Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń Múǵállimler hám ustazlar kúni múnásibeti menen bayram qutlıqlawı

Qádirli ustazlar! Eń dáslep, siz ázizlerdi, tálim-tárbiya tarawınıń barlıq xızmetkerlerin ulıwma xalıqlıq bayram — Múǵállimler hám ustazlar kúni menen shın júregimnen qutlıqlayman. Búgingi qutlı sánede siz-pidayı ustazlarǵa kewlimizde, júregimizde bolǵan húrmetimizdi hám jaqsı tileklerimizdi sóz benen jetkerip beriw qıyın, álbette. Óytkeni, sizler dúnyadaǵı eń biybaha baylıqtı jaratıw, onı xalqımızǵa, ónip-ósip kiyatırǵan jas áwladqa jetkeriw jolında ayanbay miynet etip atırǵan ullı insanlarsız. Mámleketimizde sońǵı jıllarda ilim hám tálim-tárbiya tarawın mámleketlik siyasattıń áhmiyetli jónelisine aylandırıwǵa qaratılǵan, perzentlerimizdiń hár tárepleme jetik, kámil insan bolıp jetilisiwine hám ómirde óz ornın tabıwına xızmet etetuǵın birden-bir sistema jaratılmaqta. Búgingidey jańalanıwlar processinde múǵállim hám ustazlardıń kásibine degen juwapkershiligi túp-tiykarınan ózgerip, olardıń turaqlı túrde izlenip, jańalıqqa umtılıp jasap atırǵanı, aldıńǵı bilimlendiriw texnologiyaları hám metodikaların puqta ózlestirip atırǵanı oǵada úlken áhmiyetke iye bolmaqta. Húrmetli múǵállimler hám ustazlar! Siz, ázizlerdi búgingi bayramıńız benen jáne bir márte qızǵın qutlıqlap, bársheńizge tereń densawlıq, shańaraǵıńızǵa tatıwlıq, mashaqatlı jumıslarıńızda tasqın tabıslar tileymen. Amanbay Orınbaev, Qaraqalpaqstan Respublikası Joqarǵı Keńesiniń Baslıǵı