“Qaraqalpaqstan Respublikası Joqarǵı Keńesiniń Baslıǵı kubogı”nıń saltanatlı ashılıw máresimi bolıp ótti
2561
Búgin “Qaraqalpaqstan Respublikası Joqarǵı Keńesiniń Baslıǵı kubogı”nıń saltanatlı ashılıw máresimi bolıp ótti.
Saltanatlı ashılıw máresimin Qaraqalpaqstan Respublikası Joqarǵı Keńesiniń Baslıǵı Amanbay Orınbaev ashıp berdi.
Joqarǵı Keńes Baslıǵı óz sózinde sońǵı jıllarda elimizde barlıq tarawlar qatarında dene tárbiya hám sporttı rawajlandırıwǵa, xalıqtı, ásirese, jaslardı sportqa keńnen tartıwǵa ayrıqsha itibar qaratılıp, bul baǵdarda keń kólemli ilajlar ámelge asırılıp atırǵanlıǵın atap ótti. Bunıń ayqın mısalı sıpatında, búgingi kúnde Respublikamızda 3 mıńnan aslam sport obektleri bolıp, bunda jaslarımız dene tárbiya hám sport penen turaqlı shuǵıllanıp kelmekte.
Elimizdegi bunday keń kólemdegi sport bazalarınıń qurılıwı sport penen turaqlı shuǵıllanıwshılar hám ósip kiyatırǵan jas áwladtıń sport penen shuǵıllanıwı ushın qolaylı sharayatlar jaratılıwına, sonday-aq, sport túrleri boyınsha shuǵıllanıwshılardıń sanınıń kúnnen-kúnge artıp, sportshılarımızdıń xalıq-aralıq arenalarda jeńimpazlıqtı qolǵa kirgiziwine sebep bolmaqta.
Ótkerilip atırǵan sport jarıslarında respublikamızdıń barlıq ministrlik, basqarma hám basqarıw uyımlarınan komandalar qatnasıp atırǵan bolıp, onda Qaraqalpaqstan Respublikası Joqarǵı Keńesi hám Qaraqalpaqstan Respublikası Qarjı ministrligi komandaları kubok jarısların baslap berdi.
Qaraqalpaqstan Respublikası Joqarǵı Keńesiniń Málimleme xızmeti