Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń jeke qabıllawı bolıp ótti
2169
Búgin Shımbay rayonında Taxtakópir, Qaraózek, Shımbay, Bozataw, Kegeyli hám Nókis rayonı puqaraları ushın Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń jeke qabıllawı bolıp ótti.
Onda Ózbekstan Respublikası Prezidenti keńesgóyiniń birinshi orınbasarı U.Muxammadiev qatnastı.
Ótkerilgen qabıllawda jeke qabıllawǵa jazılǵan dizim boyınsha puqaralardıń múrájatları tıńlanıp, ornında sheshim tabıw ilajları kórildi.
Puqaralar tárepinen tiykarınan sociallıq, materiallıq hám medicinalıq járdemler, bántligin támiyinlew, bilimlendiriw, isbilermenlik iskerligindegi ushırasıp atırǵan mashqalalar, gaz, elektr energiyası, ishimlik suwı hám ishki jollar boyınsha múrájatlar bildirildi.
Aytıp ótiw orınlı, qabıllawda 469 máselede 456 múrájat kelip túsken bolıp, sonnan 242 mashqala ornında unamlı sheshimin taptı, waqıt talap etiletuǵın múrájatlar Qaraqalpaqstan Respublikası Joqarǵı Keńesi Baslıǵınıń jeke qadaǵalawına alınıp, tez pursatta unamlı sheshiw boyınsha tiyisli taraw basshılarına tapsırmalar berildi.
Máselen, Taxtakópir rayonı turǵını Bauırjan Kıdırbaevqa 15 million materiallıq járdem berilgen bolsa, Svetlana Madreymovanıń perzentine kontrakt pulları tólep beriletuǵın boldı.
Bozataw rayonı turǵını Ismetova Gúlsaranıń turaq jayınıń kadastr hújjetleri joq ekenligi boyınsha etken múrájatı onıń kem támiyinlengenligi esapqa alınıp, sol orınnıń ózinde kadastr xújjetleri biypul rásmiylestirilip berildi.
Shımbay rayonı Abat MPJ turǵını Razbekov Kewlimjaydıń MPJ aymaǵındaǵı kóshelerge, Qaraózek rayonı Esim ózek APJ turǵını Súyewbay Esjanovtıń awıl aymaǵına ЩPS (Qum щeben aralaspasın) tósew boyınsha etken múrájatları da sol orınnıń ózinde unamlı sheshilip, aymaqqa kerekli bolǵan ЩPS materialı jetkerip beriletuǵın boldı.
Kegeyli rayonı Aqtuba APJ turǵını bolǵan kóp balalı ana Turǵanbaeva Feruza apanıń turaq jay boyınsha etken múrájatı unamlı sheshilip Jılwanjap MPJdan 4 xanalı sociallıq turaq jay berildi.
Álbette, puqaralar mashqalaların sheshiw jolındaǵı bunday qabıllawlar elimizde insan qádiri ushın principinde alıp barılıp atırǵan reformalardıń jáne bir kórinisi boları sózsiz.
Qaraqalpaqstan Respublikası Joqarǵı Keńesiniń Málimleme xızmeti