Joqarǵı Keńestiń Baslıǵı A.Orınbaev Oliy Majlis Senatınıń aǵzası bolıp saylandı

Usı jıl 9-sentyabr kúni Nókiste bosaǵan orınǵa Ózbekstan Respublikası Oliy Majlisi Senatı aǵzasın saylaw boyınsha Qaraqalpaqstan Respublikası Joqarǵı Keńesi, Xalıq deputatları rayonlıq hám qalalıq Keńesleri deputatlarınıń qospa májilisi bolıp ótti.  Saylaw kodeksiniń 78-statyasına muwapıq qospa májilisti Ózbekstan Respublikası Oraylıq saylaw komissiyası baslıǵı Z.Nizamxodjaev ashtı. Ózbekstan hám Qaraqalpaqstan Respublikalarınıń gimnleri jańladı. Ózbekstan Respublikası Oraylıq saylaw komissiyası baslıǵı Saylaw kodeksine muwapıq bosaǵan orınǵa Ózbekstan Respublikası Oliy Majlisi Senatı aǵzasın saylawdı ótkeriw tártip-qaǵıydalarına toqtap ótti. Májiliske basshılıq etiwge 31-sanlı «Orta qala» saylaw okruginen deputat A.Davletovtı usınıs etti. Bul usınıs deputatlar tárepinen qollap-quwatlandı. Bunnan keyin qospa májilis jumısın támiyinlew hám júrgiziw ushın jumısshı quramı, Ózbekstan Respublikası Oliy Majlisi Senatı aǵzalıǵına talaban kórsetiw boyınsha Másláhát keńesi, májilis sekretariatı, esap-sanaq komissiyasınıń aǵzaları ashıq dawıs beriw jolı menen saylap alındı. Qaraqalpaqstan Respublikası Joqarǵı Keńesi, Xalıq deputatları rayonlıq hám qalalıq Keńesleri deputatlarınan saylanǵan Másláhát keńesi aǵzalarınıń basqa bólmede Ózbekstan Respublikası Oliy Majlisi Senatı aǵzalıǵına bosaǵan orınǵa talaban kórsetiw boyınsha májilisi bolıp ótti. Másláhát keńesiniń baslıǵı 45-sanlı «Shomanay» saylaw okruginen Qaraqalpaqstan Respublikası Joqarǵı Keńesiniń deputatı U.Jalmenov májiliste qabıl etilgen qarar boyınsha málimleme berdi. Senat aǵzasın saylaw boyınsha ótkeriletuǵın jasırın dawıs beriw byulletenine kirgiziw ushın tańlap alınǵan deputattıń kandidaturası qospa májilis dodalawına usınıldı. Qospa májilis Másláhát keńesi tárepinen Senat aǵzacın saylaw boyınsha saylaw byulletenine kirgiziw ushın 56-sanlı «Berdaq» saylaw okruginen Qaraqalpaqstan Respublikası Joqarǵı Keńesiniń deputatı, Qaraqalpaqstan Respublikası Joqarǵı Keńesiniń Baslıǵı A.Orınbaev usınıldı. Ashıq-aydınlıq penen ótken dodalawlardan soń deputatlarǵa talabannıń miynet jolı, turmıslıq tájiriybesi, basshılıq qábileti,   Watandı súyiwshiligi hám insanıylıq pazıyleti boyınsha pikir-usınıslar bildirildi. Ashıq dawıs beriw jolı menen Másláhát keńesi tárepinen usınılǵan deputattıń kandidaturasın jasırın dawıs beriw byulletenine kirgiziw boyınsha qarar qabıl etildi. Bunnan keyin Senat aǵzasın saylaw bolıp ótti. Demokratiyalıq principler tiykarında ótken saylawda hár bir deputattıń jasırın dawıs beriwi shólkemlestirildi. Esap-sanaq komissiyasınıń aǵzaları belgilengen tártipte talabanǵa berilgen dawıslardı sanap shıqtı hám nátiyjeleri járiyalandı. Nátiyjeler boyınsha 56-sanlı «Berdaq» saylaw okruginen Qaraqalpaqstan Respublikası Joqarǵı Keńesiniń deputatı, Qaraqalpaqstan Respublikası Joqarǵı Keńesiniń Baslıǵı A.Orınbaev Ózbekstan Respublikası Oliy Majlisi Senatınıń aǵzası etip saylandı. Usınıń menen Qaraqalpaqstan Respublikası Joqarǵı Keńesi, Xalıq deputatları rayonlıq hám qalalıq Keńesleri deputatlarınıń qospa májilisi óz jumısın juwmaqladı.

D.ABIBULLAEV,

Qaraqalpaqstan xabar agentliginiń sholıwshısı.

M.HABIBULLAEV tıń túsirgen súwretleri.