Moynaq rayonı Qazaqdárya elatındaǵı «Shárwashılıq kompleksi»nde awıl xojalıǵına arnalǵan kórgizbeli seminar bolıp ótti

Búgin Moynaq rayonı Qazaqdárya elatındaǵı «Sharwashılıq kompleksi»nde awıl xojalıǵına arnalǵan kórgizbeli seminar bolıp ótti. Seminarǵa Qaraqalpaqstan Respublikası Joqarǵı Keńesiniń Baslıǵı Amanbay Orınbaev hám Qaraqalpaqstan Respublikası Ministrler Keńesiniń Baslıǵı Qaxraman Sariev qatnastı.

Ótkerilgen seminarda awıl xojalıǵı tarawı miynetkeshleri, sharwashılıq tarawı qánigeleri fermer hám dıyqanlar menen joqarı oqıw orınlarınıń studentleri awıl xojalıǵı tarawında eń shetki hám qıyın shárayatlı Qazaqdárya elatı mısalında joqarı jetiskenlikke erisiw usılları menen tanıstı.

Onda sharwashılıq tarawında alıp barılıp atırǵan jumıslar, sonıń ishinde násilli qara mallardı jergikli klimatımızǵa beyimlestiriw, násilshilik hám olardan joqarı kórsetkishli násil alıw, gósh-sút ónimlerin islep shıǵarıw, bazarlarımızdı arzan ónimler menen támiyinlew, qara mallar ushın juǵımlı ot-jem tayarlaw baǵdarındaǵı jetiskenlikler kózden ótkerildi. Sonday-aq, awıl xojalıǵı maydanları ushın tamshılatıp suwǵarıw texnologiyasın engiziw arqalı suwdan únemli paydalanıw, shorlanǵan maydanlarda dekorativ terek nállerin ósiriw, irrigaciya tarmaqlarında suwdan nátiyjeli paydalanıw ushın jańa texnologiya hám usıllardı paydalanıw boyınsha aldınǵı tájiriybeler seminar qatnasıwshıları dıqqatına usınıldı.

Keń kólemli túrde shólkemlestirilgen seminarda awıl xojalıǵı tarawı boyınsha kórgizbe de shólkemlestirildi. Aytıp ótiw orınlı, búgingi ótkerilgen seminarǵa student-jaslar hám aymaq turǵınları da qatnasıp, «Sharwashılıq kompleksi»nde ámelge asırılǵan jumıslar menen jaqınnan tanıstı. Ótkerilgen ilajlar juwmaǵında awıl xalqı hám seminar qatnasıwshıları dıqqatına koncert baǵdarlaması usınılıp, oǵan kórkem-óner hám mádeniyat tarawı xızmetkerleri, estrada qosıqshıları qatnastı.

       

Qaraqalpaqstan Respublikası Joqarǵı Keńesiniń Málimleme xızmeti