Qaraqalpaqstan Respublikası Joqarǵı Keńesiniń Baslıǵı Amanbay Orınbaev puqaralar múrájatları menen islesiw boyınsha videoselektor májilisin ótkerdi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev mámleketlik uyımlar hám shólkemler tárepinen xalıqtan kelip túsip atırǵan múrájatlar menen islesiwge arnalǵan videoselektor májilisin ótkerdi. Onda búgingi kúnde mákeme-shólkemler, ministrlik, jergilikli hákimlik hám basqarıw uyımlarına puqaralar tárepinen kelip túsken múrájatlar, xalıqtı qıynap kiyatırǵan mashqalalarǵa sheshim tabıw, sonday-aq, bul baǵdarda puqaralar múrájatlarına nemquraydılıq penen qarap kiyatırǵan ayırım tarawlar jumısları sın kóz qarasta talqılandı. Bıyılǵı jılda Prezident Virtual hámde Xalıq qabıllawxanalarına puqaralardan jámi 45 mıń 280 máselede múrájatlar kelip túsken hám bul ótken jıldıń usı dáwirine salıstırǵanda 5 payızǵa óskenligin kórsetedi. Májiliste óz náwbetinde ayırım rayonlar kesiminde múrájatlar sanı kemeygeni menen bir qatarda puqaralardıń mashqalalarına óz waqtında sheshim tabıwda kemshiliklerge jol qoyıp atırǵan rayonlarda múrajatlar sanı artqanlıǵına, sonday-aq, tarawlar kesiminde sociallıq járdem, jol qurılısı, gaz hám elektr támiynatı boyınsha da múrájatlar kóbeygenligine ayrıqSha toqtalıp ótildi. Májilis barısında Joqarǵı Keńes Baslıǵı múrájatlarǵa sheshim tabıwdaǵı kórsetkishler tómen ekenligi, kópshilik jaǵdayda kelgen múrájatlarǵa tek ǵana huqıqıy túsinik beriw menen ǵana sheklenip qalıp atırǵanlıǵı, mashqalalar sheshimin tappay qayta múrajat etiw, múrájatlar itibarsız qaldırılıwı jaǵdayların qatań sınǵa alıp, jumıslardı durıs shólkemlestirip alıw boyınsha barlıq mámleketlik basqarıw uyımları basshılarına qatań tapsırma berdi.

Qaraqalpaqstan Respublikası Joqarǵı Keńesiniń Málimleme xızmeti