Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis rayonında boldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis rayonınıń social-ekonomikalıq jaǵdayı, rayonda búgingi kúnde xalıqtıń abadan turmısın támiyinlew baǵdarındaǵı jumıslar menen tanısıw maqsetinde rayonda boldı. Dáslep, Qaraqalpaqstan Respublikası Joqarǵı Keńesiniń Baslıǵı Nókis rayonındaǵı qurılıs jumısları menen tanıstı. Sonday-aq, aymaqtıń gúz-qıs máwsimine tayarlıq kóriw barısıda kózden ótkerilip, “Samanbay” APJda jaylasqan 19-sanlı ulıwma bilim beriw mektebiniń qosımsha jańa imaratı qurılıs jumısları menen tanıstı. Qurılıs jumıslarındaǵı artta qalıwlar boyınsha tiyisli taraw wákillerine tapsırma berildi. Bunnan soń Qaraqalpaqstan Respublikası Joqarǵı Keńesiniń Baslıǵı Amanbay Orınbaev barlıq ministrlik, komitet, basqarma, shólkem basshıları, sonday-aq, Nókis rayonınıń belsendileri, sektor basshıları, kárxana hám shólkem baslıqları qatnasıwında májilis ótkerdi. Ótkerilgen májiliste rayonnıń sociallıq-ekonomikalıq hám infrastrukturalıq jaǵdayın jaqsılaw baǵdarında ámelge asırılıp atırǵan jumıslar hám bul baǵdardaǵı ayırım kemshilikler haqqında sóz etildi. Joqarǵı Keńes Baslıǵı tárepinen mámleketlik baǵdarlamalardıń orınlanıwı, byudjet qarjılarınıń maqsetsiz jumsalıwı, ajıratılǵan subsidiyalardıń talan-taraj etilgenligi, esabatlarda qosıp jazıwlar, nızam buzıwshılıq jaǵdayları ushırasıp atırǵanlıǵı qatań sınǵa alınıp, bul boyınsha tiyisli taraw wákillerine úyreniw jumısların alıp barıw hám zárúr jaǵdayda shara kóriliwin támiyinlew boyınsha tapsırmalar berildi.

Qaraqalpaqstan Respublikası Joqarǵı Keńesiniń Málimleme xızmeti