Xojeli rayonında úyreniw jumısları alıp barıldı
1294
Qaraqalpaqstan Respublikası Joqarǵı Keńesiniń nızamlılıq, sud-huqıq hám korrupciyaǵa qarsı gúresiw máseleleri boyınsha komiteti, xalıq deputatları Xojeli rayonlıq Keńesiniń sud-huqıq máseleleri hám korrupciyaǵa qarsı gúresiw máseleleri boyınsha turaqlı komissiyasınıń 2022-jıl 29-sentyabr kúni bolıwı belgilengen qospa májilisi aldınan Qaraqalpaqstan Respublikası Joqarǵı Keńesiniń komiteti baslıǵı Z.Reymova hám tiyisli taraw basshıları sonday-aq, rayonlıq keńes deputatları orınlarda úyreniw jumısların alıp bardı.
Úyreniwler dawamında jol transport hádiyseleri eń kóp ushırasıp atırǵan rayon orayındaǵı aylanba jol, Jipek jolı hám Mustaqıllıq kósheleriniń kesilispelerine svetofor ornatıw boyınsha usınıslar beriliwi kerekligi, sonıń menen birge, «Súwenli» mákan puqaralar jıyını imaratı átirapında abadanlastırıw jumıslarınıń talapqa juwap bermeytuǵınlıǵı aytıp ótildi.
Sonday-aq, Shaǵalakól mákan puqaralar jıyını aymaǵındaǵı kóp qabatlı úylerdiń sırtqı fasadın ońlaw jumısları hám usı máhalle aymaǵındaǵı 4-sanlı ulıwma bilim beriw mektebinde alıp barılıp atırǵan qurılıs jumısları kózden ótkerilip, qurılıs barısındaǵı qáte-kemshilikler hám olardı saplastırıw boyınsha rayon prokurorı orınbasarına tiyisli tapsırmalar berildi.
Úyreniwler dawamında bir qansha orınlar, sonıń ishinde qurılıs-ońlaw jumısları kórip shıǵılıp, juwmaǵı boyınsha qospa-májiliste qarap shıǵılıwı belgilendi.
