytqanda, 42 licenziya hám ruxsatnama beriw tártibi biykar etildi. Isbilermenlik subktlerine kórsetilip atırǵan usınday ayrıqsha jeńillikler nátiyjesinde olardıń elimizdiń jalpı ónimdegi úlesi búgingi kúnge 45,5, jumıs orınları menen támiyinlewdegi úlesi 76,5 procentti quraydı. Ózbekstan Respublikası Prezidentiniń 2019-jıl 14-maydaǵı «Isbilermenlik jumısın qollap-quwatlaw hám qorǵaw sistemasın túp-tiykarınan jetilistiriw ilajları haqqında»ǵı pármanı isbilermenlerdiń, sonıń ishinde, sırt el investorlarınıń múrájatları menen islesiwdi shólkemlestiriw sapasın hám operativliligin arttırıw, olar menen ashıq-aydın hám tikkeley sóylesiwdi támiyinlew, olardıń nızamlı talapların ámeliy jáne nátiyjeli ámelge asırıw hám mashqalalı máselelerdi sheshiwge xızmet etedi. Sonıń menen birge, aymaqlardıń sociallıq-ekonomikalıq rawajlanıwına olardıń real úlesin kóbeytiw, xalıqtıń jumıs penen bántligin arttırıw jáne onıń materiallıq abadanlıǵın arttırıw bolıp tabıladı. Usı párman tiykarında Ózbekstan Bespublikası bas ministriniń Isbilermenlerdiń múrájatların kórip shıǵıw qabıllawxanaları shólkemlestirildi. Ilajda bir qatar isbilermenler shıǵıp sóylep, ózleriniń jumıslarında ushırasıp atırǵan mashqalalar tuwralı sóz etti. Májiliste olar tárepinen bildirilgen máseleler taraw basshıları menen birgelikte úyrenip shıǵıw, tiyisli sheshim qabıl etiw boyınsha pikir-usınıslar bildirildi.