Xalqımızdıń abadan turmısın támiyinlewge qaratılǵan tariyxıy hújjet
982
Búgingi kúnde Ózbekstan Respublikası Prezidenti Sh.M. Mirziyoevtiń basshılıǵında barlıq aymaqlar qatarında Qaraqalpaqstan Respublikasında da keń kólemli dóretiwshilik jumısları alıp barılıp, xalıqtıń abadan turmısın támiyinlewge hám qolaylı sharayatlar jaratıwǵa ayrıqsha itibar qaratılmaqta.
Ásirese, Ózbekstan Respublikası Prezidentiniń 2022-jıldıń 31-avgusttaǵı «Qaraqalpaqstan Respublikasında isbilermenlik, innovaciyalıq texnologiyalar hám infrastrukturalardı jedel pátlerde rawajlandırıw arqalı xalıqtıń abadanlıǵın arttırıwdıń qosımsha ilajları haqqında»ǵı PP-213-sanlı Pármanınıń qabıl etiliwi bul baǵdardaǵı ilajlar kólemin jańa basqıshlarǵa kótermekte.
Pármanda Qaraqalpaqstan Respublikasınıń sociallıq, ekonomikalıq, sonıń ishinde, óndirislik hám investiciyalıq potencialınan nátiyjeli paydalanıw, isbilermenlik jumısın rawajlandırıw hám joqarı qosımsha qunǵa iye básekiles ónimler islep shıǵarıwdı xoshametlew, isbilermenlerge kórsetiletuǵın finanslıq xızmetler kólemin keńeytiw, infrastrukturalıq sharayatlardı jaratıp beriw arqalı xalıqtıń bántligin támiyinlew hám aymaqtıń ekonomikalıq jáne sociallıq rawajlanıwın jańa basqıshqa alıp shıǵıwǵa ayrıqsha itibar qaratılǵan.
Pármanǵa muwapıq, Qaraqalpaqstan Respublikasınıń barlıq rayonlarında jaylasqan hám usı aymaqta jumıs alıp barıp atırǵan isbilermenlik subektleri ushın 2023-jıl 1-yanvardan 2028-jıl 1-yanvarǵa shekemgi dáwirde payda salıǵı, aylanıstan alınatuǵın salıq, yuridikalıq táreplerdiń múlkine salınatuǵın salıq hám yuridikalıq táreplerden alınatuǵın jer salıǵı boyınsha salıq stavkaları 50 procentke azaytılǵan halda berilip atırǵan jeńillikler nátiyjesinde, respublikamız boyınsha 18731 isbilermenlik subektinde, jámi 201,2 milliard sum kárxana ıqtıyarında qalıwı kútilmekte.
Sonıń menen birge, Qaraqalpaqstan Respublikasında xalıqtıń turmıs sharayatın jáne de jaqsılaw hám respublikadaǵı sociallıq-ekonomikalıq mashqalalardı sheshiw jáne awır sharayatlı aymaqlardı qollap-quwatlawǵa baǵdarlaw maqsetinde 2022-jıl 3-sherekten baslap 2024-jıldıń aqırına shekem hár sherektiń juwmaǵında qosımsha qun salıǵı boyınsha dáramatlar prognozınıń arttırıp orınlanǵan bólegi, burınǵısınan basqasha tárizde, tolıq Qaraqalpaqstan Respublikasında qaldırılmaqta.
Sońǵı jıllarda elimizde bilimlendiriw tarawın bunnan bılay da rawajlandırıw, kadrlar tayarlawdıń sapasın arttırıw, orta arnawlı hám joqarı bilimlendiriwdi jańa basqıshqa kóteriwge de ayrıqsha itibar qaratılıp, bul baǵdarda bir qatar hújjetler qabıl etildi.
Jańa pármanda da Qaraqalpaqstan Respublikasında bilimlendiriw tarawında qosımsha imkaniyatlar hám insan kapitalı rawajlanıwın jańa basqıshqa kóteriwge sharayat jaratıw baǵdarı sheńberinde 2022-2023-oqıw jılı ushın Qaraqalpaqstan Respublikasında ulıwma orta, orta-arnawlı hám professional bilimlendiriw mákemelerin tamamlaǵan 500, keyingi jılları ushın bolsa hár jılı 1-sentyabrge shekem 6 500 jaslardıń wálayatlardaǵı mámleketlik joqarı bilimlendiriw mákemelerine qosımsha qabıllaw parametrleri tiykarında oqıwǵa qabıl etiw belgilengen.
Sonday-aq, Qaraqalpaqstandaǵı mámleketlik joqarı bilimlendiriw mákemelerin kúshli professor-oqıtıwshılar menen támiyinlew maqsetinde mámleketimizdiń jetekshi joqarı oqıw orınlarında ekologiya, awıl xojalıǵı, irrigaciya hám qurılıs baǵdarları boyınsha 2023-jıldan baslap, tayanısh doktoranturada kadrlardı maqsetli tayarlawdı jolǵa qoyıw tapsırılǵan.
Pármanda belgilengen jáne bir jeńilliklerden biri bul nuranıylardı, imkaniyatı sheklengen shaxslardı qollap-quwatlaw menen baylanıslı bolıp tabıladı. Yaǵnıy, 2022-jıl 15-sentyabrden baslap Qaraqalpaqstan Respublikası hám Xorezm wálayatlarında jasaytuǵın jasına baylanıslı pensiya hám napaqa alatuǵınlar, mayıplıǵı bolǵan adamlar ushın temir jol hám aviajolawshılar ushın biletlerdi satıw 50 procentlik jeńillikli tarifler boyınsha ámelge asırılsın jáne jolawshı tasıwshı kompaniyalardıń usı jeńillikti beriwge baylanıslı qárejetleri Ózbekstan Respublikası respublikalıq byudjeti qarjılarınıń esabınan qaplap beriletuǵın boldı.
Búgingi kúnde Joqarǵı Keńes deputatları tárepinen bul pármannıń mazmunı hám áhmiyeti haqqında barlıq mámleketlik uyımlar hám shólkemlerde, awıllarda hám máhállelerde ótkeriletuǵın ushırasıwlarda, isbilermenlik subektleri ortasında, oqıw orınlarında keńnen úgit-násiyatlanbaqta.
Álbette, pármanda belgilengen wazıypalar nátiyjeli ámelge asırılıwı respublikamızdıń sociallıq-ekonomikalıq jaqtan rawajlanıwı jedellesip, xalıqtıń turmısın jaqsılawǵa bekkem tiykar boladı.
Zuxra Reymova, Qaraqalapqstan Respublikası Joqarǵı Keńesiniń komitet baslıǵı