Joqarǵı Keńes Baslıǵınıń tapsırmasına muwapıq Nókis rayonında úyreniw jumısları alıp barılmaqta

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis rayonınıń social-ekonomikalıq jaǵdayı, rayonda búgingi kúnde xalıqtıń abadan turmısın támiyinlew baǵdarındaǵı jumıslar menen tanısıw maqsetinde rayonda bolıp, kemshiliklerdi sınǵa aldı. Joqarǵı Keńes Baslıǵı Amanbay Orınbaev Nókis rayonında mámleketlik baǵdarlamalardıń orınlanıwın támiyinlew hám berilgen tapsırmalardı qadaǵalap barıw ushın Joqarǵı Keńestiń Nızamlılıq, sud-huqıq hám korrupciyaǵa qarsı gúresiw máseleleri boyınsha komiteti baslıǵı Z.Reymovanı Nókis rayonına juwapker etip bekitken edi. Joqarǵı Keńes Baslıǵı tárepinen berilgen tapsırmalardıń orınlanıwın támiyinlew maqsetinde Joqarǵı Keńestiń komitet baslıǵı Z.Reymova tárepinen bir qansha úyreniw jumısları alıp barıldı. Máselen, «Baqanshaqlı» awıl puqaralar jıyını aymaǵında 2 km uzınlıqtaǵı piyadalar jolın salıw belgilenip, "UNIVERSAL PREMIUM STROY" JShJ tárepinen qurılıs jumısları ele baslanbastan turǵanlıǵı anıqlandı. Aymaqtıń sektor basshısı hám JShJ baslıǵına qurılıs jumısların óz waqtında juwmaqlaw boyınsha tapsırmalar berildi. Rayon orayındaǵı 1-sanlı hám Tóktaw” MPJdaǵı 3-sanlı mektepke shekemgi bilimlendiriw shólkemleriniń qurılıs jumıslarınıń sapasına itibar qaratıw hám óz múddetinde paydalanıwǵa tapsırıw lazımlıǵı túsindirildi. Jańadan salınıp atırǵan Mámleketlik xızmetler orayı imaratınıń qurılısı ushın respublika byudjeti esabınan 3 mlrd. 800 mln. swm qarjı ajıratılıp, "Qalbax qurılıs" JShJ tárepinen qurılıs jumısları ámelge asırılıwı belgilengen bolsada, búgingi kúnde jumıslar toqtap qalǵanlıǵı anıqlandı hám qadaǵalawǵa alınıp, nemquraydılıq ushın jaza belgilenetuǵınlıǵı eskertildi. Sonıda atap ótiw orınlı, Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis rayonına bolǵan saparı dawamında rayondaǵı qurılıs jumıslarınıń múddetinen artta qalıp atırǵanlıǵın qatań sınǵan alıp, taraw juwapkerleri eskertilgen edi. Sonıń menen birge jumısındaǵı qáte kemshilikler hám nemquraydılıq múnásibeti ushın Nókis rayonı hákiminiń birinshi orınbasarı jumıstan bosatılıp, eki orınbasarına sógis járiyalanǵan edi. Usılar menen bir qatarda bir hákim járdemshisi menen rayonlıq irrigaciya bólimi baslıǵı da lawazımnan bosatılǵan edi.

Qaraqalpaqstan Respublikası Joqarǵı Keńesiniń Málimleme xızmeti