Qaraqalpaqstan Respublikası Joqarǵı Keńesiniń Baslıǵı Amanbay Orınbaevtiń jeke qabıllawı bolıp ótti

Nókis qalasındaǵı «Istiqlol» balalar dem alıw baǵında Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń jeke qabıllawı bolıp ótti. Onda Ózbekstan Respublikası Prezidenti keńesgóyiniń birinshi orınbasarı U.Muxammadiev qatnastı. Ótkerilgen qabıllawda jeke qabıllawǵa jazılǵan dizim boyınsha puqaralardıń múrajatları tıńlanıp, ornında sheshim tabıw ilajları kórildi. Puqaralar tárepinen tiykarınan sociallıq, materiallıq hám medicinalıq járdemler, bántligin támiyinlew, bilimlendiriw, isbilermenlik iskerligindegi ushırasıp atırǵan mashqalalar, óz biznesin baslaw hám basqa da baǵdarlarda múrájatlar bildirildi. Aytıp ótiw orınlı, qabıllawda jámi 616 máselede 586 múrájat kelip túsken bolıp, ámelde 370 mashqala ornında unamlı sheshimin taptı, waqıt talap etiletuǵın múrájatlar Qaraqalpaqstan Respublikası Joqarǵı Keńesi Baslıǵınıń jeke qadaǵalawına alınıp, tez pursatta unamlı sheshiw boyınsha tiyisli taraw basshılarına tapsırmalar berildi. Sonday-aq, qabıllaw dawamında 235 puqaranıń ózin ózi bánt etiwine kómeklesilip, 13 puqara turaqlı jumıs penen támiyinlendi. 92 puqaraǵa materiallıq járdem ajıratıw, turaq jayın ońlaw, kontrakt pulların tólep beriw hám medicinalıq emleniwi ushın materiallıq járdem kórsetildi.

Qaraqalpaqstan Respublikası Joqarǵı Keńesiniń Málimleme xızmeti