Prezident Pármanı mazmun-áhmiyeti keń túrde túsindirilmekte
3811
Qaraqalpaqstan Respublikasın rawajlandırıw boyınsha Ózbekstan Respublikası Prezidentiniń 2022-jıl 31-avgust kúni «Qaraqalpaqstan Respublikasında isbilermenlik, innovaciyalıq texnologiyalar hám infrastrukturanı jedel pátlerde rawajlandırıw arqalı xalıqtıń abadanlıǵın arttırıwdıń qosımsha ilajları haqqında» ǵı 213-sanlı pármanı qabıl etilgen edi. Onda respublikanıń social-ekonomikalıq jaǵdayın jaqsılaw boyınsha bir qansha áhmiyetli wazıypalar belgilep berilgen bolıp, Qaraqalpaqstan Respublikası Joqarǵı Keńesi Baslıǵınıń Orınbasarı A.Davletov tárepinen orınlarda pármannıń mazmun-áhmiyetin túsindiriw boyınsha úgit-násiyat jumısları alıp barılmaqta.
Usınday ilajlar Kegeyli hám Shımbay rayonlarında ótkerilip, oǵan jergilikli Keńes deputatları, rayon hákimi orınbasarları, hákim járdemshileri hám ǵalaba xabar quralları wákilleri qatnastı.
Ótkerilgen májilisler dawamında pármannıń áhmiyeti haqqında keńnen sóz etilip, xalqımız arasında onıń mazmun-mánisin túsindiriw boyınsha úgit-násiyat jumısların elede dawam ettiriw, sonday-aq, párman orınlanıwın támiyinlew baǵdarındaǵı bir qansha wazıypalar belgilep alındı.
Aytıp ótiw orınlı, qabıl etilgen bul Párman menen Qaraqalpaqstan Respublikasınıń social-ekonomikalıq, óndiris hám investiciyalıq potencialınan nátiyjeli paydalanıw, isbilermenlikti rawajlandırıw, básekiles ónimler islep shıǵarıwdı qollap-quwatlaw, isbilermenlerge kórsetiletuǵın finanslıq xızmetler kólemin keńeytiw, xalıqtıń bántligin támiyinlewdiń tiykarǵı baǵdarları anıq belgilep berilgen hám bul baǵdardaǵı jumıslardıń jańa basqıshqa alıp shıǵılıwı kútilmekte.
Qaraqalpaqstan Respublikası Joqarǵı Keńesiniń Málimleme xızmeti