Qurılısda deputatlıq qadaǵalaw jumısları alıp barılmaqta
978
10-sentyabr kúni Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵında respublikamız aymaǵındaǵı qurılıs jumıslarınıń barısı boyınsha videoselektor májilisi bolıp ótken edi. Onda Joqarǵı Keńes Baslıǵı tárepinen deputatlarǵa óz aymaqlarında alıp barılıp atırǵan qurılıs jumıslarınıń júrgiziliwi hám óz waqtında paydalanıwǵa tapsırılıwı, ajıratılǵan qarjılardıń maqsetke muwapıq jumsalıwı hám qurılıstıń sapalı alıp barılıwı boyınsha deputatlıq qadaǵalawdı turaqlı jolǵa qoyıw boyınsha tapsırmalar berilgen edi.
Tapsırmanıń orınlanıwın támiynlew maqsetinde Qaraqalpaqstan Respublikası Joqarǵı Keńesi deputatları Z.Abdullaeva hám S.Gichgeldieva Tórtkúl rayonı «Góne Tórtkúl» APJda jaylasqan 12-sanlı ulıwma bilim beriw mektebiniń qurılısı jumısların úyrenip shıqtı.
320 orınlı mektep imaratında qurılıs jumısları alıp barılǵan bolıp, 31-avgustta paydalanıwǵa tapsırılǵan hám búgingi kúnde mektep oqıwshıları oqıwı dawam ettirilip atır. Bunnan tısqarı, mekteptiń úsh etajlı jámi 420 orınlı jańa imaratınıń qurılısı jedel pátte dawam etpekte. Deputatlar kesip alıp islewshi kárxana juwapkerlerine qurılıs jumıslarınıń óz waqtında juwmaqlanıwı boyınsha turaqlı túrde deputatlıq qadaǵalawı júrgiziletuǵınlıǵı boyınsha aytıp ótti hám bul baǵdarda birge islesiw kerekligin atap ótti.
Bunnan soń deputatlar «Shoraxan» APJ aymaǵında jaylasqan 44-sanlı ulıwma bilim beriw mektebiniń 220 orınlı imaratında hám sport zalında alıp barılǵan qurılıs jumısları menen tanıstı hám mekteptiń jańadan qurılıp atırǵan 2 etajlı 330 orınǵa arnalǵan jańa imaratınıń qurılıs jumısların kózden ótkerdi. Úyreniwler dawamında qurılıs jumıslarınıń talap dárejesinde alıp barılmay atırǵanlıǵı, zárúr bolǵan qurılısshılar sanınıń az ekenligi anıqlanıp, qurılıs jumısların óz waqtında juwmaqlanıwı deputatlar qadaǵalawında ekenligi boyınsha juwapkerler eskertildi.
Qaraqalpaqstan Respublikası Joqarǵı Keńesiniń Málimleme xızmeti