Ózbekstan Respublikası Prezidentiniń qararı
Ózbekstan Respublikası Prezidentiniń 2022-jıl 28-yanvardaǵı «2022-2026-jıllarǵa mólsherlengen Jańa Ózbekstannıń rawajlanıw strategiyası haqqında»ǵı PP-60-sanlı Pármanına muwapıq, sonday-aq, respublikada toqımashılıq sanaatındaǵı maman kadrlarǵa bolǵan talaptı qanaatlandırıw maqsetinde:
- Namangan qalasında Namangan toqımashılıq sanaatı institutı (keyingi orınlarda – Institut) shólkemlestirilsin.
Institutta oqıw procesi
2023-2024-oqıw jılınan baslanatuǵını hám kredit-modul sisteması tiykarında shólkemlestiriletuǵını belgilensin.
- Tómendegiler Instituttıń tiykarǵı wazıypaları etip belgilensin:
toqımashılıq sanaatı tarmaqları ushın miynet bazarında básekige shıdamlı, joqarı mamanlıqqa iye
joqarı maǵlıwmatlı hám ilimiy-pedagog kadrlar tayarlaw, sonday-aq, qánigelerdi qayta tayarlaw jáne olardıń mamanlıǵın arttırıw;
bilimlendiriw baǵdarlamaların jetekshi sırt el joqarı bilimlendiriw shólkemleri menen birgelikte, sonıń ishinde, qospa bilimlendiriw baǵdarlamaları tiykarında engiziw hám ilimiy izertlewler alıp barıw;
bilimlendiriw menen óndiristiń integraciyasın kúsheytiw, taraw shólkemlerinde studentlerdiń mamanlıq ámeliyatın jolǵa qoyıw, kafedra filialların hám professor-oqıtıwshılardıń stajirovkasın shólkemlestiriw;
oqıw procesin
studentlerde erkin bilim alıw, sistemalı tallaw, dóretiwshilik pikirlew hám ámeliy, sonıń ishinde,
isbilermenlik kónlikpelerin rawajlandırıwǵa baǵdarlaw;
oqıw procesine aldınǵı sırt el tájiriybesin, sonıń ishinde,
zamanagóy bilimlendiriw texnologiyaların engiziw, ashıq málimleme-bilimlendiriw ortalıǵın támiyinlew;
ilimiy-pedagogikalıq potencialdı arttırıp barıw, sonıń ishinde, professor-oqıtıwshılardıń stajirovkasın hám mamanlıq arttırıwın abıraylı jergilikli hám sırt el joqarı bilimlendiriw shólkemleri hám ilimiy-izertlew oraylarında shólkemlestiriw.
- Institutta bilimlendiriw procesi abıraylı sırt mámleketlerdiń joqarı bilimlendiriw shólkemleri menen birgelikte, sonıń ishinde, qospa bilimlendiriw baǵdarlamaları tiykarında shólkmelestiriletuǵını belgilensin.
Joqarı hám orta arnawlı bilimlendiriw ministrligi Prezident bilimlendiriw agentligi, «Óztoqımashılıqsanaat» associaciyası hám «Ózbekstan paxta-toqımashılıq klasterleri» associaciyası menen birgelikte;
- a) 2023-2024-oqıw jılına shekem toqımashılıq sanaatı rawajlanǵan sırt mámleketlerdiń joqarı bilimlendiriw shólkemlerin sherik sıpatında belgilep, Instituttıń bilimlendiriw procesin zamanagóy oqıw baǵdarlamaları tiykarında shólkemlestirsin;
- b) 2023-2024-oqıw jılınan baslap:
Instituttıń professor-oqıtıwshıları, doktorantları hám magistrantların sırt mámleketlerdiń jetekshi joqarı bilimlendiriw shólkemlerine
ilimiy stajirovka hám mamanlıq arttırıwǵa jiberiw ilajların kórsin;
Institut
studentleriniń tanısıw hám mamanlıq ámeliyatın sırt el hám jergilikli iri toqımashılıq kárxanalarında ótew sistemasın engizsin;
Institut studentleriniń pánlerdi ózlestiriw kórsetkishin hám professor-oqıtıwshılardıń jumıs nátiyjesin
xalıqaralıq standartlar tiykarında bahalaw sistemasın engizsin;
- v) 2024-2025-oqıw jılına shekem Institut janında toqımashılıq texnoparkiniń jumısın jolǵa qoysın.
Onda, Texnopark:
Namangan wálayatı hákimligi tárepinen tartılatuǵın xalıqaralıq shólkemlerdiń grantları hám potenciallı investorlardıń qarjıları esabınan, sonıń ishinde, mámleketlik-jeke menshik sheriklik shártleri tiykarında shólkemlestiriledi;
Institut shólkemlestiriwshiliginde juwapkershiligi sheklengen jámiyet túrinde shólkemlestiriledi hám oǵan texnologiyalıq ónimlerdi islep shıǵarıwdı jolǵa qoyıw hám kommerciyalastırıw huqıqı beriledi;
xojalıq jumısınan alınatuǵın dáramatlar, grantlar, qáwenderlik qayırqomlıqları, Instituttıń byudjetten tısqarı qarjıları hám nızamshılıq hújjetlerinde qadaǵan etilmegen basqa da dárekler esabınan qarjılandırıladı;
- g) 2026-2027-oqıw jılına shekem Instituttıń keminde 2 bakalavriat tálim baǵdarı hám 3 magistratura qánigeliginiń xalıqaralıq tán alınǵan shólkemler akkreditaciyasınan ótkeriliwin támiyinlesin.
- Institut quramında tómendegiler yuridikalıq tárep statusısız shólkemlestirilsin;
Toqımashılıq gezlemeleri texnologiyaları hám olardı izertlew jáne Boyaw-pardozlaw processleri texnologiyaları hám olardı izertlew laboratoriyalarınan ibarat toqımashılıq tarawında ilimiy-izertlew jumısı menen shuǵıllanatuǵın
Aldınǵı toqımashılıq qánigeligi mektebi;
bilimlendiriw procesinde hám onnan tısqarı waqıtlarda studentlerge zamanagóy lipas kórinislerin jaratıw imkaniyatın beretuǵın
Dizayn studiyası;
ilimiy-izertlew jetiskenliklerin kommerciyalastırıw hám jańa qollanba hám texnologiyalardı ámeliyatqa engiziw menen shuǵıllanatuǵın
Innovaciyalar hám texnologiyalar transferi orayı.
- Institutqa tómendegi huqıqlar berilsin:
xalıqaralıq tán alınǵan shólkemlerdiń ámeldegi reytinginde joqarı bilimlendiriw mákemeleri arasında
birinshi 1000 lıqqa kirgen sırt el joqarı bilimlendiriw mákemesiniń baǵdarlaması tiykarında óz bilimlendiriw baǵdarlamaların qáliplestiriw;
jumıs beriwshilerdiń talapları tiykarında oqıw rejelerindegi teoriyalıq bilimlendiriwdiń úlesin qısqartıw hám ámeliy sabaqlardıń kólemin arttırıw, joqarı kurs studentleri ushın háptelik
oqıw sabaqların «4+2» tártibinde shólkemlestiriw;
Institut jumısınıń baǵdarları boyınsha shártnama tiykarında
másláhát hám ekspert analitikalıq xızmetler kórsetiw hám ilimiy-izertlew hám innovaciyalıq xızmet kórsetiwshi kárxanalardı shólkemlestiriw;
bilimlendiriw hám ilimiy-izertlew procesine
sırt el qánigelerin tartıw jáne olarǵa miynet bazarınıń ámeldegi konyunkturasın esapqa alǵan halda, Instituttıń byudjetten tısqarı qarjıları esabınan aylıq miynet haqı hám basqa da tólemlerdi belgilew hám tólew;
professor-oqıtıwshılardı oqıw-metodikalıq, ilimiy-izertlew jumısları hám «ustaz-shákirt» sisteması boyınsha orınlaǵan jumıslarınıń nátiyjesi boyınsha xoshametlep barıw.
- Tómendegiler:
2023-2026-jıllarda Namangan toqımashılıq sanaatı institutın rawajlandırıw hám materiallıq-texnikalıq bazasın bekkemlew boyınsha ilajlar baǵdarlaması 1-qosımshaǵa muwapıq;
Namangan toqımashılıq sanaatı institutın 2026-jılǵa shekem rawajlandırıwdıń
maqsetli kórsetkishleri 2-qosımshaǵa muwapıq;
Namangan toqımashılıq sanaatı institutında shólkemlestiriletuǵın
bakalavriat tálim baǵdarları hám magistratura qánigelikleriniń dizimi 3-qosımshaǵa muwapıq tastıyıqlansın.
- Institut yuridikalıq tárep statusına iye bolǵan mámleketlik joqarı bilimlendiriw mákemesi esaplanatuǵını hám Joqarı hám orta arnawlı bilimlendiriw ministrligi sistemasında jumıs alıp baratuǵını;
Institutqa studentlerdi mámleketlik grant tiykarında qabıllaw parametrleri hár jılı tastıyıqlanatuǵın joqarı bilimlendiriw mákemelerine oqıwǵa qabıllawdıń mámleketlik buyırtpası sheńberinde anıqlanatuǵını;
2023-2024-oqıw jılınan baslap Namangan injenerlik-texnologiya institutına toqımashılıq sanaatı boyınsha bakalavriat hám magistratura basqıshlarında kadrlar tayarlaw boyınsha ajıratılatuǵın
mámleketlik buyırtpa kvotası Institutqa baǵdarlanatuǵını;
Namangan injenerlik-texnologiya institutınıń toqımashılıq sanaatı tálim baǵdarları hám qánigelikler boyınsha bilim alıp atırǵan studentlerdiń oqıwı Institutqa kóshiriletuǵını;
Institut jumısı Mámleketlik byudjet qarjıları, studentlerdi tólemli-kontrakt tiykarında oqıtıwdan túsetuǵın qarjılar, xojalıq jumısı hám shártnama tiykarında xızmetler kórsetiwden túsetuǵın qarjılar, qáwenderlik qayırqomlıqları hám grantlar jáne nızamshılıq hújjeti menen qadaǵan etilmegen basqa da dárekler esabınan qarjılandırılatuǵını;
Namangan injenerlik-texnologiya institutınıń toqımashılıq oqıw laboratoriyasınıń úskeneleri Institut balansına ótkeriletuǵını belgilensin.
- Joqarı hám orta arnawlı bilimlendiriw ministrligi:
- a) 2023-2024-oqıw jılına shekem:
Instituttı tańlaw tiykarında óndiris shólkemleri, joqarı bilimlendiriw hám ilimiy-izertlew mákemelerinde úlken ilimiy hám (yamasa) ámeliy tájiriybe arttırǵan qánigeler, tiykarǵı túrde, ilimiy dárejege iye bolǵan joqarı maman kadrlar menen tolıqtırıw ilajın kórsin;
Sırtqı isler ministrligi menen birgelikte xalıqaralıq abıraylı joqarı bilimlendiriw shólkemlerinde jumıs alıp baratuǵın
sırt elli hám (yamasa) sırt elde jasaytuǵın watanlas professor-oqıtıwshılardı shártnama tiykarında oqıw hám Aldınǵı toqımashılıq injenerligi mektebiniń ilimiy-izertlew processlerine tartıw ilajların kórsin;
Ekonomikalıq rawajlanıw hám kámbaǵallıqtı qısqartıw ministrligi, Mámleketlik aktivlerdi basqarıw agentligi menen birgelikte Institut qánigelesken fakultet hám kafedralarınıń sáykes baǵdarları boyınsha mámleketlik úleske iye
iri toqımashılıq kárxanaları menen birge islesiwin jolǵa qoyıw boyınsha «jol kartası»n tastıyıqlasın;
- b) Instituttıń ilimiy potencialın arttırıw maqsetinde:
Ekonomikalıq rawajlanıw hám kámbaǵallıqtı qısqartıw ministrligi menen birgelikte tiyisli magistratura qánigelikleri boyınsha Institut ushın kadrlardı maqsetli tayarlaw;
Innovaciyalıq rawajlanıw ministrligi menen birgelikte belgilengen tártipte Institut tayanısh doktoranturasına tiyisli qánigelikler boyınsha qabıllaw kvotaların belgilew ilajların kórsin.
- Ekonomikalıq rawajlanıw hám kámbaǵallıqtı qısqartıw ministrligi Joqarı hám orta arnawlı bilimlendiriw ministrligi menen birge tastıyıqlanǵan joybarlaw-smeta hújjetlerine tiykarlanıp Institut ushın jańa oqıw imaratları hám studentlerdiń turaq jayın qurıw jáne olardı úskenelew, Instituttıń imarat hám obektleriniń rekonstrukciyalaw joybarları 2023-jıl hám kelesi jıllarǵa mólsherlengen Ózbekstan Respublikasınıń sociallıq hám óndirislik infrastrukturasın rawajlandırıw baǵdarlamalarına belgilengen tártipte kirgiziliwin támiyinlesin.
- Institutqa Namangan qalası, «Gúlabad» MPJ, Qubla aylanba jol kóshesi, 17-jay mánzilinde jaylasqan Namangan isbilermenlikti shólkemlestiriw texnikumınıń imarat hám obektleri tiyisli aymaǵı menen birgelikte operativ basqarıw huqıqı tiykarında biypul berilsin.
- Joqarı hám orta arnawlı bilimlendiriw ministrligi mápdar ministrlikler hám uyımlar menen birgelikte eki ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.
- Usı qarardıń orınlanıwın nátiyjeli shólkemlestiriwge juwapker hám jeke juwapker etip joqarı hám orta arnawlı bilimlendiriw ministri A.X.Toshkulov hám Namangan wálayatı hákimi Sh.Sh.Abdurazakov belgilensin.
Usı qarardıń orınlanıwın qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidentiniń keńesgóyi O.Q.Abduraxmanovqa júklensin.
Ózbekstan Respublikası Prezidenti Sh.MIRZIYOEV
