Qaraqalpaqstan Respublikası Joqarǵı Keńesiniń Baslıǵı Amanbay Orınbaev Izrail mámleketi delegaciyasın qabılladı
2267
Búgin Izrail mámleketiniń Ózbekstan Respublikasındaǵı elshisi Zeavit Ben Xilel, Izrail Sırtqı isler Ministrligi janındaǵı xalıqaralıq birge islesiwdi rawajlandırıw agentligi (MASHAV) baslıǵı Eynat Shleyn Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń qabıllawında boldı.
Qabıllawda Izrail mámleketi hám Qaraqalpaqstan Respublikası ortasında xalıqaralıq birge islesiwdi jolǵa qoyıw máseleleri qarap shıǵılıp, onda Izrail mámleketiniń aldınǵı tájiriybeleri tiykarında jergilikli jaslar ham qánigelerdiń bilimin arttırıw, birge islesiw maqsetinde jańa joybarlar ústinde islew, sonday-aq, joqarı oqıw orınları studentleriniń bilimin jetilistiriw baǵdarında seminar-treningler shólkemlestiriw boyınsha sóz etildi.
Sonıń menen birge, aymaqtaǵı suw tamtarıslıǵı jaǵdayında suwdı únemlewshi texnologiyalardı elede en jaydırıw, kollektor hám aqaba suwların qayta islew arqalı awıl xojalıǵı egislik maydanlarında paydalanıw, bul baǵdarda Izrail tájiriybeleri tiykarında qánigelerdiń bilim hám kónlikpelerin arttırıw boyınsha pikir-usınıslar bildirildi.
Ushırasıwda Qaraqalpaqstan Respublikasınıń turistlik potencialınan keńirek paydalanıw, bul baǵdarda safari tur hám ekoturizmdi en jaydırıw, sonday-aq, aymaqtaǵı qorıqxanalar, ekzotikalıq qumlı dalańlıqlardıń ózine tán tábiyatı sıyaqlı aymaq ózgesheliklerin kórsetiwdi keńnen jolǵa qoyıw kerekligi ayrıksha atap ótilip, miymanlar bul baǵdarda birge islesiwden mápdar ekenligin bildirdi.
Óz náwbetinde, Qaraqalpaqstan Respublikası Joqarǵı Keńesiniń Baslıǵı Amanbay Orınbaev miymanlardıń keliwinen minnetdar ekenligin bildirip, birge islesiwdi jolǵa qoyıwda jańa baslamalardı qollap-quwatlaytuǵınlıǵın aytıp ótti.
Qaraqalpaqstan Respublikası Joqarǵı Keńesiniń Málimleme xızmeti