Qaraqalpaqstan Respublikası Joqarǵı Keńesiniń Baslıǵı Amanbay Orınbaev Shımbay rayonında bolıp, rayonda puqaralardı qıynap kiyatırǵan mashqalalarǵa sheshim tabıw hámde xalıqtıń abadan turmıs keshiriwin támiyinlewge qaratılǵan ámeliy islerdiń barısı menen tanıstı. Atap aytqanda Joqarǵı Keńes Baslıǵına múrájat etken puqaralardıń máseleleriniń unamlı sheshim tabıwı boyınsha berilgen tapsırmalardıń orınlanıwın barıp kórdi.

Bunnan soń Shımbay rayonı hákimliginiń Májlisler zalında barlıq ministrlik, komitet, basqarma, shólkem basshıları hám rayonlıq mekemelerdiń basshıları sonday-aq, rayondaǵı 370 den aslam kóshe hám awıl biyleri qatnasında májlis bolıp ótti.

“Prezidentimiz basshılıǵında elimizde “Insan qádiri ushın” principi tiykarında barlıq tarawlarda keń kólemli reformalar ámelge asırılmaqta. Sonday-aq, xalıqtın turmıs dárejesin jaqsılaw, isbilermenlikti rawajlandırıw arqalı puqaralardıń bántligin támiyinlewge qaratılǵan: “Abat awıl”, “Abat máhálle”, “Hár bir shańaraq-isbilermen”, “Jaslar keleshegimiz”, “Temir dápter”, “Hayallar dápteri”, “Jaslar dápteri” sıyaqlı bir qatar baǵdarlamalar boyınsha orınlarda jumıslar alıp barılmaqta. Biraq, usınday qolaylı sharayatlar jaratılıwına qaramastan, ayırım taraw basshıları óz jumısına ústirtin kóz qarasta qarap, belgilengen tapsırmalardıń múddetinde orınlamawı – birinshi náwbette xalıqtıń kewil-keypiyatına keri tásir etip, olardıń narazıshılıǵına sebep boladı”-dedi Joqarǵı Keńes Baslıǵı Amanbay Orınbaev. Búgingi kúnde Shımbay rayonında derlik kóplegen tarawlarda, sonıń ishinde, qurılıs, abadanlastırıw hám sociallıq tarawlarda bir qatar kemshiliklerge jol qoyılıp atırǵanlıǵın atap ótti.

Ushırasıwda kóterilgen hár bir másele taraw basshılarınıń itibarınan shette qalmay, barlıǵı qatań qadaǵalawǵa alınıwı shárt ekenligin belgilep berdi hám bıyılǵı jıl juwmaǵına shekem Shımbay rayonın sociallıq-ekonomikalıq rawajlandırıw hám xalıqtıń abadan turmıs keshiriwin támiyinlewge jámi 16 mlrd. 849 mln.swmlıq qarjı ajıratılatuǵının málim etti. Sonıń menen birge joqarıda kóterilgen máselelerdi saplastırıw jumısların shólkemlestiriw, taraw basshıları tárepinen jol qoyılıp atırǵan kemshilikler hám olardıń lawazımına ilayıqlıǵı máselesi boyınsha juwapker etip, Joqarǵı Keńestiń komitet baslıǵı D.Utambetov belgilendi.