Awıl xojalıǵı tarawına arnalǵan videoselektor májilisi bolıp ótti

Qaraqalpaqstan Respublikası Joqarǵı Keńesiniń Baslıǵı Amanbay Orınbaev awıl xojalıǵı tarawına arnalǵan videoselektor májilisin ótkerdi. Ótkerilgen májiliste búgingi kúnde gúzlik biyday egisiniń barısı, shor juwıw hám egislik maydanların tayarlaw, bul baǵdardaǵı jumıslardı nátiyjeli alıp barıw boyınsha máseleler kórip shıǵıldı. Sonıń menen birge ayırım rayonlar gúzlik biyday egisi rejesinen artta qalıp atırǵanlıǵı sınǵa alınıp, bul boyınsha Qaraqalpaqstan Respublikası Joqarǵı Keńesi tárepinen biriktirilgen isshi toparǵa tiyisli tapsırmalar berildi. Aytıp ótiw orınlı, búgingi kúnde respublikamız aymaǵında paxta terimi mapazı dawam etip atırǵan bolıp, májilis dawamında bul baǵdardaǵı jumıslardıń shólkemlestiriliwi barısı haqqında sóz etildi. Sonday-aq, onda respublikamızdıń bir neshe rayonlarında jumıslar nátiyjeli shólkemlestirilmegenligi sınǵa alınıp, jıyın-terim jumısların maqsetke muwapıq alıp barıw baǵdarında paxta dalalarında terimshiler ushın qolaylı shárayat jaratıw, ıssı awqat, transport penen támiyinlew, terilgen paxta ushın óz waqtında tólemlerdi ámelge asırıw tapsırması berildi. Májilis dawamında orınlardaǵı nızamsız egilgen salı atızları haqqında sóz etilip, bul boyınsha monitoring júrgiziw, hár bir gektar ushın shártnamalardı dúzdiriw, alınǵan zúrááttiń dán kárxanalarına tapsırılıwın támiyinlew, paydalanılǵan suw hám elektr energiyası resursları ushın tiyisli járiymalardı qollaw hám óndiriw boyınsha belgilengen isshi topar aǵzalarına tapsırmalar berildi. Májilis sońında aymaqlarda jıyın-terim mapazında májbúriy miynet hám balalar miynetine jol qoymaw boyınsha qatań eskertildi.

Qaraqalpaqstan Respublikası Joqarǵı Keńesiniń Málimleme xızmeti